Read სბს–2013 ეზრა 8 Bible Online

ეზრა 8 - სბს–2013 bible

ეზრა 8

¹ესენი არიან მამისსახლთა თავკაცები და მათი გვარ-ტომისანი, რომელნიც წამოვიდნენ ჩემთან ერთად ბაბილონიდან ართახშასთას მეფობაში:

²ფინეხასის ძეთაგან – გერშომი; ითამარის ძეთაგან – დანიელი; დავითის ძეთაგან – ხატუში;

³შექანიას ძეთაგან და ფარყოშის ძეთაგან – ზაქარია და მასთან მითვლილი 150 მამაკაცი;

⁴ფახათ-მოაბის ძეთაგან – ელიეჰოყენაი, ზერახიას ძე და მასთან ერთად 200 მამაკაცი;

⁵ზათუს ძეთაგან – შექანია, იახაზიელის ძე და მასთან ერთად 300 მამაკაცი;

⁶ყადინის ძეთაგან – ყებედი, იონათანის ძე და მასთან ერთად 50 მამაკაცი;

⁷ყელამის ძეთაგან – ესაია, ღათალიას ძე და მასთან ერთად 70 მამაკაცი;

⁸შეფატიას ძეთაგან – ზებადია, მიქაელის ძე და მასთან ერთად 80 მამაკაცი;

⁹იოაბის ძეთაგან – ყობადია, იეხიელის ძე და მასთან ერთად 218 მამაკაცი;

¹⁰ბანის ძეთაგან – შელომითი, იოსიფიას ძე და მასთან ერთად 160 მამაკაცი;

¹¹ბებაის ძეთაგან – ზაქარია, ბებაის ძე და მასთან ერთად 28 მამაკაცი;

¹²ყაზგადის ძეთაგან – იოხანანი, ჰაკატანის ძე და მასთან ერთად 110 მამაკაცი;

¹³ადონიკამის ძეთაგან – უკანასკნელნი, და აჰა, მათი სახელები: ელიფელეტი, იეყიელი და შემაყია და მათთან ერთად 60 მამაკაცი;

¹⁴ბიგვაის ძეთაგან – ყუთაი და ზაქური, და მათთან ერთად 70 მამაკაცი.

¹⁵და შევკრიბე ისინი მდინარესთან, რომელიც ერთვის აჰავას, და ვიდექით იქ სამი დღე. ვნახე ხალხი და სამღვდელოება, მაგრამ მათ შორის ლევიანთაგან იქ ვერავინ ვიპოვე.

¹⁶და დავიბარე ელიყეზერი, არიელი, შემაყია, ელნათანი, იარიბი, ელნათანი, ნათანი, ზაქარია, მეშულამი – თავკაცები, და იოიარიბი და ელნათანი – ბრძენკაცები.

¹⁷გავგზავნე ისინი იდოსთან, ქასიფიას მხარის საზოგადოების მთავართან, და შევუთვალე მათი პირით იდოს და მის ძმებს, ტაძრის მსახურებს, ქასიფიას მხარეში მყოფთ, რათა მოეყვანათ ჩვენთვის მსახურნი ჩვენი ღმერთის ტაძრისათვის.

¹⁸რადგან კეთილი ხელი ჩვენი ღმერთისა ჩვენზე იყო, მათ მოიყვანეს ჩვენთან ერთი გონიერი კაცი მახლის ძეთაგან, ლევის ძისა, ისრაელის ძისა, სახელად შერებია, და მისი ვაჟები და სხვა 18 კაცი;

¹⁹და ხაშაბია, და მასთან ესაია მერარის ძეთაგან, მისი ძმები და მისი ვაჟები – 20 კაცი.

²⁰და ტაძრის მსახურთაგან, რომლებიც დავითმა და მისმა მთავრებმა ლევიანებს მისცეს მსახურებად – 220 ტაძრის მსახური; ყველა მათგანი თავისი სახელით იყო ჩაწერილი.

