Read სბს–2013 ეზრა 9 Bible Online

ეზრა 9 - სბს–2013 bible

ეზრა 9

¹და ეს ყოველივე რომ დასრულდა, მეახლნენ მე მთავრები და მითხრეს: „ისრაელიანები, მღვდლები და ლევიანები არ განდგომიან უცხოთესლთა – ქანაანელთა, ხეთელთა, ფერიზელთა, იებუსელთა, ყამონელთა, მოაბელთა, ეგვიპტელთა და ამორეველთა სიბილწეებს,

²რადგან მათ მათი ასულები მოიყვანეს ცოლებად და თავის ძეებსაც მოყჰგვარეს; და შეერია წმიდა თესლი უცხოთესლს; და ამ ურჯულოებაში უმთავრესად წარჩინებულთა და წინამძღოლთა ხელი ერია.“

³ეს ამბავი რომ გავიგე, შემოვიხიე სამოსელი და მოსასხამი, ვიგლეჯდი თმა-წვერსა და გაოგნებული ვიჯექი.

⁴და ჩემთან თავი მოიყარა ყველამ, ვისაც ეშინოდა ისრაელის ღმერთის სიტყვებისა ტყვედყოფილთა ურჯულოების გამო; მე კი ვიჯექი გაოგნებული საღამოს მსხვერპლშეწირვამდე.

⁵და საღამოს მსხვერპლშეწირვისას ავდექი ჩემი გლოვის ადგილიდან, და ჩემი შემოხეული სამოსლითა და მოსასხამით დავემხე მუხლებზე და ხელი აღვაპყარ უფლის, ჩემი ღმერთის, მიმართ

⁶და ვთქვი: „ღმერთო ჩემო! მრცხვენია და მერიდება, რომ სახე მოვაპყრო შენსკენ, რადგან ჩვენი ურჯულოებანი თავზე გადაგვდის და ჩვენი დანაშაული ცას სწვდება.

⁷ჩვენი მამების დროიდან დღემდე დიდ დანაშაულში ვართ; და ჩვენი ურჯულოების გამო ჩვენ, ჩვენი მეფენი და ჩვენი მღვდლები უცხო ქვეყნების მეფეთა ხელში ჩავცვივდით, მახვილის ქვეშ და ტყვეობაში; სხვისი სათარეშო და დასაცინი გავხდით – როგორც დღესა ვართ.

⁸და ახლა წამიერად მოიღო უფალმა, ჩვენმა ღმერთმა, ჩვენზე წყალობა და დატოვა ჩვენი ნატამალი და მოგვცა დასამკვიდრებელი თავის წმიდა ადგილზე, რომ გაენათებინა ჩვენი თვალები ჩვენს ღმერთს და ცოტათი მაინც გავეცოცხლებინეთ ჩვენს მონობაში.

⁹რადგან მონები ვართ ჩვენ და ჩვენს მონობაშიც არ მივუტოვებივართ ჩვენს ღმერთს და განავრცო ჩვენზე წყალობა სპარსეთის მეფეთა წინაშე, რომ გავეცოცხლებინეთ, რომ აღგვემართა ჩვენი ღმერთის სახლი; აღგვედგინა ნანგრევებიდან, რომ ზღუდე გვქონოდა იუდასა და იერუსალიმში.

¹⁰და ახლა რაღა გვეთქმის, ღმერთო ჩვენო, ამის შემდეგ? რადგან მივატოვეთ შენი მცნებანი,

¹¹შენი მსახურების, შენი წინასწარმეტყველების, პირით რომ გვაუწყე და გვითხარი: ‘ქვეყანა, რომლის დასამკვიდრებლადაც მიდიხართ, უწმიდური ქვეყანაა იმ ქვეყნების ხალხების უწმიდურებისა და სიბილწის გამო, რომელთაც კიდით კიდემდე აავსეს იგი თავიანთი სიბინძურით.

¹²და ახლა თქვენი ასულები არ გაატანოთ მათ ძეებს და მათი ასულები არ მოუყვანოთ თქვენს ძეებს. არ ეძებოთ მათი მშვიდობა და სიკეთე უკუნისამდე, რათა გაძლიერდეთ და ჭამოთ იმ ქვეყნის დოვლათი და სამარადისოდ დაუმკვიდროთ იგი თქვენს ძეებს.’

¹³და ყოველივე ამის შემდეგ, რაც თავს დაგვატყდა ჩვენი ავი საქმეებისა და ჩვენი დიდი დანაშაულის გამო, რადგან შენ, ღმერთო ჩვენო, იმაზე ნაკლებად დაგვსაჯე, ვიდრე ამას ჩვენი უკეთურებანი იმსახურებდნენ, და მოგვმადლე ამგვარი ხსნა.

¹⁴ნუთუ კვლავ დავარღვევთ შენს მცნებებს და დავუმოყვრდებით ამ ბილწ ხალხებს? მაშინ ხომ განგვირისხდები მოსასპობად ისე, რომ ჩვენი აღარც ნატამალი იქნება და აღარც ვინმე გადარჩენილი.

¹⁵უფალო, ღმერთო ისრაელისა! სამართლიანი ხარ, რადგან გადარჩენილი ნატამალი ვართ დღესდღეობით. აჰა, ჩვენ შენს წინაშე ვართ ჩვენი დანაშაულიანად, თუმცა ყოველივე ამის შემდეგ, უღირსნი ვართ, რომ შენს წინაშე ვიდგეთ.“