Read სბს–2013 1 ნეშტთა 26 Bible Online

1 ნეშტთა 26 - სბს–2013 bible

1 ნეშტთა 26

¹კარისმცველთა დასები: კორახელთაგან: მეშელემია, კორეს ძე, ასაფის ძეთაგან.

²მეშელემიას ძენი იყვნენ: ზაქარია – პირმშო, იედიყაელი – მეორე, ზებადია – მესამე, იათნიელი – მეოთხე,

³ყელამი – მეხუთე, იეჰოხანანი – მეექვსე, ელიეჰოყენაი – მეშვიდე.

⁴ყობედ-ედომის ძენი: შემაყია – პირმშო, იეჰოზაბადი – მეორე, იოახი – მესამე, საქარი – მეოთხე, ნეთანელი – მეხუთე,

⁵ყამიელი – მეექვსე, ისაქარი – მეშვიდე, ფეყულთაი – მერვე, რადგან ღმერთმა აკურთხა იგი.

⁶მის ძეს, შემაყიას, ვაჟები ჰყავდა, რომლებიც მამისსახლს განაგებდნენ, ვინაიდან მაგარი ვაჟკაცები იყვნენ.

⁷შემაყიას ძენი იყვნენ: ყოთნი, რეფაელი, ყობედი, ელზაბადი და მისი ძმები, მაგარი ხალხი, ელიჰუ და სემაქია.

⁸ყველანი ყობედ-ედომის ძენი იყვნენ. ისინი თავიანთი ძეებიანად და ძმებიანად მაგარი ვაჟკაცები იყვნენ და სამსახურის გაწევის უნარი ჰქონდათ. ყობედ-ედომს ასეთები სულ 62 ჰყავდა.

⁹მეშელემიას 18 ძე და ძმა ჰყავდა – მაგარი ვაჟკაცები.

¹⁰ხოსას, მერარის ერთ-ერთი ძეთაგანის, ვაჟები იყვნენ: უფროსი შიმრი იყო – თუმცა პირმშო არ ყოფილა – მამამისმა არგუნა მას უფროსობა;

¹¹ხილკია მომდევნო იყო, ტებალია – მესამე, ზაქარია – მეოთხე. ხოსას სულ 13 ძე და ძმა ჰყავდა.

¹²კარისმცველთა დასს, მოყმეთა თავკაცებს, დაევალათ დაცვა, თავიანთ ძმებთან ერთად, უფლის სახლში სამსახურისთვის.

¹³ყველა კარიბჭეზე წილი ყარეს, როგორც დიდებმა, ისე პატარებმა, თავ-თავიანთი მამისსახლების მიხედვით.

¹⁴აღმოსავლეთის მხარე შელემიას ერგო წილად. მის ვაჟს, ზაქარიას, გონიერ მრჩეველს, უყარეს წილი და მას ჩრდილოეთის მხარე შეხვდა.

¹⁵ყობედ-ედომს სამხრეთის მხარე ერგო, მის ძეებს – საკუჭნაოებთან.

¹⁶შუფიმსა და ხოსას დასავლეთის მხარე შეხვდათ, შალექეთის ჭიშკართან, საიდანაც გზა ადის და დაცვა დაცვის პირისპირ დგას.

¹⁷აღმოსავლეთით ექვსი ლევიანი იდგა, ჩრდილოეთით – დღეში ოთხი, სამხრეთით – დღეში ოთხი, საკუჭნაოებთან – ორ-ორი.

¹⁸ფარბარის დასავლეთით, გზაზე, ოთხნი იდგნენ, თავად ფარბართან – ორნი.

¹⁹აჰა, კორახისა და მერარის ძეების კარისმცველთა დასები,

²⁰ლევიანთაგან: ახია ღვთის სახლის საგანძურსა და შეწირული ნივთების საგანძურს დარაჯობდა.

²¹ლაყდანის ძენი, გერშონელთა შთამომავალნი ლაყდანისგან. ისინი იყვნენ მამისსახლთა თავკაცები იეხიელთაგან.

²²იეხიელის ძენი: ზეთამი და მისი ძმა იოელი უფლის ტაძრის საგანძურს დარაჯობდნენ

²³ყამრამელებთან, იცჰარელებთან, ხებრონელებთან და ყუზიელებთან ერთად.

²⁴შებუელი ძე გერშომისა, მოსეს ძისა, საგანძურის მთავარი ზედამხედველი იყო.

²⁵მის ძმას, ელიყეზერს, ერთი ძე ჰყავდა – რეხაბია; მისი ძე იყო ესაია, მისი ძე იყო იორამი, მისი ძე იყო ზიქრი, მისი ძე იყო შელომითი.

²⁶ეს შელომოთი თავისი ძმებითურთ დარაჯობდა მთელ შეწირულ განძეულს, რომელიც მეფე დავითმა, მამისსახლთა თავკაცებმა, ათასისთავებმა, ასისთავებმა და სარდლებმა შეწირეს.

²⁷ომის ნაალაფრიდან სწირავდნენ ისინი უფლის ტაძრის შესაკეთებლად.

²⁸ყველაფერი, რაც სამუელ მხილველმა, საულ კიშის ძემ, აბნერ ნერის ძემ, იოაბ ცერუიას ძემ შესწირეს, ყველა ეს შენაწირი შელომითისა და მისი ძმების ხელში იყო.

²⁹იცჰარელთაგან ქონანია და მისი ძენი ისრაელიანთა საგარეო სამსახურში იყვნენ განწესებულნი მოხელეებად და მსაჯულებად.

³⁰ხებრონელთაგან: ხაშაბია და მისი ძმები, მაგარი ვაჟკაცები, 1700 სული, დანიშნულნი იყვნენ ისრაელზე იორდანეს გაღმიდან დასავლეთამდე, უფლის ყოველგვარი საქმისათვის და მეფის ყოველგვარი სამსახურისათვის.

³¹ხებრონელებს იერია ხებრონელი ჰყავდათ თავკაცად, თავიანთ მოდგმასა და მამისსახლში, დავითის მეფობის მეორმოცე წელს გამოიკითხეს და მათ შორის მაგარი ვაჟკაცები აღმოაჩინეს გალაადის იაყზერში.

³²მათი ძმანი, მაგარი ვაჟკაცები, 2700 იყვნენ – მამისსახლის თავკაცნი. დავით მეფემ ისინი რეუბენიანებში, გადელებში და მანაშეს ნახევარტომში გაამწესა ღვთისა და მეფის ყველა საქმეზე.