²¹და გამოვაცხადე იქ მარხვა, მდინარე აჰავაზე, რათა თავი დაგვემდაბლებინა ჩვენი ღმერთის წინაშე, რათა მისთვის გვეთხოვა უსაფრთხო მოგზაურობა ჩვენთვის და ჩვენი წვრილშვილისა და მთელი ჩვენი მონაგარისათვის,

²²რადგან შემრცხვა მეთხოვა მეფისთვის ლაშქარი და მხედრები, გზაზე მტრისაგან თავდასაცავად, რადგან ნათქვამი გვქონდა მისთვის: ჩვენი ღმერთის ხელი სასიკეთოა ყველასთვის, ვინც ეძებს მას, ხოლო მისი ძალა და რისხვა თავს ატყდება ყველას, ვინც განუდგება მას!

²³და ვიმარხულეთ და ვთხოვეთ ჩვენს ღმერთს ეს, და შეისმინა მან ჩვენი.

²⁴და გამოვყავი 12 კაცი მღვდლების უფროსთაგან: შერებია, ხაშაბია და მათთან ერთად ათი კაცი მათი ძმებიდან.

²⁵და ავუწონე მათ ვერცხლი, ოქრო და ჭურჭელი, ჩვენი ღვთის სახლის შეწირულობა, რაც შესწირეს მეფემ, მისმა მრჩევლებმა, მთავრებმა და იქ მყოფმა მთელმა ისრაელიანებმა.

²⁶და მივუწონე მათ ხელში 650 ტალანტი ვერცხლი, ვერცხლის ჭურჭელი – 100 ტალანტისა და 100 ტალანტი ოქრო;

²⁷და ოქროს 20 თასი ათას დრაქმიანი და წმინდა ბრინჯაოს ორი საუკეთესო ჭურჭელი, რომელთაც ოქროს ფასი აქვს.

²⁸და ვუთხარი მათ: „თქვენ წმიდა ხართ უფლისათვის და ეს ჭურჭელიც წმიდაა; და ვერცხლი და ოქრო ნებაყოფლობითი შეწირულობაა უფლის, თქვენი მამების ღმერთისადმი.

²⁹ფრთხილად იყავით და მოუფრთხილდით ამას, ვიდრე მიუწონიდეთ მღვდლების უფროსებს, ლევიანებს და ისრაელის მამისსახლთა უფროსებს იერუსალიმში, უფლის ტაძრის საგანძურში.“

³⁰და ჩაიბარეს მღვდლებმა და ლევიანებმა ვერცხლი და ოქრო, და ჭურჭელი წონით, რათა წაეღოთ იერუსალიმში, ჩვენი ღვთის სახლში.

³¹და დავიძარით მდინარე აჰავადან იერუსალიმში წასასვლელად პირველი თვის მეთორმეტე დღეს; და ჩვენი ღმერთის ხელი იყო ჩვენზე და გვიხსნიდა ჩვენი მტრის ხელიდან და გზაში ჩასაფრებულთაგან.

³²და მივედით იერუსალიმში, და დავყავით იქ სამი დღე.

³³და მეოთხე დღეს ვერცხლი, ოქრო და ჭურჭელი ჩვენი ღვთის სახლში ხელში მივუწონეთ მერემოთს, ურია მღვდლის ძეს; და მასთან ერთად იყო ელეაზარ ფინეხასის ძე; და მათთან ერთად იყვნენ იოზაბადი, იესოს ძე, და ნოყადია ბინუის ძე – ლევიანები.

³⁴ყველაფერი დაითვალა და აიწონა, და ჩაიწერა მთელი ის წონა.

³⁵ტყვეობიდან დაბრუნებულმა გადანასახლებმა ხალხმა სრულადდასაწველი შესწირეს ისრაელის ღმერთს: 12 მოზვერი, მთელი ისრაელისათვის, 96 ვერძი, 77 კრავი, 12 ვაცი ცოდვის მსხვერპლად; ყოველივე ეს უფლისათვის სრულადდასაწველად.

³⁶და გადასცეს მეფისნაცვლებს და მდინარისგაღმელ განმგებელთ მეფის ბრძანება; და ისინიც ხელს უწყობდნენ ხალხსა და ღვთის სახლს.