Read სბს–2013 2 ნეშტთა 8 Bible Online

2 ნეშტთა 8 - სბს–2013 bible

2 ნეშტთა 8

¹ოცი წლის თავზე, როცა დაასრულა სოლომონმა უფლის ტაძრისა და თავისი სახლის შენება,

²გააშენა მან ის ქალაქებიც, რომლებიც ხურამმა მისცა მას, და ისრაელიანები ჩაასახლა იქ.

³და გაილაშქრა სოლომონმა ხამათ-ცობაზე და დაიპყრო იგი.

⁴გააშენა თადმორი უდაბნოში და ყველა ის სამარაგო ქალაქი, ხამათში რომ დააფუძნა.

⁵გააშენა ზემო ბეთ-ხორონი და ქვემო ბეთ-ხორონი, თავისი გალავნებით, კარიბჭეებითა და ხანდაკებით გამაგრებული ქალაქები;

⁶ბაყალათი და სამარაგო ქალაქები, რომლებიც კი ჰქონდა სოლომონს; საეტლო ქალაქები, ცხენოსანთა ქალაქები, და ყველაფერი, რისი გაშენებაც უნდოდა იერუსალიმში, ლიბანსა და მთელ თავის სახელმწიფოში.

⁷ყველა ხალხი, რომელიც დარჩა ხეთელთაგან, ამორეველთაგან, ფერიზელთაგან, ხიველთაგან და იებუსელთაგან, რომელიც არ იყო ისრაელიანთა მოდგმისა,

⁸და მათი შთამომავლები, მათ შემდეგ რომ დარჩნენ ქვეყანაში და არ გაუწყვეტიათ ისრაელიანთ, ბეგარაზე მომუშავეებად განაწესა სოლომონმა და ასე არიან დღემდე.

⁹ისრაელიანთაგან კი არავინ დაუყენებია სოლომონს თავის ბეგარაზე, რადგან მეომრებად ჰყავდა ისინი, თავის მცველთა მეთაურებად, თავისი ეტლებისა და მხედრების მეთაურებად.

¹⁰250 კაცი ჰყავდა მეფე სოლომონს ზედამხედველთა უფროსებად, რომელნიც ხალხს უძღვებოდნენ.

¹¹ფარაონის ასული სოლომონმა დავითის ქალაქიდან გადაიყვანა სახლში, რომელიც მას აუშენა, რადგან თქვა: „არ უნდა ცხოვრობდეს ჩემი ცოლი დავითის, ისრაელის მეფის, სახლში, რადგან წმიდაა ის ადგილი, სადაც უფლის კიდობანი შევიდა.“

¹²მაშინ დაიწყო სოლომონმა უფლისთვის სრულადდასაწველის შეწირვა უფლის სამსხვერპლოზე, რომელიც სტოასთან ააგო,

¹³რათა როგორც ეს ჩაწერილი იყო მოსეს რჯულში, მსხვერპლის ყოველდღიური აღვლენა; დაცვა შაბათებისა და ახალმთვარობებისა და წელიწადში სამი დღესასწაულისა: უფუარობის, შვიდეულთა და კარვობის ზეიმისა.

¹⁴დავითის, თავისი მამის მიერ დადგენილი წესის მიხედვით ჩააყენა მღვდელთა დასები მათს მსახურებაში, ლევიანები მათს სამსახურში, რათა სადიდებელი ეთქვათ და მღვდლებთან ერთად ემსახურათ ყოველდღიური მოვალეობის შესასრულებლად. ასევე ყველა კარს თავისი კარისმცველები მიუჩინა, თავ-თავისი დასების მიხედვით, რადგან ასე ბრძანა დავითმა, ღვთისკაცმა.

¹⁵არ უღალატიათ მეფის ბრძანებისათვის, რომელიც ეხებოდა მღვდლებსა და ლევიანებს, სხვა საქმეებსა და საგანძურებს.

¹⁶ასე ჰქონდა სოლომონს აწყობილი ყველა საქმე, საძირკვლის ჩაყრიდან დაწყებული, ვიდრე უფლის სახლი ბოლომდე არ გასრულდა.

¹⁷მაშინ წავიდა სოლომონი ზღვისპირეთში, ყეციონ-გებერსა და ელოთში, ედომის ქვეყანაში.

¹⁸ხურამმა თავის მსახურთა ხელით ხომალდები და თავისი ზღვისმცოდნე მსახურნი გაუგზავნა და ჩავიდნენ ისინი სოლომონის მსახურებთან ერთად ოფირში, და 450 ტალანტი ოქრო წამოიღეს იქიდან და მეფე სოლომონს მოუტანეს.