Read სბს–2013 2 ნეშტთა 35 Bible Online

2 ნეშტთა 35 - სბს–2013 bible

2 ნეშტთა 35

¹გადაუხადა იოშიამ პასექი უფალს იერუსალიმში, და დაკლეს საპასექო კრავი პირველი თვის მეთოთხმეტე დღეს.

²დააყენა მღვდლები თავ-თავიანთ საქმეებზე და ამხნევებდა უფლის ტაძრის სამსახურისთვის.

³და უთხრა ლევიანებს, რომელნიც მთელ ისრაელს მოძღვრავდნენ და საუფლოდ იყვნენ ნაკურთხი: „დადგით წმიდა კიდობანი იმ სახლში, სოლომონმა, დავითის ძემ, ისრაელის მეფემ რომ ააშენა. რად გინდათ მისი მხრებით ტარება? ემსახურეთ ახლა უფალს, თქვენს ღმერთს, და მის ერს – ისრაელს.

⁴მოემზადეთ თქვენ-თქვენი მამისსახლებისა და დასების მიხედვით, დავითის, ისრაელის მეფის, განწესების მიხედვით და სოლომონის, მისი ძის, განწესების მიხედვით.

⁵დადექით საწმიდარში თქვენი მოძმეების – ერის შვილობის – მამისსახლთა ჯგუფების მიხედვით და ლევიანთა მამისსახლების დასების მიხედვით.

⁶დაკალით საპასექო კრავი და განიწმიდენით, და მოუმზადეთ ის თქვენს ძმებს, რათა მოსეს მიერ გადმოცემული უფლის სიტყვისამებრ მოიქცეთ.“

⁷უბოძა იოშიამ ერის შვილებს და ყველას, ვინც კი იქ იყო, კრავები და თიკნები, ყველაფერი საპასექო მსხვერპლისთვის – რიცხვით 30 ათასი და ზვარაკებიც 3 ათასი. ეს მეფის ქონებიდან იყო.

⁸და მისმა მთავრებმა ნებაყოფლობით უბოძეს ხალხს, მღვდლებსა და ლევიანებს. ხილკიამ, ზაქარიამ და იეხიელმა – ღვთის სახლის წინამძღვრებმა – მღვდლებს საპასექოდ მისცეს 2600 კრავი და 300 ზვარაკი.

⁹ქონანიამ, შემაყიამ, ნეთანელმა და მისმა ძმებმა, ხაშაბიამ, იეყიელმა და იოზაბადმა – ლევიანთა მთავრებმა – ლევიანებს საპასექო მსხვერპლად უძღვნეს 5 ათასი კრავი და 500 ზვარაკი.

¹⁰ასე დაწესდა ღვთისმსახურება. და მღვდლები თავიანთ ადგილებზე დადგნენ და ლევიანები – თავ-თავიანთ დასებში მეფის ბრძანების მიხედვით.

¹¹და კლავდნენ საპასექო კრავებს, მღვდლები სისხლს ხელით იღებდნენ ლევიანთაგან და აპკურებდნენ, და ლევიანები ატყავებდნენ.

¹²და გამოაცალკევეს, რაც სრულადდასაწველისთვის იყო, რომ გაენაწილებინათ ერის შვილების მამისსახლთა ჯგუფების მიხედვით, რათა ისე შეეწირათ მსხვერპლი უფლისათვის, როგორც მოსეს წიგნში სწერია. ასევე აკეთებდნენ ზვარაკების შეწირვისასაც.

¹³შეწვეს საპასექო კრავი ცეცხლზე, წესის მიხედვით; ხოლო რაც გაწმედილი იყო ქვაბებსა და სიავებში მოხარშეს და სწრაფად ჩამოურიგეს ხალხს.

¹⁴შემდეგ თავისთვის და მღვდლებისთვისაც მოამზადეს; რადგან მღვდლები – აარონიანები – მწუხრამდე სწირავდნენ სრულადდასაწველსა და ლურთებს, ამიტომაც მოამზადეს ლევიანებმა თავისთვის და მღვდლებისთვის – აარონის ძეთათვის.

