Read სბს–2013 2 ნეშტთა 29 Bible Online

2 ნეშტთა 29 - სბს–2013 bible

2 ნეშტთა 29

¹ხიზკია 25 წლისა გამეფდა და 29 წელი იმეფა იერუსალიმში. დედამისი იყო აბია, ზაქარიას ასული.

²სწორად იქცეოდა უფლის თვალში, როგორც დავითი, მამამისი, იქცეოდა.

³მან თავისი მეფობის პირველი წლის პირველივე თვეში გააღო უფლის ტაძრის კარებები და განაახლა ისინი;

⁴და მოიყვანა მღვდლები და ლევიანები და აღმოსავლეთის მოედანზე მოუყარა თავი.

⁵და უთხრა მათ: „მისმინეთ, ლევიანებო! ახლა კი განიწმიდენით და განწმიდეთ უფლის, თქვენი მამების ღმერთის, სახლი, გამოიტანეთ უწმიდურება საწმიდრიდან.

⁶რადგან შესცოდეს ჩვენმა მამებმა, ბოროტად იქცეოდნენ უფლის, ჩვენი ღმერთის, თვალში და მიატოვეს იგი, პირი აარიდეს უფლის სავანეს და ზურგი შეაქციეს,

⁷დაგმანეს კარიბჭის კარებები და ჩააქრეს სასანთლენი, აღარც საკმეველი აკმიეს და აღარც სრულადდასაწველი აღუვლინეს საწმიდარში ისრაელის ღმერთს.

⁸უფლის რისხვა დაატყდა იუდასა და იერუსალიმს და სამარცხვინოდ იქცა, მოსაოხრებლად და დასასტვენად, როგორც თქვენი თვალით ხედავთ.

⁹აჰა, მახვილით დაეცნენ ჩვენი მამები; ჩვენი ძენი და ასულნი და ცოლები ტყვეებად არიან ამის გამო.

¹⁰ახლა გულით მწადია აღთქმა დავუდო უფალს, ისრაელის ღმერთს, რათა მიაქციოს ჩვენგან თავისი რისხვა.

¹¹ჩემო შვილებო, ნუ იქნებით დაუდევარნი, რადგან თქვენ ამოგირჩიათ უფალმა, რათა თავის წინაშე დაეყენებინეთ, რომ სამსახური გაგეწიათ, მისი მსახურები და საკმევლის მკმევლები ყოფილიყავით.“

¹²და ადგნენ ლევიანები: მახათ ყამასაის ძე, იოელ ყაზარიას ძე – კოჰათის ძეთაგან; მერარის ძეთაგან: კიში, ძე ყაბდისა, და ყაზარია, ძე იეჰალელელისა; გერშონის ძეთაგან: იოახ ზიმას ძე და ყედენ იოახის ძე;

¹³ელიცაფანის ძეთაგან: შიმრი და იეყიელი; ასაფის ძეთაგან: ზაქარია და მათანია;

¹⁴ჰემანის ძეთაგან: იეხიელი და შიმეყი; იედუთუნის ძეთაგან: შემაყია და ყუზიელი.

¹⁵და შეკრიბეს თავიანთი მოძმენი და განწმიდეს. მივიდნენ, როგორც მეფემ ბრძანა, უფლის სიტყვის მიხედვით, უფლის ტაძრის დასასუფთავებლად.

¹⁶და შევიდნენ მღვდლები უფლის სახლში, რათა გაეწმიდათ, და გამოხვეტეს ყოველგვარი უწმიდურება, რაც კი უფლის ტაძარსა და მის ეზოში ნახეს. და გამოიტანეს ლევიანებმა გარეთ, კიდრონის ხევში გადასაყრელად.

¹⁷პირველი თვის პირველ დღეს დაიწყეს გაწმენდა. თვის მერვე დღეს კი უფლის კარიბჭეს მიადგნენ და რვა დღე წმინდეს უფლის სახლი და პირველი თვის მეთექვსმეტე დღეს მოათავეს.

¹⁸და შევიდნენ მეფე ხიზკიასთან და მოახსენეს: „გავასუფთავეთ, უფლის მთელი სახლი, სრულადდასაწველის სამსხვერპლო და მთელი მისი ჭურჭელი, საწინაშეო პურების მაგიდა და მთელი მისი ჭურჭელი;

¹⁹ასევე ყველა ის ჭურჭელი, რომელიც მეფე ახაზმა თავის მეფობაში შეაგინა თავისი ურჯულოებით, ჩვენ მოვამზადეთ და წმიდავყავით და აჰა, უფლის სამსხვერპლოს წინ აწყვია ის.“

²⁰დილაადრიანად ადგა მეფე ხიზკია, შეკრიბა ქალაქის მთავრები და უფლის სახლში ავიდა.

