Read სბს–2013 2 ნეშტთა 10 Bible Online

2 ნეშტთა 10 - სბს–2013 bible

2 ნეშტთა 10

¹და წავიდა შექემში რეხობოყამი, რადგან შექემში იყო მისული მთელი ისრაელიანობა მის გასამეფებლად.

²როცა ეს ამბავი შეიტყო იერობოყამ ნებატის ძემ, რომელიც ეგვიპტეში იმყოფებოდა, სადაც სოლომონ მეფისაგან იყო გაქცეული, უკან დაბრუნდა ეგვიპტიდან.

³შეუთვალეს და დაიბარეს იგი. და მოვიდა იერობოყამი და მთელი ისრაელი და ასე უთხრეს რეხობოყამს:

⁴„უღელი დაგვიმძიმა მამაშენმა. ახლა შეგვიმსუბუქე ეს ძნელი სამუშაო და მძიმე უღელი, მამაშენმა რომ დაგვადგა, და დაგემორჩილებით.“

⁵ხოლო მან უთხრა მათ: „წადით და სამი დღის მერე მოდით ჩემთან.“ და წავიდა ხალხი.

⁶რჩევა ჰკითხა მეფე რეხობოყამმა უხუცესებს, რომლებიც მამამისს, სოლომონს, ახლდნენ მის სიცოცხლეში, და უთხრა: „როგორ მირჩევთ, რა პასუხი გავცე ამ ხალხს?“

⁷ელაპარაკნენ მას და უთხრეს: „თუ კეთილი იქნები ამ ხალხისთვის, აამებ მათ და კეთილ სიტყვებს ეტყვი, მაშინ სამუდამოდ შენი მსახურნი იქნებიან ისინი.“

⁸არ დაუგდო ყური უხუცესების რჩევას, რაც ურჩიეს, და რჩევა მოყმეთ ჰკითხა, რომლებიც მასთან იყვნენ შეზრდილნი და ემსახურებოდნენ.

⁹და უთხრა მათ: „რას მირჩევთ, რა პასუხი გავცე მაგ ხალხს, რომ მეუბნებიან, შეგვიმსუბუქე მამაშენმა რომ უღელი დაგვადგაო?“

¹⁰და ელაპარაკნენ მოყმენი, მასთან რომ იყვნენ შეზრდილნი, და ურჩიეს: „ასე უთხარი იმ ხალხს, რომელიც გეუბნება: უღელი დაგვიმძიმა მამაშენმა და შენ უნდა შეგვიმსუბუქოო; მამაჩემის წელზე მსხვილია-თქო ჩემი ნეკა თითი.

¹¹ხომ დაგადგათ მამაჩემმა მძიმე უღელი, მე კი უფრო დაგიმძიმებთ მას! თუ მამაჩემი შოლტებითა გსჯიდათ, მე მორიელებით დაგსჯით-თქო.“

¹²და მივიდნენ იერობოყამი და მთელი ხალხი მესამე დღეს რეხობოყამთან, როგორც ნაბრძანები ჰქონდა მეფეს: „სამი დღის შემდეგ მოდითო ჩემთან.“

¹³და მკაცრი პასუხი გასცა მათ მეფემ: ყური არ ათხოვა მეფე რეხობოყამმა უხუცესთა რჩევას.

¹⁴მოყმეთა რჩევისამებრ ელაპარაკა მათ და უთხრა: „ხომ დაგიმძიმათ მამაჩემმა უღელი, მე კიდევ უფრო დაგიმძიმებთ; ხომ შოლტებით გსჯიდათ მამაჩემი, მე მორიელებით დაგსჯით.“

¹⁵არ შეიწყნარა მეფემ ხალხის სათხოვარი, რადგან ასეთი იყო ღვთის ნება, რათა აღსრულებულიყო უფლის სიტყვა, რაც ნათქვამი ჰქონდა იერობოყამ ნებატის ძისათვის, ახია შილოელის პირით.

¹⁶და როცა დაინახა მთელმა ისრაელმა, რომ არ უსმინა მათ მეფემ, სიტყვა შეუბრუნა ხალხმა მეფეს და უთხრა: „რა წილი გვიდევს დავითში? რა მემკვიდრეობა გვაქვს იესეს ძისაგან? თქვენ-თქვენი კარვებისაკენ, ისრაელო! ახლა შენ მიხედე შენს სახლს, დავით!“ და წავიდ-წამოვიდა ისრაელი თავ-თავის კარვებში.

¹⁷მხოლოდ იუდას ქალაქებში მცხოვრებ ისრაელის ძეებზე შერჩა მეფობა რეხობოყამს.

¹⁸და გაგზავნა მეფე რეხობოყამმა ჰადორამი, ხარკის ამკრებთა უფროსი, მაგრამ ქვით ჩაქოლეს ისრაელიანთ, და მოკვდა იგი. მაშინ სასწრაფოდ შეხტა მეფე რეხობოყამი ეტლზე და იერუსალიმში გაიქცა.

¹⁹და განუდგა ისრაელი დავითის სახლს და ასეა დღემდე.