Read სბს–2013 1 ნეშტთა 9 Bible Online

1 ნეშტთა 9 - სბს–2013 bible

1 ნეშტთა 9

¹მთელი ისრაელი აღნუსხეს თავიანთი გვარტომობის მიხედვით და ისრაელის მეფეთა წიგნში ჩაწერეს. იუდაელნი კი ბაბილონის ტყვეობით დასაჯა უფალმა მათი ურჯულოების გამო.

²პირველი მკვიდრნი, თავიანთ სამფლობელოებსა და ქალაქებში რომ ცხოვრობდნენ, იყვნენ: მღვდლები, ლევიანები, ტაძრის მსახურნი და სხვა ისრაელიანები.

³იერუსალიმში ცხოვრობდნენ იუდას, ბენიამინის, ეფრემისა და მანაშეს ძეთაგან.

⁴იუდას ძეთაგან: ყუთაი, ძე ყამიჰუდისა, ძე ყომრისა, ძე იმრისა, ძე ბანისა, – იუდას ძის, ფერეცის მოდგმიდან;

⁵შელახისაგან იყვნენ: მისი პირმშო ყასაია და მისი ძენი;

⁶ზერახის ძეთაგან იყვნენ: იეყუელი და მისი ძმები – 690.

⁷ბენიამინის ძეთაგან იყვნენ: სალუ, ძე მეშულამისა, ჰოდავიას ძისა, ძისა ჰასენუასი,

⁸და იბნეია ძე იეროხამისა, და ელა, ძე ყუზისა, მიქრის ძისა, მეშულამი, ძე შეფატიასი, ძე რეღუელისა, ძე იბნიასი.

⁹მათი ძმები თავ-თავიანთ გვარ-ტომთა მიხედვით 956-ნი იყვნენ. ყველა ეს ვაჟკაცი მამისსახლის თავკაცი იყო.

¹⁰მღვდელთაგან იყვნენ: იედაყია, იეჰოიარიბი, იაქინი,

¹¹ყაზარია, ძე ხილკიასი, მეშულამის ძისა, ცადოკის ძისა, მერაიოთის ძისა, ახიტუბის ძისა – ღვთის სახლის წინამძღვარი;

¹²ყადაია, ძე იეროხამისა, ძისა ფაშხურისა, ძისა მალქიასი, და მაყასაი ძე ყადიელისა, ძისა იახზერასი, ძისა მეშულამისა, ძისა მეშილემითისა, ძისა იმერისა.

¹³მათი ძმები, მამისსახლთა თავკაცები იყვნენ ღვთის სახლის სამსახურში ნაცადი 1760 კაცი.

¹⁴ლევიანთაგან: შემაყია, ძე ხაშუბისა, ძისა ყაზრიკამისა, ძისა ხაშაბიასი – მერარიანთაგან;

¹⁵და ბაკბაკარი, ხერეში და გალალი და მათანია, ძე მიქასი, ძისა ზიქრისა, ძისა ასაფისა,

¹⁶და ყობადია, ძე შემაყიასი, ძისა გალალისა, ძისა იედუთუნისა, და ბერექია ძე ასასი, ძისა ელკანასი, რომელიც ცხოვრობდა ნეტოფათელთა დაბაში.

¹⁷ხოლო კარიბჭის მცველნი იყვნენ: შალუმი, ყაკუბი, ტალმონი, ახიმანი; მათი ძმა შალუმი თავკაცი იყო,

¹⁸და დღემდე ის დგას სამეფო კარიბჭეში, აღმოსავლეთით. ესენი იყვნენ ლევიანთა ბანაკის კარიბჭის მცველნი.

¹⁹შალუმი, ძე კორესი, ძისა ებიასაფისა, ძისა კორახისა, და მისი ძმები. მისი მამისსახლიდან, კორახელნი, სამსახურს ეწეოდნენ და კარვის ზღურბლებს იცავდნენ; ხოლო მათი მამები უფლის ბანაკთან მისასვლელს დარაჯობდნენ;

²⁰ფინეხას ელეაზარის ძე უწინ მათი წინამძღოლი იყო და უფალიც მასთან იყო.

²¹ზაქარია მეშელემიას ძე სადღესასწაულო კარვის კარის მცველი იყო.