¹⁵და მგალობელნი – ასაფის ძენი – თავის ადგილას იდგნენ, როგორც დაწესებული იყო დავითის, ასაფის, ჰემანის და მეფის მხილველის იედუთუნის მიერ. კარისმცველნიც იდგნენ ყოველ კარში, მათ არ უხდებოდათ თავიანთი ადგილის მიტოვება, რადგან მათი მოძმე ლევიანები მათთვისაც ამზადებდნენ.

¹⁶ასე დაწესდა იმ დღეს უფლის ყველა სამსახური, რომ პასექი გადაეხადათ და სრულადდასაწველი აღევლინათ უფლის სამსხვერპლოზე, მეფე იოშიას ბრძანებისამებრ.

¹⁷შვიდი დღის განმავლობაში იხდიდნენ იმ დროს იქ მყოფი ისრაელიანები პასექს და უფუარობის დღესასწაულს.

¹⁸სამუელ წინასწარმეტყველის დღეების შემდეგ არ გადაეხადათ ისრაელში ასეთი პასექი. ისრაელის არც ერთ მეფეს არ გადაუხდია ასეთი პასექი, როგორც იოშიამ, მღვდლებმა, ლევიანებმა, მთელმა იუდამ, იქ მყოფმა ისრალიენებმა და იერუსალიმის მკვიდრებმა რომ გადაუხადეს უფალს.

¹⁹იოშიას მეფობის მეთვრამეტე წელს იქნა გადახდილი ეს პასექი.

²⁰ყოველივე ამის შემდეგ, როგორც კი იოშიამ მოაწესრიგა უფლის სახლი, გამოხდა ეგვიპტის მეფე ნექო, საომრად, მდინარე ევფრატზე, ქარქემიშთან და გამოვიდა იოშია მის შესახვედრად.

²¹მოციქულები გამოუგზავნა ნექომ და შემოუთვალა: „რა საქმე გვაქვს ერთმანეთთან მე და შენ, იუდას მეფევ? დღეს შენს წინააღმდეგ არ წამოვსულვარ, არამედ იმ სახლის წინააღმდეგ, რომელსაც ვეომები. ღმერთმა მიბრძანა, რომ ვიჩქარო, ჩამოეცალე ღმერთს, თან რომ მახლავს, რომ არ დაგღუპოს.“

²²პირი არ იბრუნა მისგან იოშიამ და შეიჭურვა მის წინააღმდეგ საომრად; არ შეისმინა ღმერთისგან შთაგონებული ნექოს სიტყვები; და გავიდა მეგიდოს ველზე საომრად.

²³სტყორცნეს მშვილდოსნებმა მეფე იოშიას და დაჭრეს. უთხრა მეფემ თავის მსახურთ: „გამიყვანეთ, რადგან მძიმედ დავიჭერი.“

²⁴ჩამოსვეს მისმა მსახურებმა ეტლიდან, აიყვანეს მის მეორე ეტლზე და იერუსალიმში წაიყვანეს. მოკვდა იგი და თავისი მამების სამარხში დაიმარხა. მთელმა იუდამ და იერუსალიმმა დაიტირა იგი.

²⁵გამართა გოდება იერემიამ იოშიაზე. ყველა მგალობელი კაცი და ქალი დღემდე მოთქვამს იოშიაზე თავის საგოდებლებში. წესად დაუდგინეს ისინი ისრაელს, და აჰა, საგოდებლებშია ჩაწერილი.

²⁶იოშიას დანარჩენი საქმენი და მისი სიქველენი, უფლის რჯულში ჩაწერილის თანახმად აღსრულებულნი,

²⁷და მისი საქმენი – პირველნი და უკანასკნელნი – იუდასა და ისრაელის მეფეთა წიგნშია ჩაწერილი.