Read სბს–2013 ნეემია 1 Bible Online

ნეემია 1 - სბს–2013 bible

ნეემია 1

¹ეს არის ნეემიას, ხაქალიას ძის, ამბავი. მეოცე წელს ქისლევის თვეში, სატახტო ქალაქ შუშანში რომ ვიყავი,

²ხანანი, ერთ-ერთი ჩემი მოძმეთაგანი, და სხვა რამდენიმე კაცი მოვიდა იუდეიდან, და ვკითხე მათ დარჩენილ იუდაელებზე, ტყვეობას რომ გადაურჩნენ, და – იერუსალიმზე.

³და მითხრეს მე: „დარჩენილნი, ტყვეობას რომ გადაურჩნენ იქ, თავიანთ ქვეყანაში, დიდ უბედურებასა და გასაჭირში არიან; იერუსალიმის კედელი დარღვეულია და მისი კარიბჭენი ცეცხლით არის გადაბუგული.“

⁴ეს სიტყვები რომ მოვისმინე, დავჯექი და ავტირდი და რამდენიმე დღე ვგლოვობდი; ვმარხულობდი და ვლოცულობდი ცათა ღმერთის წინაშე,

⁵და ვეუბნებოდი: „გემუდარები, უფალო, ცათა ღმერთო, ღმერთო დიდებულო და შიშის მომგვრელო, რომელიც აღთქმასა და წყალობას უნახავ შენს მოყვარულებს და შენი მცნებების დამცველთ!

⁶ყური შენი სმენად იყოს და თვალი შენი – ხილვად, რათა შეისმინო შენი მსახურის ლოცვა, ახლა დღედაღამ რომ ლოცულობს შენს წინაშე ისრაელის ძეთათვის, შენს მორჩილთათვის, და აღიარებს ისრაელიანთა ცოდვებს, რომლითაც შენ შეგცოდეს. მე და ჩემმა მამისსახლმაც შეგცოდეთ.

⁷დავაშავეთ შენს წინაშე. არ ვასრულებდით იმ მცნებებს და წესებს და სამართალს, რაც უბრძანე მოსეს, შენს მსახურს.

⁸გაიხსენე სიტყვა, რომელიც აღუთქვი მოსეს, შენს მსახურს: თუ მიღალატეთ, ხალხებში გაგფანტავთ,

⁹ხოლო თუ მოიქცევით ჩემსკენ და დაიცავთ ჩემს მცნებებს და აღასრულებთ მათ, ცის კიდემდეც რომ იყოთ გაფანტულნი, იქიდან შეგაერთებთ და მოგიყვანთო იმ ადგილას, რომელიც ჩემი სახელის დასავანებლად ამოვირჩიეო.

¹⁰ისინი ხომ შენი მსახურნი არიან და შენი ერი, რომელიც გამოისყიდე შენი დიდი ძალითა და მტკიცე მარჯვენით.

¹¹გევედრები, უფალო, შენი ყური სმენად იყოს შენი მსახურის ლოცვისა და შენს მსახურთა ლოცვების მიმართ, რომელთაც სწადიათ შენი სახელის მოწიწება და ახლა გემუდარები, ხელი მოუმართე შენს მსახურს და წყალობა აპოვნინე ამ კაცის წინაშე!“ – მაშინ მე მეფის ღვინის მწდე ვიყავი.