Read სბს–2013 2 ნეშტთა 30 Bible Online

2 ნეშტთა 30 - სბს–2013 bible

2 ნეშტთა 30

¹და შეუთვალა ხიზკიამ მთელს ისრაელს და იუდას, წერილები მისწერა ეფრემსა და მანაშეს, რათა მოსულიყვნენ უფლის სახლში, იერუსალიმში, უფლისათვის, ისრაელის ღმერთისათვის, პასექის გასამართად.

²და გადაწყვიტეს მეფემ, მისმა მთავრებმა და მთელმა კრებულმა იერუსალიმში, რომ პასექი მეორე თვეში გადაეხადათ.

³რადგან იმჟამად არ შეეძლოთ თავის დროზე გადახდა, რაკი მღვდლები არ იყვნენ განწმედილნი საკმარისი რაოდენობით, და ჯერ არც ხალხი იყო თავმოყრილი იერუსალიმში.

⁴სწორად ჩათვალეს ეს მეფემ და მთელმა კრებულმა.

⁵და დაადგინეს, ხმა გაევრცელებინათ მთელ ისრაელში, ბეერ-შებაყიდან დანამდე, რომ მოსულიყვნენ და პასექი გადაეხადათ უფლისათვის, ისრაელის ღმერთისათვის, იერუსალიმში, რადგან დიდხანს არ ჰქონდათ გადახადილი იმ დროს, როცა დაწესებული იყო.

⁶და მოიარეს მალემსრბოლელებმა მეფისა და მთავრების წერილებით მთელი ისრაელი და იუდა, და მეფის ბრძანებისამებრ გამოუცხადეს ხალხს: „ისრაელიანებო, დაუბრუნდით უფალს, აბრაამის, ისააკის და ისრაელის ღმერთს, და ისიც დაუბრუნდება თქვენს ნატამალს, რაც აშურის მეფეთა ხელს გადაურჩით.

⁷ნუ იქნებით თქვენი მამებისა და მოძმეთა მსგავსნი, რომელთაც შესცოდეს უფალს, თავიანთი მამების ღმერთს და, როგორც ხედავთ, მანაც გასწირა ისინი გასაპარტახებლად.

⁸ახლა მაინც ნუ იქნებით ქედფიცხელნი, თქვენი მამების მსგავსად; დაემონეთ უფალს, მოდით მის საწმიდარში, რომელიც მან საუკუნოდ განწმიდა; ემსახურეთ უფალს, თქვენს ღმერთს, და გაბრუნდება თქვენგან მისი რისხვა.

⁹თუ დაუბრუდნებით უფალს, შებრალებას ჰპოვებენ თქვენი ძმები და შვილები მათ წინაშე, ვინც ისინი დაატყვევეს, და დააბრუნებენ ამ ქვეყანაში, რადგან მოწყალე და შემბრალეა უფალი, თქვენი ღმერთი. ზურგს აღარ შეგაქცევთ, თუ დაუბრუნდებით მას.“

¹⁰და დადიოდნენ მალემსრბოლნი ქალაქიდან ქალაქში, ეფრემის, მანაშესა და ზებულუნის ქვეყანაში, მაგრამ დასცინოდნენ მათ და აბუჩად იგდებდნენ.

¹¹მხოლოდ ზოგიერთნი მოდრკნენ აშერში, მანაშესა და ზებულუნში და მოვიდნენ იერუსალიმს.

¹²იუდაზეც იყო ღვთის ხელი მათზე, რათა ერთი ფიქრი ჰქონოდათ, რომ შეესრულებინათ, რაც მეფემ და მთავრებმა უბრძანეს, უფლის სიტყვისამებრ.

¹³და დიდძალი ხალხი მოაწყდა იერუსალიმს მეორე თვეს უფუარობის დღესასწაულზე. მრავლის უმრავლესი იყო კრებული.

¹⁴და ადგნენ და მოაშორეს სამსხვერპლოები, იერუსალიმში რომ იყო. ასევე ყველაფერი, რაზეც საკმეველს უკმევდნენ, აიღეს და კიდრონის ხევში გადაყარეს.

¹⁵და დაკლეს საპასექო კრავი მეორე თვის მეთოთხმეტე დღეს. და შერცხვათ მღვდლებსა და ლევიანებს, განიწმიდნენ და სრულადდასაწველი მიიტანეს უფლის სახლში.

¹⁶და დადგნენ თავ-თავის ადგილას მათი წესისამებრ, მოსეს, ღვთისკაცის, რჯულის მიხედვით. მღვდლები აპკურებდნენ სისხლს, რომელსაც ლევიანთა ხელიდან იღებდნენ.

¹⁷მრავლად იყვნენ კრებულში განუწმედელნი, ამიტომ დაკლეს ლევიანებმა საპასექო კრავები ყველა გაუწმიდურებულისთვის, რათა უფლისათვის განეწმიდათ ყველა გაუწმიდურებული.

¹⁸თუმცა ხალხის უმრავლესობა, მეტწილად ეფრემისგან, მანაშესგან, ისაქარისგან და ზებულუნისგან არ განწმედილა, მაინც ჭამეს პასექი, წერილის საწინააღმდეგოდ,

¹⁹რადგან ასე ილოცა მათთვის ხიზკიამ: „სახიერმა უფალმა მიუტეოს ყველას, ვინც განამზადა თავისი გული, რომ მოეძებნა უფალი ღმერთი, თავისი მამების ღმერთი, თუმცა კი საწმიდრის წესით არ განწმედილა.“

²⁰და უსმინა უფალმა ხიზკიას და მიუტევა ხალხს.

²¹ისრაელიანთ და იმათ, ვინც კი იერუსალიმში იყო, შვიდ დღეს იზეიმეს უფუარობის დღესასწაული დიდის სიხარულით. ლევიანები და მღვდლები ყოველდღე ადიდებდნენ უფალს უფლის სადიდებელი საკრავებით.

²²გულითადად ელაპარაკა ხიზკია ყველა ლევიანს, რომელიც კეთილი გონებით ემსახურებოდა უფალს. შვიდი დღე ჭამდნენ სადღესასწაულოს, სწირავდნენ სამშვიდობო მსხვერპლს და მადლობდნენ უფალს, თავიანთი მამების ღმერთს.

²³და გადაწყვიტა მთელმა კრებულმა, რომ მომდევნო შვიდი დღეც ეზეიმათ, და ეს შვიდი დღეც სიხარულში გაატარეს,

²⁴რადგან ხიზკიამ, იუდას მეფემ, კრებულისთვის გაიღო ათასი ზვარაკი და 7 ათასი ცხვარი, მთავრებმა გაიღეს კრებულისთვის ათასი ზვარაკი, 9 ათასი ცხვარი, და განიწმიდა მრავალი მღვდელი.

²⁵და ხარობდა იუდას მთელი კრებული, მღვდლები და ლევიანები, ისრაელიდან მოსული მთელი კრებული, ისრაელის ქვეყნიდან მოსული ხიზნები და იუდას მკვიდრნი.

²⁶ისეთი დიდი სიხარული სუფევდა იერუსალიმში, რომლის მსგავსი სოლომონის, დავითის ძის, ისრაელის მეფის დღეების მერე არ ყოფილა იქ.

²⁷და წამოდგნენ მღვდლები, ლევიანები და აკურთხეს ერი, მოსმენილ იქნა მათი ხმა, და აღევლინა მთელი ლოცვა მის წმიდა სამყოფელამდე ზეცაში.