Read სბს–2013 2 ნეშტთა 23 Bible Online

2 ნეშტთა 23 - სბს–2013 bible

2 ნეშტთა 23

¹მეშვიდე წელს ძალი მოიცა იეჰოიადაყმა და დაუკავშირდა ასისთავებს: ყაზარია იეროხამის ძეს, ისმაელ იეჰოხანანის ძეს, ყაზარია ყობედის ძეს, მაყასეია ყადაიაჰუს ძეს და ელიშაფატ ზიქრის ძეს.

²და წავიდნენ ისინი იუდაში, შეკრიბეს ლევიანები იუდას ყველა ქალაქში და ისრაელის ტომთა მთავრები და იერუსალიმში მოვიდნენ.

³აღთქმა დადო მთელმა კრებულმა მეფესთან ღვთის სახლში. და უთხრა მათ იეჰოიადაყმა: „აჰა, უფლისწული უნდა გამეფდეს, როგორც უფალმა ბრძანა დავითის ძეებზე.

⁴აი, რა უნდა გააკეთოთ: თქვენგან ერთი მესამედი შაბათს შემომსვლელ მღვდელთაგან და ლევიანთაგან ზღურბლთა მცველები იქნებიან;

⁵ერთი მესამედი მეფის სასახლეში იქნება; ერთი მესამედი – საძირკვლის კარიბჭეში, დანარჩენი ხალხი კი – უფლის ტაძრის ეზოებში.

⁶არავინ შევიდეს სახლში, გარდა მღვდლებისა და მომსახურე ლევიანებისა. ისინი შევიდნენ, რადგან განწმედილნი არიან. მთელი ხალხი კი უფლის სადარაჯოზე დადგეს.

⁷და გარს უნდა შემოერტყნენ ლევიანები მეფეს იარაღით ხელში, და, ვინც ტაძარში შევა, უნდა მოიკლას. იყავით მეფესთან შესვლისას და გამოსვლისას.“

⁸ყველაფერი ისე გააკეთეს ლევიანებმა და ყოველმა იუდაელმა, როგორც იეჰოიადაყ მღვდელმა უბრძანა მათ; წაიყვანეს თავ-თვისი ხალხი შაბათს შემომსვლელნი შაბათს გამომსვლელებთან ერთად, რადგან იეჰოიადაყ მღვდელს არ გაუუქმებია დღითი-დღედი მსახურება.

⁹და დაურიგა იეჰოიადაყ მღვდელმა ასისთავებს შუბები, დიდი და მცირე ფარები, მეფე დავითს რომ ჰქონდა უფლის სახლში,

¹⁰და დააყენა მთელი ხალხი, თითოეული თავისი იარაღით ხელში, ტაძრის მარჯვენა ფრთიდან მარცხენა ფრთამდე, სამსხვერპლოსთან, მეფის ირგვლივ.

¹¹და გამოიყვანეს უფლისწული, დაადგეს გვირგვინი და მისცეს მოწმობა. და გაამეფეს იგი და სცხეს იეჰოიადაყმა და მისმა ძეებმა და თქვეს: „იცოცხლოს მეფემ!“

¹²და შემოესმა ღათალიას ხალხის ჩოჩქოლი, რომ მორბოდნენ და ადიდებდნენ მეფეს, და გავიდა ხალხთან უფლის ტაძრისაკენ.

¹³და, აჰა, დაინახა შესასვლელთან თავის სვეტთან მდგარი მეფე; მეფის გვერდით მისი მხედართმთავრები და მესაყვირენი იყვნენ, ქვეყნის მთელი ხალხი ხარობდა და საყვირებს უბერავდა; მგალობელნი კი სამუსიკო საკრავებით ქება-დიდებას უძღვნიდნენ. და დაიპო სამოსელი ღათალიამ და იყვირა: „ღალატია, ღალატი!“

¹⁴და გაიხმო იეჰოიადაყ მღვდელმა ასისთავები, მხედართმთავრები და უთხრა: „გარეთ გაიყვანეთ და ვინც უკან გაჰყვება მახვილით მოკალით!“ – რადგან იფიქრა: „უფლის ტაძარში არ მოკლანო.“

¹⁵გზა მისცეს და, როცა მივიდა ტაძრის ცხენთა კარიბჭესთან, იქ მოკლეს.

¹⁶და დადო იეჰოიადაყმა აღთქმა თავის თავსა, მთელ ერსა და მეფეს შორის, რათა ისინი უფლის ერი გამხდარიყვნენ.

¹⁷და შევიდა მთელი ხალხი ბაყალის სახლში და დაანგრიეს თავისი სამსხვერპლოიანად, და დალეწეს მისი გამოსახულებანი და მოკლეს მათანი, ბაყალის ქურუმი, სამსხვერპლოების წინ.

¹⁸უფლის ტაძრის საქმენი იეჰოიადაყმა იმ ლევიან მღვდლებს ჩააბარა, რომლებიც დავითმა უფლის სახლში გაამწესა სიხარულითა და გალობით უფლისთვის სრულადდასაწველის შესაწირად, როგორც მოსეს რჯულში სწერია, დავითის განაწესის მიხედვით.

¹⁹და ჩააყენა მცველები უფლის ტაძრის კარებში, რათა რაიმეთი გაუწმიდურებული არავინ შესულიყო.

²⁰და წამოიყვანა ასისთავები, დიდებულები, ერისმთავრები, ქვეყნის მთელი ერი, და გაჰყვა მეფეს უფლის სახლიდან, ზემო ჭიშკრის გავლით, მეფის სასახლემდე, და დასვეს მეფე სამეფო ტახტზე.

²¹და გამხიარულდა ქვეყნის ერი და დაწყნარდა ქალაქი. ხოლო ღათალია მახვილით მოკლეს.