Read სბს–2013 2 ნეშტთა 14 Bible Online

2 ნეშტთა 14 - სბს–2013 bible

2 ნეშტთა 14

¹და განისვენა აბიამ თავის მამებთან, და დამარხეს დავითის ქალაქში; მის ნაცვლად ასა გამეფდა, მისი ძე. ასას დროს ათ წელიწადს მოსვენებული იყო იუდას ქვეყანა.

²კეთილად იქცეოდა და სწორად იქცეოდა ასა უფლის, თავისი ღმერთის, თვალში:

³მოშალა უცხო ღმერთების სამსხვერპლოები და მაღლობები, შემუსრა ქანდაკებები და აჩეხა აშერები.

⁴და უთხრა იუდას, გამოეძია უფალი, თავისი მამების ღმერთი, და შეესრულებინა მისი რჯული და მცნებები.

⁵და გააუქმა იუდას ყველა ქალაქში სამსხვერპლო მაღლობები და მზის სვეტები. და მოისვენა სამეფომ მის ხელში.

⁶და ააგო იუდაში გამაგრებული ქალაქები, რადგან მოსვენებული იყო ქვეყანა და არც ომი ჰქონია იმ წლებში, რაკი უფალმა სიმშვიდე მისცა.

⁷და უთხრა იუდას: „ავაშენოთ ეს ქალაქები და გარს გალავნები, კოშკები, კარიბჭეები და ბურჯები შემოვავლოთ. ქვეყანა კვლავ ჩვენს ხელშია, რადგან გამოვიძიეთ უფალი, ჩვენი ღმერთი. გამოვიძიეთ და ირგვლივ სიმშვიდე გვიბოძა.“ და დაიწყეს შენება და ხელი მოემართათ.

⁸ასას ჯარი ჰყავდა: 300 ათასი ფარითა და შუბით შეიარაღებული კაცი იუდადან და 240 ათასი ფარით შეიარაღებული და მშვილდოსანი კაცი ბენიამინიდან. ყველანი მაგარი ვაჟკაცები იყვნენ.

⁹და წამოვიდა მათ წინააღმდეგ ზერახ ქუშელი ათასჯერ ათასიანი ჯარით, 300 ეტლით და მარეშას მოადგა.

¹⁰და გამოვიდა ასა მის წინააღმდეგ საომრად და დაეწყვნენ ცეფათას ხეობაში, მარეშას ახლოს.

¹¹და უხმო ასამ უფალს, თავის ღმერთს, და უთხრა: „უფალო, განა შენგან არ არის შეწევნა ძლიერისა და უძლურისა? შეგვეწიე, უფალო, ღმერთო ჩვენო, რადგან შენზე ვართ მონდობილნი და შენი სახელით გამოვედით ამ ურდოს წინააღმდეგ. უფალო, შენ ღმერთი ხარ ჩვენი, ვერ გაგიძლებს კაცი!“

¹²და შემუსრა უფალმა ქუშელნი ასასა და იუდას წინაშე და გაიქცნენ ქუშელნი.

¹³და გაედევნენ ასა და მასთან მყოფი ხალხი, გერარამდე. და დაეცნენ ქუშელნი, არავინ გადარჩენილა ცოცხალი, რადგან გატყდნენ უფლის წინაშე და მისი მხედრობის წინაშე; და დიდძალი ნადავლი იგდო იუდამ ხელთ.

¹⁴და გაანადგურეს ქალაქები გერარის ირგვლივ, რადგან უფლის შიშმა მოიცვა ის მხარე. და გაძარცვეს ყველა ქალაქი იუდაელებმა, რადგან იქ ბევრი იყო საალაფო.

¹⁵პირუტყვის სადგომებიც გაანადგურეს, და უამრავი ცხვარი და აქლემი გამოირეკეს და იერუსალიმში დაბრუნდნენ.