Read სბს–2013 1 ნეშტთა 19 Bible Online

1 ნეშტთა 19 - სბს–2013 bible

1 ნეშტთა 19

¹ამის შემდეგ იყო, რომ მოკვდა ყამონიანთა მეფე, ნახაში, ყამონის ძე, და მის ნაცვლად გამეფდა მისი ძე.

²და თქვა დავითმა: „წყალობას ვუზამ ხანუნს, ნახაშის ძეს, როგორც მამამისი მწყალობდა.“ და გაგზავნა დავითმა მოციქულები სანუგეშებლად მამის გამო; და მივიდნენ დავითის მსახურნი ყამონიანთა ქვეყანაში, ხანუნთან, სამძიმარზე.

³და უთხრეს ყამონიანთა მთავრებმა ხანუნს: „გგონია მამაშენის პატივისცემის გამო გიგზავნის დავითი სამძიმარზე? იქნებ იმისათვის გამოგზავნა მან თავისი მსახურნი, რომ დაზვეროს ქვეყანა, მიათვალ-მოათვალიეროს და მერე დააქციოს?“

⁴და შეიპყრო ხანუნმა დავითის მსახურნი, წვერები დაპარსა, წელამდე სანახევროდ შემოაჭრა სამოსელი და გაისტუმრა.

⁵და წავიდნენ ისინი. და შეატყობინეს დავითს ამ კაცების ამბავი, და გაგზავნა მან ხალხი მათ შესაგებებლად, რადგან ძალზე შეურაცხყოფილნი იყვნენ ისინი. და შეუთვალა მათ მეფემ: „იერიხოში დარჩით, ვიდრე წვერი მოგეზრდებოდეთ და მერე დაბრუნდით.“

⁶და დაინახეს ყამონიანთ, რომ თავი შეაძულეს დავითს, და გააგზავნეს ხანუნმა და ყამონიანთ ათასი ტალანტი ვერცხლი ეტლებისა და მხედრების დასაქირავებლად შუამდინარეთიდან, მაყაქას არამიდან და ცობადან.

⁷და იქირავეს 32 ათასი ეტლი და მეფე მაყაქა თავისი ხალხით, რომლებიც მივიდნენ და მედებას წინ დაბანაკდნენ. და შეიკრიბნენ ყამონიანები თავიანთი ქალაქებიდან და საომრად გამოემართნენ.

⁸და შეიტყო ეს დავითმა და გაგზავნა იოაბი უმამაცესთა მთელი ლაშქრითურთ.

⁹და გამოვიდნენ ყამონიანები და გაეწყვნენ საომრად ქალაქის კარიბჭესთან. ხოლო ის მეფენი, რომელნიც მოვიდნენ, ცალ-ცალკე დადგნენ ველად.

¹⁰როცა იოაბმა დაინახა, რომ მტერი წინიდან და ზურგიდან იყო მისკენ მიმართული, გამოარჩია ისრაელიანთა შორის ურჩეულესნი და დააწყო არამელთა წინააღმდეგ.

¹¹დანარჩენი ხალხი კი თავის ძმას, აბიშაის ჩააბარა, რათა ისინი ყამონიანთა წინააღმდეგ გაწყობილიყვნენ.

¹²და თქვა: „თუ არამელები მე მძლევენ, შენ მომეშველები, ხოლო თუ ყამონელები შენ გძლევენ, მე მოვალ შენს მოსაშველებლად.

¹³გამაგრდი და მტკიცედ იდექი ჩვენი ხალხისათვის და ჩვენი უფლის, ჩვენი ღმერთის ქალაქებისათვის. და უფალმა ქნას, რასაც ინებებს.“

¹⁴და გავიდნენ იოაბი და მისი ხალხი არამელებთან საომრად და უკუიქცნენ არამელები.

¹⁵როცა ყამონიანთ დაინახეს, რომ არამელები გარბოდნენ, თავადაც გაექცნენ აბიშაის და ქალაქში შეიკეტნენ. ხოლო იოაბი იერუსალიმში დაბრუნდა.

¹⁶და დაინახეს არამელებმა, რომ მარცხდებიან ისრაელთან და კაცები გაუგზავნეს მდინარისგაღმელ არამელებს და გადმოიყვანეს. მათ წინამძღოლობდა ჰადადყეზერის მხედართმთავარი შოფახი.

¹⁷და შეატყობინეს ეს დავითს და მანაც შეყარა მთელი ისრაელი. გადალახა იორდანე, და მივიდა მათთან და გაეწყო მათ წინააღმდეგ. ბრძოლა გაუმართა დავითმა არამელებს და ისინიც შეებნენ მას.

¹⁸და გაექცნენ არამელები ისრაელს. და დაუხოცა დავითმა არამელებს 7 ათასი ეტლოსანი და 40 ათასი ქვეითი. და მათი მხედართმთავარი შოფახიც მოკლულ იქნა.

¹⁹როცა ჰადადყეზერის მსახურებმა დაინახეს, რომ მარცხდებოდნენ ისრაელთან, დაეზავნენ დავითს და დაემორჩილნენ. არამელებმა ვეღარ გაბედეს ყამონიანთა დახმარება.