²¹შვიდი ზვარაკი, შვიდი ვერძი, შვიდი კრავი და შვიდი ვაცი მიიყვანეს სამეფოს, საწმიდრისა და იუდას ცოდვისთვის, და აარონის ძეთ – მღვდლებს – უბრძანა მათი აღვლენა უფლის სამსხვერპლოზე.

²²და დაკლეს ზვარაკები და აიღეს მღვდლებმა სისხლი და სამსხვერპლოს აპკურეს; და დაკლეს ვერძები და სისხლი სამსხვერპლოს აპკურეს; და დაკლეს კრავები და სისხლი სამსხვერპლოს აპკურეს.

²³და მორეკეს ცოდვის განტევების ვაცები მეფისა და კრებულის წინაშე და ხელები დააწყვეს მათ.

²⁴და დაკლეს ისინი მღვდლებმა და განწმიდეს მათი სისხლით სამსხვერპლო მთელი ისრაელის ცოდვების დასაფარავად. რადგან მთელი ისრაელისათვის ბრძანა მეფემ სრულადდასაწველი და ცოდვის მსხვერპლის აღვლენა.

²⁵და დააყენა ლევიანები უფლის სახლში წინწილებით, ებნებითა და ქნარებით, დავითისა და გადის – მეფის მხილველის – და ნათან წინასწარმეტყველის მიერ დადგენილი წესის მიხედვით, რადგან ეს წესი უფლის მიერ იყო დადგენილი, მის წინასწარმეტყველთაგან.

²⁶ლევიანები დავითის საკრავებით დადგნენ, მღვდლები კი საყვირებით.

²⁷და გასცა ბრძანება ხიზკიამ, რომ აღევლინათ სრულადდასაწველი სამსხვერპლოზე. როგორც კი დაიწყო სრულადდასაწველის აღვლენა, მაშინვე გაისმა უფლის საგალობელი საყვირების ხმა დავითის, ისრაელის მეფის, საკრავების თანხლებით.

²⁸და მთელი კრებული თაყვანს სცემდა; მგალობელნი გალობდნენ და საყვირები ხმიანობდა. ასე გრძელდებოდა სრულადდასაწველის აღვლენის დამთავრებამდე.

²⁹სრულადდასაწველს რომ მორჩნენ, მეფემ და ყველა მასთან მყოფმა, მუხლი მოიყარეს და თაყვანი სცეს.

³⁰მეფე ხიზკიამ და მთავრებმა უთხრეს ლევიანებს, რომ ედიდებინათ უფალი დავითისა და ასაფ მხილველის სიტყვებით, და ისინიც სიხარულით აქებდნენ, მუხლს იდრეკდნენ და თაყვანს სცემდნენ უფალს.

³¹და მიუგო ხიზკიამ და თქვა: „ახლა თქვენ უკვე ნაკურთხი ხართ უფლისათვის; მოდით და შემოსწირეთ საკლავები და სამადლობელო ძღვენი უფლის სახლში.“ და შესწირა კრებულმა საკლავები და სამადლობელო ძღვენი, ხოლო ვინც გულუხვობა გამოიჩინა – სრულადდასაწველიც.

³²იმ სრულადდასაწველთა რიცხვი, კრებულმა რომ მოიყვანა, იყო: 70 ზვარაკი, 100 ვერძი, 200 კრავი; ყოველივე ეს უფლისათვის იყო სრულადდასაწველად.

³³სულ შეწირულ იქნა: 600 ზვარაკი და 3 ათასი ცხვარი.

³⁴ოღონდ ცოტანი იყვნენ მღვდლები და ვეღარ აუდიოდნენ ყველა სრულადდასაწველის გატყავებას, ამიტომ მათი მოძმე ლევიანები ეხმარებოდნენ მათ, ვიდრე საქმე არ მოთავდა და მღვდლები არ განიწმიდნენ, რადგან ლევიანები უფრო გულმოდგინეობდნენ განსაწმედად, ვიდრე მღვდლები.

³⁵თანაც უამრავი იყო სრულადდასაწველი სამშვიდობო მსხვერპლის ქონთან და სრულადდასაწველის საღვრელთან ერთად. და ასე აღდგა უფლის ტაძრის სამსახური.

³⁶და გაიხარა ხიზკიამ და მთელმა ერმა იმის გამო, რომ ასე განაწყო უფალმა ხალხი, რადგან ეს მოულოდნელად მოხდა.