Read სბს–2013 2 ნეშტთა 28 Bible Online

2 ნეშტთა 28 - სბს–2013 bible

2 ნეშტთა 28

¹20 წლისა იყო ახაზი, როცა გამეფდა და 16 წელი იმეფა იერუსალიმში. სწორს არ აკეთებდა უფლის თვალში, მამამისის, დავითის, მსგავსად არ იქცეოდა;

²დადიოდა ისრაელის მეფეთა გზით და ბაყალების ქანდაკებებიც კი ჩამოასხა;

³და საკმეველს აკმევდა ბენ-ჰინომის ველზე; და ცეცხლში ატარებდა თავის შვილებს იმ წარმართთა ბილწი ჩვეულებისამებრ, რომელნიც აჰყარა უფალმა ისრაელიანთაგან.

⁴მსხვერპლს სწირავდა და საკმეველს აკმევდა გორაკებზე, ბორცვებზე და ყოველი ფოთლოვანი ხის ძირას.

⁵და ჩააგდო იგი უფალმა, მისმა ღმერთმა, არამის მეფის ხელში. და დაამარცხეს იგი, და მრავალნი დაატყვევეს და დამასკოში წაასხეს. გარდა ამისა, ისრაელის მეფის ხელშიც ჩააგდო, რომელმაც სასტიკად დაამარცხა.

⁶ფეკახ რემალიას ძემ ერთ დღეში 120 ათასი ამოხოცა იუდაში – ყველა კარგი ვაჟკაცი, რადგან მიატოვეს უფალი, თავიანთი მამების ღმერთი.

⁷ზიქრიმ, ეფრემელმა გოლიათმა, დახოცა უფლისწული მაყასეია, სახლთუხუცესი ყაზრიკამი და ელკანა, მეფის შემდეგ პირველი კაცი.

⁸და ტყვედ წაიყვანეს ისრაელიანებმა თავიანთ მოძმეთაგან 200 ათასი ქალი, ძე და ასული. დიდძალი ნადავლი წაართვეს და სამარიაში მიიტანეს ნაალაფარი.

⁹იყო იქ უფლის წინასწარმეტყველი, სახელად ყოდედი. და გამოვიდა სამარიაში დაბრუნებული ლაშქრის წინაშე და უთხრა: „აჰა, განრისხებულია უფალი, თქვენი მამების ღმერთი, იუდაზე, ხელში ჩაგიგდოთ იგი და თქვენც ამოწყვიტეთ ისინი ისეთი სიცოფით, რომელიც ცას მისწვდა.

¹⁰ახლა კი ფიქრობთ, რომ ყმებად და მხევლებად გაიხადოთ იუდას ძენი და იერუსალიმი! განა თქვენ არა გაქვთ დანაშაული უფლის, თქვენი ღმერთის, წინაშე?

¹¹ახლა კი გამიგონეთ და დააბრუნეთ ტყვეები, თქვენი მოძმეებისგან რომ წამოასხით, თორემ უფლის რისხვა დაგატყდებათ.“

¹²წინ აღუდგნენ ეფრემის ძეთა თავკაცები: ყაზარია იეჰოხანანის ძე, ბერექია მეშილემოთის ძე, ხიზკია შალუმის ძე და ყამასა ხადლაის ძე ომიდან დაბრუნებულთ,

¹³და უთხრეს: „ნუ შემოიყვანთ აქ ტყვეებს, რადგან დანაშაული გვაქვს უფლის წინაშე ჩადენილი, თქვენ კი გინდათ, რომ კიდევ შემატოთ ჩვენს ცოდვებს და დანაშაულებს, რადგან დიდია ჩვენი დანაშაული და რისხვა ისრაელზე.“

¹⁴და მიატოვეს მხედრებმა ტყვეები და ნაალაფარი მხედართმთავრებისა და კრებულის წინაშე.

¹⁵და ადგნენ სახელებით მოხსენებული ეს კაცები, მოჰკიდეს ხელი ტყვეებს და, ვინც კი შიშველი იყო მათგან, ყველა შემოსეს იმ ნაალაფარით; შემოსეს და ფეხზე ჩააცვეს, აჭამეს და ასვეს. ზეთი სცხეს, მერე სახედრებზე შესხეს ყველა დაუძლურებული და მიაცილეს იერიხომდე, ფინიკების ქალაქამდე, მათ მოძმეებამდე. თვითონ კი სამარიაში დაბრუნდნენ.

¹⁶იმ დროს მეფე ახაზმა მოციქულები გაუგზავნა აშურის მთავრებს, რათა დახმარება გაეწიათ მისთვის,

¹⁷და კვლავ მოვიდნენ ედომელები, და დაამარცხეს იუდა და ტყვეები წაასხეს.

¹⁸ფილისტიმელებიც მოედვნენ დაბლობისა და იუდას სამხრეთის ქალაქებს და დაიპყრეს ბეთ-შემეში, აიალონი, გედეროთი, სოქო და მისი დაბები, თიმნა და მისი დაბები, გიმზო და მისი დაბები, და იქ დასახლდნენ.

¹⁹ასე დაამდაბლა უფალმა იუდა ახაზის, იუდას მეფის, გამო, რადგან გარყვნა მან იუდა და ცოდვით სცოდავდა უფალს.

²⁰და მიუხდა მას თილგათ-ფილნესერი, აშურის მეფე, და დახმარების ნაცვლად შეავიწროვა იგი.

²¹რადგან გაძარცვა ახაზმა უფლის სახლი, მეფის სახლი, და მთავრები, და მისცა აშურის მეფეს, მაგრამ არა თავისდა შესაწევად.

²²თავისი გასაჭირის ჟამს უფრო სცოდავდა უფლის წინაშე მეფე ახაზი.

²³და მსხვერპლს სწირავდა დამასკოს ღმერთებს, რაკი ფიქრობდა, რომ მათ დასცეს იგი, და ამბობდა: „არამის მეფეთა ღმერთები ეხმარებიან არამელთ, შევწირავ მათ მსხვერპლს და მეც შემეწევიან.“ მაგრამ ისინი მისი და მთელი ისრაელის დასამხობად იყვნენ გამზადებულნი.

²⁴და მოაგროვა ახაზმა ღვთის სახლის ჭურჭელი და მთლიანად დალეწა, და დაკეტა უფლის სახლის კარებები, და სამსხვერპლოები დაიდგა იერუსალიმის ყველა კუთხეში.

²⁵იუდას ყველა ქალაქში მაღლობები მოაწყო კერპებისთვის საკმევლის საკმევად და განარისხა უფალი, თავისი მამების ღმერთი.

²⁶დანარჩენი მისი ამბები და ყველა მისი ნამოქმედარი – პირველნი და უკანასკნელნი – იუდასა და ისრაელის მეფეთა წიგნშია ჩაწერილი.

²⁷და განისვენა ახაზმა თავის მამებთან და დამარხეს იერუსალიმში, ოღონდ ისრაელის მეფეთა სამარხში არ ჩაუსვენებიათ. მის ნაცვლად კი მისი ძე, ხიზკია, გამეფდა.