Read სბს–2013 2 ნეშტთა 12 Bible Online

2 ნეშტთა 12 - სბს–2013 bible

2 ნეშტთა 12

¹როცა განმტკიცდა რეხობოყამის მეფობა და გაძლიერდა, მაშინ მიატოვა მან უფლის რჯული და მასთან ერთად მთელმა ისრაელმა.

²რეხობოყამის მეფობის მეხუთე წელს წამოვიდა შიშაკი, ეგვიპტის მეფე, იერუსალიმზე, რადგან შესცოდეს უფალს.

³მოვიდა 1200 ეტლით, 60 ათასი მხედრით, ურიცხვი ხალხით ეგვიპტიდან: ლიბიელები, სუქიმელები და ქუშელები,

⁴აიღო მან იუდას გამაგრებული ქალაქები და იერუსალიმს მიადგა.

⁵მაშინ წინასწარმეტყველი შემაყია მივიდა რეხობოყამთან და იერუსალიმში თავშეყრილ იუდას მთავრებთან, რომლებიც შიშაკს გაექცნენ და უთხრა მათ: „ასე ამბობს უფალი: რაკი თქვენ მიმატოვეთ, ახლა მეც მიგატოვებთო შიშაკის ხელში.“

⁶და დამორჩილდნენ ისრაელის მთავრები და მეფე და თქვეს: „მართალია უფალი!“

⁷და როცა დაინახა უფალმა, რომ დამორჩილდნენ, გამოეცხადა უფლის სიტყვა შემაყიას და უთხრა: „დამმორჩილდნენ ისინი, აღარ მოვსპობ, სულ მალე გამოვიხსნი და აღარ დაატყდება იერუსალიმს ჩემი რისხვა შიშაკის ხელით.

⁸მაგრამ მისი ყმები გახდებიან, რათა იცოდნენ, როგორია ჩემი ყმობა და ამქვეყნიური მეფეების ყმობა.“

⁹და მოვიდა შიშაკი, ეგვიპტის მეფე, იერუსალიმში და წაიღო უფლის ტაძრისა და სამეფო სახლის განძეულობა, ყველაფერი წაიღო, წაიღო ოქროს ფარებიც, სოლომონმა რომ გააკეთა.

¹⁰და გააკეთა მეფე რეხობოყამმა მათ ნაცვლად ბრინჯაოს ფარები და ჩააბარა მცველთა უფროსებს, რომელნიც სამეფო სახლის შესასვლელს დარაჯობდნენ.

¹¹და ყოველთვის, როცა მეფე უფლის სახლში შედიოდა, მცველები მოაცილებდნენ ამ ფარებით და მერე ისევ აბრუნებდნენ მცველთა ოთახში.

¹²და რაკი დამორჩილდა, გაბრუნდა უფლის რისხვა მისგან და საბოლოოდ აღარ დაღუპა იგი. იუდაშიც კეთილი ამბები იყო.

¹³და განმტკიცდა მეფე რეხობოყამი იერუსალიმში. 41 წლისა იყო რეხობოყამი, როცა გამეფდა, და 17 წელიწადს მეფობდა იერუსალიმში, ქალაქში, რომელიც უფალმა თავისი სახელის სამკვიდრებლად ამოირჩია ისრაელის ყველა ტომში. დედამისი იყო ნაყამა, ყამონელი.

¹⁴რეხობოყამი ბოროტებას აკეთებდა, რადგან მთელი თავგამოდებით არ ეძებდა უფალს.

¹⁵რეხობოყამის პირველი და უკანასკნელი ამბები ჩაწერილია წინასწარმეტყველ შემაყიასა და ყიდო მხილველის მატიანეში, საგვარტომო ნუსხის მიხედვით; აგრეთვე ის ბრძოლები, რაც რეხობოყამსა და იერობოყამს შორის წარმოებდა მთელი მათი სიცოცხლის მანძილზე.

¹⁶და განისვენა რეხობოყამმა თავის მამებთან, და დამარხეს დავითის ქალაქში; მის ნაცვლად მისი ძე, აბია, გამეფდა.