Read სბს–2013 2 ნეშტთა 31 Bible Online

2 ნეშტთა 31 - სბს–2013 bible

2 ნეშტთა 31

¹ყოველივე ეს რომ დამთავრდა, გავიდა იქ მყოფი მთელი ისრაელი იუდას ქალაქებში და დალეწეს სვეტები, გაჩეხეს აშერები, დაანგრიეს მაღლობები და სამსხვერპლოები მთელ იუდაში, ბენიამინში, ეფრემში, მანაშეში – ერთიანად. და დაბრუნდა ყველა ისრაელიანი თავ-თავის სამკვიდრებელში, თავის ქალაქში.

²და დააყენა ხიზკიამ მღვდელთა და ლევიანთა დასები, მათი დასებისდა მიხედვით, თავ-თავისი სამსახურის შესასრულებლად, მღვდლებად ან ლევიანებად სრულადდასაწველისა და სამშვიდობო მსხვერპლის შესაწირავად, უფლის ბანაკის კარიბჭეში საქებრად და სადიდებლად.

³და დააწესა მეფემ წილი თავისი ქონებიდან, სრულადდასაწველისათვის: სრულადდასაწველისათვის დილისა და სრულადდასაწველისათვის მწუხრისა და სრულადდასაწველთათვის შაბათებისა და ახალმთვარობებისა და დღესასწაულებში, როგორც უფლის რჯულშია ჩაწერილი.

⁴და უბრძანა იერუსალიმში მცხოვრებ ხალხს, რომ თავიანთი წილი გასამრჯელო მიეცათ მღვდლებისთვის და ლევიანებისთვის, რათა მტკიცედ დაეცვათ უფლის რჯული,

⁵როგორც კი ეს ბრძანება გავრცელდა, უხვად მოიტანეს ისრაელიანთ მარცვლეულის, ღვინის, ზეთის, თაფლისა და მინდვრის მოსავლის პირველნაყოფი, და სხვა ყველაფრის მეათედიც უხვად მოიტანეს.

⁶იუდას ქალაქებში მცხოვრებმა ისრაელიანებმა და იუდაელებმა ასევე მორეკეს მეათედი ცხვარ-ძროხისა და მოიღეს მეათედი შენაწირიდან, რომელიც უფლისთვის, თავიანი ღმერთისთვის ჰქონდათ მიძღვნილი. მოიტანეს და გროვად დაახვავეს.

⁷მესამე თვეში დაიწყეს შეგროვებულის დახვავება და მეშვიდე თვეში დაამთავრეს.

⁸და მოვიდნენ ხიზკია და მთავრები, და ნახეს ხორაგი და აკურთხეს უფალი და მისი ერი – ისრაელი.

⁹ჰკითხა ხიზკიამ მღვდლებსა და ლევიანებს ხორაგის თაობაზე.

¹⁰და უთხრა მას ყაზარია მღვდელმთავარმა, ცადოკის სახლის პირველმა კაცმა: როცა დაიწყეს უფლის სახლში ძღვენის მოტანა, ძღომაზე ვჭამდით, მაგრამ მაინც ბევრი დარჩა, რადგან უფალმა აკურთხა თავისი ერი, და მონარჩენიდან კიდევ ამდენი დარჩა.

¹¹და თქვა ხიზკიამ, ბეღლები მოემზადებინათ უფლის სახლში. და მოამზადეს.

¹²და შეზიდეს ბეღლებში ძღვენი, მეათედი და შეწირულობანი. უფროსად იყო ლევიანი ქონანია, მისი ძმა შიმეყი მეორე კაცი იყო.

¹³იეხიელი, ყაზაზია, ნახათი, ყასაელი, იერიმოთი, იოზაბადი, ელიელი, ისმაქია. მახათი და ბენაია მეთვალყურენი იყვნენ ქონანიასა და შიმეყის, მისი ძმის, ხელქვეით, მეფე ხიზკიასა და ყაზარიას, უფლის ტაძრის წინამძღვრის ბრძანებით.

¹⁴კორე იმნას ძე, ლევიანი, აღმოსავლეთის მხარის კარის მცველი ღვთისადმი ნებაყოფლობით შესაწირავზე იყო, რათა გაეცა უფლის ძღვენი და წმიდათა წმიდა შეწირულობა.

¹⁵მის ხელქვევით მღვდელთა ქალაქებში იყვნენ: ყედენი, მინიამინი, იესო, შემაყია, ამარია, შექანია, რომ პატიოსნად გაენაწილებინათ მოძმეთათვის, მათი დასებისდა მიხედვით, როგორც დიდისთვის, ისე პატარისთვის,

¹⁶გარდა საგვარტომო ნუსხაში ჩაწერილთა, სამი წლის ასაკიდან მოყოლებული ყველა მამაკაცისთვის, უფლის სახლში ყველა მომსვლელისა ყოველდღიურ საქმეზე, მათი სამსახურისთვის მათი თანამდებობისდა მიხედვით,

¹⁷საგვარტომო ნუსხაში ჩაწერილი მღვდლებისთვის, მათ მამისსახლთა მიხედვით, 20 წლის ასაკს გადაცილებულ ლევიანთათვის, მათი თანამდებობისა და დასების მიხედვით.

¹⁸საგვარტომო ნუსხაში ჩაწერილი ყველა მათი წვრილშვილისთვის, ცოლებისთვის, ვაჟებისთვის და ასულებისთვის, მთელი კრებულისთვის, რადგან პატიოსნად განიწმიდნენ წმიდა მსახურებისათვის.

¹⁹ხოლო აარონის ძეთათვის – მღვდელთათვის, მათი ქალაქების ირგვლივ, ველ-მინდვრებზე რომ მკვიდრობდნენ, ყოველ ქალაქში კაცები განაწესეს სახელდებით, რომ წილი მიეცათ ყოველი მამაკაცისთვის სამღვდელოთა შორის და საგვარტომო ნუსხაში ჩაწერილი ყველა ლევიანისთვის.

²⁰ასე გააკეთა ხიზკიამ მთელ იუდაში, და იგი სიკეთით, სისწორით და პატიოსნებით გააკეთა უფლის, თავისი ღმერთის, წინაშე.

²¹ყველა საქმეში, რასაც კი წამოიწყებდა, ღვთის სახლის სამსახურში, რჯულში თუ მცნებებში, ყველგან თავის ღმერთს ეძებდა, მთელი გულით მოქმედებდა და იმარჯვებდა.