Read სბს–2013 1 ნეშტთა 20 Bible Online

1 ნეშტთა 20 - სბს–2013 bible

1 ნეშტთა 20

¹ერთი წლის თავზე, მეფეთა საომრად გამოსვლის ჟამს, იოაბი ლაშქარს წაუძღვა და ყამონელთა ქვეყანა გაანადგურა; მივიდა და რაბას შემოადგა; ხოლო დავითი იერუსალიმში დარჩა. და სძლია იოაბმა რაბას და დაანგრია.

²და მოხადა დავითმა მათ მეფეს გვირგვინი, და ნახა, რომ ერთი ტალანტი ოქროს წონა ჰქონდა და ძვირფასი თვლებით იყო მოოჭვილი. თავზე დაიდგა იგი – და აურაცხელი ნადავლი წამოიღო ქალაქიდან.

³და გამოიყვანა იქ მყოფი ხალხი და მათი დახოცვა დაიწყო ხერხებით, რკინის საცეხვებითა და რკინის ცულებით. ასე მოექცა დავითი ყამონიანთა ქალაქს და დაბრუნდა იერუსალიმში თავისი მეომრების თანხლებით.

⁴ამის შემდეგ იყო, რომ ფილისტიმელებთან ომი ატყდა გეზერში. მაშინ სიბექაი ხუშათელმა მოკლა სიფაი, რეფაიმელთა ერთი შთამომავალი. და მშვიდობა ჩამოვარდა მათ შორის.

⁵და კვლავ ატყდა ფილისტიმელებთან ომი. მაშინ ელხანან იაყირის ძემ დაამარცხა ლახმი, გათელი გოლიათის ძმა, რომლის შუბის ბუნი საქსელე ლილვის სიმსხო იყო.

⁶და კვლავ ატყდა ომი გათში. იყო უზარმაზარი კაცი, რომელსაც ხელ-ფეხზე ექვს-ექვსი თითი ჰქონდა – სულ 24. ისიც გოლიათთა ნაშიერი იყო.

⁷და დასცინოდა ისრაელს, მაგრამ განგმირა იგი იონათან შიმეყას ძემ – დავითის ძმისწულმა.

⁸ესენი შეეძინნენ რაფას გათში და ყველანი დავითისა და მის მსახურთა ხელით დაეცნენ.