Read სბს–2013 ეზრა 4 Bible Online

ეზრა 4 - სბს–2013 bible

ეზრა 4

¹და გაიგეს იუდასა და ბენიამინის მტრებმა, რომ ტყვეობიდან დაბრუნებულნი ტაძარს უშენებდნენ უფალს, ისრაელის ღმერთს,

²და მივიდნენ ისინი ზერუბაბელთან და მამისსახლთა თავკაცებთან, და უთხრეს: „ჩვენც თქვენთან ერთად გვინდა ვაშენოთ, რადგან ჩვენც თქვენსავით ვეძებთ თქვენს ღმერთს და ჩვენც ვწირავთ მას მსხვერპლს აშურის მეფის, ესარხადონის, დღეთაგან, რომელმაც აქ ამოგვიყვანა.“

³და უთხრეს მათ ზერუბაბელმა და იესომ და ისრაელის მამისსალთა დანარჩენმა თავკაცებმა: „არ შეიძლება, რომ თქვენ და ჩვენ ერთად ვაშენოთ ჩვენი ღვთის სახლი, რადგან მხოლოდ ჩვენ უნდა ავუშენოთ სახლი უფალს, ისრაელის ღმერთს, როგორც ნაბრძანები აქვს ჩვენთვის კიროსს, სპარსთა მეფეს.“

⁴და იქაური ხალხი ხელს უშლიდა იუდაელთ და აბრკოლებდა ტაძრის შენებაში.

⁵და იწყეს მათ წინააღმდეგ მრჩევლების მოსყიდვა, რათა ჩაეშალათ მათი განზრახვა სპარსეთის მეფე კიროსის დღეებიდან დარიოსის გამეფებამდე.

⁶და, როცა ახაშვეროში გამეფდა, მისი მეფობის დასაწყისში მათ დაწერეს ცილისწამება იუდასა და იერუსალიმის მოსახლეობაზე.

⁷და არტაქსერქსეს დღეებში მისწერეს სპარსეთის მეფეს, არტაქსერქსეს, ბიშლამმა, მითრიდატემ, ტაბეელმა და სხვა მათმა თანამზრახველებმა. წერილი დაწერილი იყო არამეული ასოებით არამეულ ენაზე.

⁸რეხუმ მრჩეველმა და შიმშაი მწიგნობარმა მეფე ართახშასთას ერთი ასეთი წერილი მისწერეს იერუსალიმის წინააღმდეგ:

⁹„ჩვენ, რეხუმ მრჩეველმა და შიმშაი მწიგნობარმა და სხვა თანამოაზრეებმა, მსაჯულებმა, განმგებლებმა, მწიგნობრებმა, და ხელისუფლებმა, ერექელებმა, ბაბილონელებმა, შუშანელებმა, ანუ ყელამელებმა,

¹⁰და დანარჩენმა ხალხმა, რომელნიც აჰყარა დიდმა და სახელოვანმა ოსნაფარმა და დაასახლა სამარიის ქალაქებში და სხვა ქალაქებში ევფრატის გაღმა...“ –

¹¹და აი, რა იყო შემდეგ ნათქვამი იმ წერილში, რომელიც მათ გაუგზავნეს მას: „მეფე ართახშასთას, შენი მსახურნი, ადამიანები, რომლებიც მდინარის გაღმა ცხოვრობენ და სხვანი.

¹²მეფემ უნდა იცოდეს, რომ იუდაელნი, რომელნიც შენგან გამოვიდნენ, ჩვენთან ამოვიდნენ, იერუსალიმში, და აშენებენ ამ მეამბოხე და ბოროტ ქალაქს; კედლები აჰყავთ და ბურჯებს ამაგრებენ.

¹³ახლა იცოდეს მეფემ, რომ თუ ეს ქალაქი აშენდა და კედლები დამთავრდა, ისინი გადასახადს, ხარკსა და ბეგარას აღარ გადაგიხდიან და სამეფო ხაზინა დაზარალდება.

¹⁴ახლა, რაკი ჩვენ მეფის სასახლის მარილი გვაქვს ნაჭამი, მეფის ზარალის შორიდან ყურება არ შეგვიძლია, ამიტომ ვუგზავნით მეფეს უწყებას და ვატყობინებთ:

¹⁵მოჩხრიკონ შენი მამების მატიანეში, – და შენ ნახავ და გაიგებ, რომ ეს ქალაქი მეამბოხე ქალაქია და საზიანოა მეფეთათვის და ქვეყნისათვის; და რომ ძველთაგანვე ამბოხებები ხდებოდა აქ, ამიტომაც იქნა ეს ქალაქი განადგურებული.

¹⁶და ახლა ვატყობინებთ ჩვენს მეფეს, რომ თუ ეს ქალაქი აშენდა და კედლები დამთავრდა, მდინარის გაღმა სამფლობელო აღარ შეგრჩება.“

¹⁷მეფემ ასეთი პასუხი გამოუგზავნა მათ: „რეხუმ მრჩეველს, შიმშაი მწიგნობარს და მათ სხვა თანამოაზრეებს, რომლებიც ცხოვრობენ სამარიასა და ევფრატის გაღმა მხარის დანარჩენ ქალაქებში: მშვიდობა იყოს თქვენთან!

¹⁸წერილი, რომელიც თქვენ გამომიგზავნეთ, სიტყვა-სიტყვით წაიკითხეს ჩემს წინაშე.

¹⁹და ჩემი ბრძანებით გამოჩხრიკეს და აღმოაჩინეს, რომ ეს ქალაქი ძველთაგანვე უჯანყდებოდა მეფეებს და ამბოხება და არეულობა ხდებოდა იქ.

²⁰და ძლიერი მეფენი განაგებდნენ იერუსალიმს, და ეპყრათ მათ მდინარის მთელი გაღმა მხარე და გადასახადებს, ხარკსა და ბეგარას იღებდნენ იქიდან.

²¹ახლა გაეცით ბრძანება, რომ შეწყვიტონ მუშაობა ამ ხალხმა, რათა არ აშენდეს ეს ქალაქი, ვიდრე ჩემგან არ გამოვა ბრძანება.

²²და ფრთხილად იყავით, არაფერი გამოგეპაროთ ამ საქმეში, თორემ დიდი ზარალი იქნება და სამეფო დაზიანდება.“

²³როგორც კი მეფე ართახშასთას წერილი წაიკითხეს რეხუმისა და შიმშაი მწიგნობრისა და მათ თანამოაზრეთა წინაშე, დაუყოვნებლივ წავიდნენ ისინი იერუსალიმში იუდაელებთან და იძულებით შეაჩერებინეს სამუშაოები.

²⁴მაშინ შეწყდა ღმერთის ტაძრის შენება იერუსალიმში და გაჩერებული იყო, სპარსეთის მეფის, დარიოსის, მეფობის მეორე წლამდე.