Read სბს–2013 2 ნეშტთა 9 Bible Online

2 ნეშტთა 9 - სბს–2013 bible

2 ნეშტთა 9

¹შებას დედოფალმა შეიტყო სოლომონის ამბავი და მოვიდა იერუსალიმში, რომ იგავებით გამოეცადა იგი. მოვიდა დიდძალი ამალით; აქლემებს მოჰქონდათ ნელსაცხებლები, უამრავი ოქრო და ძვირფასი თვლები; მოვიდა მასთან და ელაპარაკა ყველაფერზე, რაც გულში ჰქონდა სათქმელად.

²ყველა კითხვაზე გასცა პასუხი მეფემ. არაფერი იყო სოლომონისთვის ისეთი გაუგებარი, რომ პასუხი ვერ მიეცა.

³და დაინახა შებას დედოფალმა სოლომონის სიბრძნე; ნახა მისი აშენებული უფლის სახლი;

⁴მისი სუფრის სანოვაგე; მის მსახურთა საცხოვრებლები, მის მსახურთა პატივი და ჩაცმულობა; მისი მწდეები და მათი შესამოსელი; მისი კიბეები, რითაც ის უფლის სახლში ადიოდა, და გაოგნებული დარჩა.

⁵და უთხრა მეფეს: „მართალი ყოფილა, რაც ჩემს ქვეყანაში მქონდა გაგონილი შენზე და შენს სიბრძნეზე.

⁶სიტყვების არ მჯეროდა, ვიდრე თავად არ მოვედი და ჩემი თვალით არ ვიხილე: აჰა, თურმე ნახევარიც არ უთქვამთ ჩემთვის შენს უსაზღვრო სიბრძნეზე. ყველაფერს გადააჭარბა, რაც გაგონილი მქონდა.

⁷ბედნიერია შენი ხალხი. ბედნიერნი არიან შენი მსახურნი, მუდამ შენს წინაშე რომ ტრიალებენ და ისმენენ შენს სიბრძნეს.

⁸კურთხეულ იყოს უფალი, შენი ღმერთი, რომელმაც მოგისურვა, რათა მის ტახტზე დაესვი უფლის, შენი ღმერთის, მეფედ. შენი ღმერთის ისრაელისადმი სიყვარულის გამო დაგაყენა მასზე მეფედ, მის განსამტკიცებლად საუკუნოდ და სამართლისა და კანონის გასაჩენად.“

⁹და უბოძა მეფეს 120 ტალანტი ოქრო, დიდძალი ნელსაცხებელი და ძვირფასი ქვები. არ იყო ისეთი ნელსაცხებელი, შებას დედოფალს მეფე სოლომონისათვის რომ არ ებოძებინა.

¹⁰ხურამისა და სოლომონის მსახურებმა ოფირიდან ჩამოტანილ ოქროსთან ერთად სანდაზოლის ხეები და ძვირფასი ქვებიც ჩამოიტანეს.

¹¹და გააკეთა მეფემ სანდალოზის ხისაგან უფლის ტაძრისათვის და სამეფო სახლისათვის კიბეები; ებნები და ქნარები – მგალობელთათვის, რის მსგავსიც მანამდე არასდროს უნახავთ იუდას ქვეყანაში.

¹²და უბოძა მეფე სოლომონმა შებას დედოფალს ყველაფერი მისთვის სასურველი, რაც კი მან ითხოვა, იმაზე მეტიც კი, რაც მან მოართვა მეფეს; და უკან გაბრუნდა ის და წავიდა თავის ქვეყანაში თავის მსახურებიანად.

¹³666 ტალანტი ოქრო შემოსდიოდა სოლომონს ყოველწლიურად.

¹⁴ამას გარდა მოგზაურებს, ვაჭრებს, არაბთა მეფეებსა და მხარეთა განმგებლებსაც შემოჰქონდათ ოქრო-ვერცხლი.

¹⁵და გააკეთა მეფე სოლომონმა 200 ფარი ოქროთი ნაჭედი. 600 შეკელი ოქრო დაიხარჯა თითოეულ ფარზე.

¹⁶და გააკეთა 300 პატარა ფარი ოქროთი ნაჭედი, 300 შეკელი ოქრო დაიხარჯა თითოეულ ფარზე. და დააწყო ისინი მეფემ ლიბანის ხე-ტყით ნაგებ სახლში.

¹⁷და გააკეთა მეფემ სპილოსძვლისაგან დიდი ტახტი და ხალასი ოქროთი მოჭედა.

¹⁸ექვსი საფეხური ჰქონდა ტახტს, ოქროს ფეხსადგამი ჰქონდა ტახტს მიდგმული, საჯდომის ორსავე მხარეს მკლავები ჰქონდა, ხოლო მკლავებს თითო ლომი ედგა გვერდით.

¹⁹ექვს საფეხურზე, აქეთ-იქით, 12 სხვა ლომი იდგა.

²⁰მეფე სოლომონის ყველა სასმისი ოქროსი იყო, ყველა ჭურჭელი ლიბანის ხე-ტყის სახლში რჩეული იყო. ვერცხლმა და ბრინჯაომ ფასი დაკარგა სოლომონის დროს,

²¹რადგან მეფის ხომალდები ხურამის მსახურებთან ერთად თარშიშისკენ მიცურავდნენ; თარშიშული ხომალდები სამ წელიწადში ერთხელ ბრუნდებოდნენ და მოჰქონდათ ოქრო-ვერცხლი და სპილოსძვალი; მოჰყავდათ ყაფუზუნები და ფარშევანგები.

²²და განდიდდა მეფე სოლომონი ქვეყნის ყველა მეფეზე მეტად თავისი სიმდიდრითა და სიბრძნით.

²³ამ ქვეყნად ყველა მეფე ესწრაფოდა სოლომონის ნახვას, რომ მოესმინა მისი სიბრძნე, რომელიც გულში ჩაუდო ღმერთმა.

²⁴და ყველას თავისი ძღვენი მოჰქონდა: ოქროსა და ვერცხლის ჭურჭელი, შესამოსელი, საჭურველი, ნელსაცხებლები, ცხენები და ჯორები ყოველწლიურად.

²⁵სოლომონს 4 ათასი თავლა ჰქონდა, ჰყავდა ეტლები და 12 ათასი ცხენოსანი, განლაგებული ჰყავდა ისინი ეტლების სადგომ ქალაქებსა და იერუსალიმში, თავისთან.

²⁶მისი ხელისუფლება ვრცელდებოდა ყველა მეფეზე ევფრატიდან ფილისტიმელთა ქვეყნამდე და ეგვიპტის საზღვრებამდე.

²⁷ვერცხლის ფასი უბრალო ქვის ფასს გაუთანაბრდა იერუსალიმში, ხოლო კედარისა – სიკომოროს ხეს, დაბლობებში რომ იზრდება.

²⁸სოლომონის ცხენები ეგვიპტიდან და ყველა ქვეყნიდან იყო მოყვანილი.

²⁹სოლომონის დანარჩენი ამბები – პირველნი და უკანასკნელნი – სწერია ნათან წინასწარმეტყველის მატიანეში, ახია შილოელის წინასწარმეტყველებაში, იეყდო მხილველის ხილვაში, იერობოყამ ნებატის ძეს რომ შეეხება.

³⁰და იმეფა სოლომონმა იერუსალიმში მთელს ისრაელზე 40 წელი.

³¹და განისვენა სოლომონმა თავის მამებთან და დამარხეს დავითის, მამამისის ქალაქში; მის ნაცვლად რეხობოყამი, მისი ძე გამეფდა.