Read სბს–2013 2 ნეშტთა 21 Bible Online

2 ნეშტთა 21 - სბს–2013 bible

2 ნეშტთა 21

¹განისვენა იოშაფატმა თავის მამებთან და დაიმარხა მათ გვერდით დავითის ქალაქში. და მის ნაცვლად იორამი, მისი ძე, გამეფდა.

²და ჰყავდა მას ძმები, იოშაფატის ვაჟები: ყაზარია, იეხიელი, ზაქარია, ყაზარია, მიქაელი, შეფატია, ესინი არიან იოშაფატის, ისრაელის მეფის, ძენი.

³და მისცა მათ მამამ მრავალი საჩუქარი – ვერცხლი, ოქრო და ძვირფასეულობა, იუდას გამაგრებულ ქალაქებთან ერთად; სამეფო კი იორამს გადასცა, რადგან იგი პირმშო იყო.

⁴და დაიჭირა მამამისის სამეფო იორამმა და, როცა გაძლიერდა, მახვილით დახოცა თავისი ძმები და ისრაელის მთავრები.

⁵32 წლისა იყო იორამი, როცა გამეფდა და რვა წელი იმეფა იერუსალიმში.

⁶ისრაელის მეფეთა გზით დადიოდა იგი, როგორც იქცეოდა ახაბის სახლი, რადგან ახაბის ასული ჰყავდა ცოლად და ბოროტს აკეთებდა უფლის თვალში.

⁷მაგრამ არ უნდოდა უფალს დავითის სახლის დაქცევა იმ აღთქმის გამო, დავითს რომ დაუდო, როცა შეჰპირდა, რომ მისცემდა ლამპარს მას და მის შთამომავალთ სამარადისოდ.

⁸მის დროს განუდგა ედომი იუდას და დაისვეს სხვა მეფე.

⁹და გაემართა იორამი თავისი მხედართმთავრებით და მთელი თავისი ეტლიონით. და ადგა ღამით და სძლია ედომელებს, გარს რომ ეხვივნენ, და ეტლიონთა მეთაურებს.

¹⁰და განუდგა ედომი იუდას და ასეა დღემდე; იმხანადვე განუდგა ლიბნაც იუდას, რადგან მიატოვა იორამმა უფალი, თავისი მამების ღმერთი.

¹¹მანაც მოაწყო მაღლობები იუდას მთებში და გარყვნა იერუსალიმის მცხოვრებნი და აცდუნა იუდა.

¹²და წერილი მოუვიდა მას ელია წინასწარმეტყველისაგან, რომელშიც ეწერა: „ასე ამბობს უფალი, მამაშენის, დავითის, ღმერთი: იმის გამო, რომ შენ არ დაადექი მამაშენის, იოშაფატის და იუდას მეფე ასას, გზას,

¹³არამედ ისრაელის მეფეთა გზით წახვედი, გარყვენი იუდა და იერუსალიმის მცხოვრებნი ახაბის სახლის გარყვნილების მსგავსად, თანაც შენზე უკეთესი შენი ძმები – მამაშენის სახლი – ამოწყვიტე,

¹⁴აჰა, უფალი სასტიკად მოსრავს შენს ხალხს, შენს ვაჟებსა და შენს ცოლებს და მთელ შენს სარჩო-საბადებელს.

¹⁵შენ კი მძიმე სენს შეგყრის, ნაწლავთა სენს, ისე რომ ნაწლავები სნეულებით დღე და დღე გადმოგცვივა.“

¹⁶და აღძრა უფალმა იორამის წინააღმდეგ ფილისტიმელთა და არაბთა სული, ქუშელთა მეზობლად რომ ცხოვრობენ;

¹⁷და გაილაშქრეს იუდაზე, და შეიჭრნენ მასში და ხელში ჩაიგდეს მთელი ქონება, რაც კი მეფის სახლში აღმოჩნდა, აგრეთვე მისი ვაჟები და ცოლები. ძე აღარ დარჩა, გარდა იეჰოახაზისა, მის ძეთა შორის უმრწემესისა.

¹⁸ყოველივე ამის შემდეგ დასცა უფალმა იგი უკურნებელი სენით.

¹⁹ასე იყო დღე და დღე. მეორე წლის ბოლოს კი გადმოსცვივდა ნაწლავები სენისაგან და საშინელი ტანჯვებით მოკვდა. მისმა ხალხმა არ დაუნთო კეთილსურნელების კოცონი, როგორც მის მამებს უნთებდნენ.

²⁰32 წლისა იყო როცა გამეფდა, და რვა წელი იმეფა იერუსალიმში. ისე წავიდა, რომ არავის დანანებია. და დამარხეს დავითის ქალაქში, სამეფო სამარხში.