²²ზღურბლების მცველებად ამორჩეულნი მთლიანად 212 იყო; ისინი საგვარტომო ნუსხაში თავ-თავიანთ დაბა-სოფლების მიხედვით არიან ჩაწერილნი. დავითმა და სამუელ მხილველმა დააყენეს ისინი მათი ერთგულების გამო.

²³ისინი თავიანთ ძეებთან ერთად დარაჯობდნენ უფლის ტაძრის (კარვის) კარიბჭეებს.

²⁴კარისმცველები ოთხივ მხრივ იდგნენ: აღმოსავლეთით, დასავლეთით, ჩრდილოეთით და სამხრეთით.

²⁵მათი ძმები თავიანთ დაბა-სოფლებში იყვნენ, რათა დროდადრო შვიდი დღით მისულიყვნენ მათთან.

²⁶რადგან კარიბჭეების მცველთა ის ოთხი მეთაური, რომლებიც ლევიანები იყვნენ, მუდამ ოთახებთან და ღვთის სახლის საგანძურებთან იდგნენ.

²⁷ისინი ღვთის სახლის ირგვლივ ათევდნენ ღამეს, რადგან მათ ებარათ დაცვა და ყოველ დილით კარიბჭის გაღება.

²⁸ერთ მათგანს სამსახურებელი ჭურჭელი ებარა, ვინაიდან თვლით შეჰქონდათ და თვლით გაჰქონდათ.

²⁹მათგან ზოგიერთებს დაევალათ ზრუნვა ჭურჭლეულობაზე და ყველა სხვა წმიდა ნივთებზე; გამტკიცულ ფქვილზე, ღვინოზე, ზეთზე, გუნდრუკსა და სურნელებებზე.

³⁰მღვდელთა ზოგიერთი ძე კი სანელსაცხებლე ზეთს ხარშავდა სულნელებათაგან.

³¹მათითიას, ერთ-ერთ ლევიანთაგანს, შალუმ კორახელის პირმშოს, ტაფებზე მომზადება მიენდო.

³²ზოგიერთ მათ ძმათაგანს, კოჰათიანთაგან, საწინაშეო პურის ცხობა ჩააბარეს, რათა ყოველ შაბათს მოემზადებინათ.

³³ხოლო მგალობელნი, ლევიანთა მამისსახლთა თავკაცები, ტაძრის ოთახებში საქმიანობისგან გათავისუფლებულნი იყვნენ, რადგან ისინი დღე და ღამ თავიანთი საქმით იყვნენ დაკავებული.

³⁴ესენი არიან ლევიანების მამისსახლთა თავკაცები, თავ-თავიანთ გვარ-ტომთა თავკაცები. ისინი იერუსალიმში ცხოვრობდნენ.

³⁵გიბეონში ცხოვრობდა გიბეონის მამა იეყიელი. მის ცოლს სახელად მაყაქა ერქვა.

³⁶მისი ძე, პირმშო ყაბდონი, მერე – ცური, კიში, ბაყალი, ნერი, ნადაბი,

³⁷გედორი, ახიო, ზაქარია და მიკლოთი.

³⁸მიკლოთმა შვა შიმეამი. ისინი თავიანთი ძმების მეზობლად, თავიანთ ძმებთან ერთად ცხოვრობდნენ იერუსალიმში.

³⁹ნერმა შვა კიში, კიშმა შვა საული. საულმა შვა იონათანი, მალქი-შუაყი, აბინადაბი და ეშბაყალი.

⁴⁰იონათანის ძე იყო მერიბ-ბაყალი. მერიბ-ბაყალმა შვა მიქა.

⁴¹მიქას ძენი: ფითონი, მელექი, თახრეაყი და ახაზი.

⁴²ახაზმა შვა იაყრა, იაყრამ შვა ყალამეთი, ყაზმავეთი და ზიმრი. ზიმრიმ შვა მოცა,

⁴³მოცამ შვა ბინყა; მისი ძე იყო რეფაია, მისი ძე იყო ელყასა, მისი ძე იყო აცელი.

⁴⁴აცელს ექვსი ძე ჰყავდა. აი მათი სახელები: ყაზრიკამი, ბოქრუ, ისმაელი, შეყარია, ყობადია, ხანანი – ესენი არიან აცელის ძენი.