Read სბს–2013 ნეემია 3 Bible Online

ნეემია 3 - სბს–2013 bible

ნეემია 3

¹და ადგნენ ელიაშიბი, დიდი მღვდელი, და მისი მღვდელი ძმები, და აღადგინეს ცხვრის კარიბჭე: მათ განათლეს ის და კარი შეაბეს, და განათლეს მეას გოდლიდან ხანანელის გოდლამდე.

²და მის გვერდით აშენებდნენ იერიხოელნი, ხოლო მათ გვერდით აშენებდა ზაქურ იმრის ძე.

³და თევზთა კარიბჭეს აშენებდნენ ჰასენაას ძენი; მათ გადახურეს იგი და კარები შეაბეს თავისი რაზა-კოჭატებითა და ურდულებით.

⁴მათ გვერდით კედელს ამაგრებდა მერემოთი, ძე ურიასი, ძისა ჰაკოცისა. მათ გვერდით ამაგრებდა მეშულამი, ძე ბერექიასი, ძისა მეშეზაბელისა; მათ გვერდით ცადოკ ბაყანას ძე ამაგრებდა.

⁵მათ გვერდით ამაგრებდნენ თეკოაყელები, მაგრამ მათი დიდებულნი კი ქედს არ იდრეკდნენ, რომ თავიანთი უფალი ღმერთისთვის ეშრომათ.

⁶ძველ კარიბჭეს ამაგრებდნენ იოიადაყი, ძე ფასეახის, და მეშულამი, ძე ბესოდეიასი; მათ გადახურეს იგი და ჩაუყენეს კარები თავისი რაზა-კოჭატებითა და ურდულებით.

⁷მათ გვერდით ამაგრებდნენ მელატია გიბეონელი და იადონ მერონოთელი, გიბეონისა და მიცფას მკვიდრები, რომელნიც მდინარისგაღმელ განმგებელს ემორჩილებოდნენ.

⁸მის გვერდით ამაგრებდა ყუზიელ ხარჰაიას ძე – ოქრომჭედელი; და მის გვერდით ამაგრებდა ხანანია, რომელიც მენელსაცხებელთაგან იყო, და აღადგენდნენ იერუსალიმს ფართო კედლამდე.

⁹მათ გვერდით ამაგრებდა რეფაია ხურის ძე, იერუსალიმის ნახევარსამთავროს მთავარი.

¹⁰და მის გვერდით ამაგრებდა იედაია, ძე ხარუმაფისა – თავისი სახლის წინ. და მის გვერდით ამაგრებდა ხატუშ ხაშაბნეიას ძე.

¹¹მეორე მხარეს ამაგრებდნენ მალქია ხარიმის ძე და ხაშუბ ფახათ-მოაბის ძე; მათვე გაამაგრეს ღუმელთა გოდოლი.

¹²და მის გვერდით ამაგრებდა შალუმი, ჰალოხეშის ძე, იერუსალიმის ნახევარსამთავროს მთავარი, ის და მისი ასულები.

¹³ნაღვარევის კარიბჭე გაამაგრეს ხანუნმა და ზანოახის მკვიდრებმა; მათ ააშენეს იგი, კარები შეაბეს თავისი რაზა-კოჭატებითა და ურდულებით; და მათვე გაამაგრეს სიგრძით ათასი წყრთა კედელი სანაგვის კარიბჭემდე.

¹⁴და სანაგვის კარიბჭე გაამაგრა მალქიამ, რექაბის ძემ, ბეთ-ჰაქერემის სამთავროს მთავარმა; მან ააშენა იგი და შეაბა კარები თავისი რაზა-კოჭატებითა და ურდულებით.

¹⁵წყაროსთვალის კარიბჭეს ამაგრებდა შალუმი, ქოლ-ხოზეს ძე, მიცფას სამთავროს მთავარი; მან აღადგინა და გადახურა იგი, შეაბა კარები თავისი რაზა-კოჭატებითა და ურდულებით. მანვე ააშენა კედელი შელახის აუზთან, მეფის ბაღის წინ დავითის ქალაქიდან ჩასასვლელ კიბეებამდე.

¹⁶მის იქით ამაგრებდა ნეემია, ყაზბუკის ძე, ბეთ-ცურის ნახევარსამთავროს მთავარი, დავითის საფლავის მოპირდაპირე მხარემდე, და ხელოვნურ ტბორამდე და გმირთა სახლამდე.

¹⁷მის იქით გაამაგრეს ლევიანებმა რეხუმის, ბანის ძის, ხელმძღვანელობით და მის გვერდით გაამაგრა ხაშაბიამ, კეყილას ნახევარსამთავროს მთავარმა, თავისი სამთავროს სახელით.

¹⁸მის იქით ამაგრებდნენ მათი ძმები, ბინუი ხენადადის ძის, კეყილას ნახევარსამთავროს მთავრის ხელმძღვანელობით.

¹⁹მის გვერდით – ყეზერ იესოს ძემ, მიცფას სამთავროს მთავარმა, გაამაგრა კედლის მეორე უბანი აიარაღის საწყობის ასასვლელის პირდაპირ, კუთხესთან.

²⁰მის იქით თავგამოდებით ამაგრებდა მეორე უბანს ბარუქი, ზაბაის ძე, კუთხიდან ელიაშიბ მღვდელმთავრის სახლის კარამდე.

²¹მის იქით მეორე უბანს ამაგრებდა მერემოთი, ურიას ძე, ძისა ჰაკოცისა – ელიაშიბის სახლის კარიდან ელიაშიბის სახლის ბოლომდე.

²²მის იქით სანახებში მცხოვრებმა მღვდლებმა გაამაგრეს.

²³მის იქით, თავიანთი სახლის წინ, ამაგრებდნენ ბენიამინი და ხაშუბი; მათ იქით თავის სახლთან გაამაგრა ყაზარიამ მაყასეიას ძემ, ძისა ყანანიასი;

²⁴მათ შემდეგ გაამაგრა ბინუი ხენადადის ძემ, მეორე უბანი – ყაზარიას სახლიდან კუთხემდე და მოსახვევამდე.

²⁵მის იქით ფალალ უზაის ძე ამაგრებდა კუთხისა და იმ გოდლის მოპირდაპირე მხარეს, რომელიც მეფის ზემო სახლიდან გამოდის და სატუსაღოს ეზოს ემიჯნება. მის იქით ფედაია ფარყოშის ძე ამაგრებდა.

²⁶ტაძრის მსახურებმა კი, ყოფელში რომ ცხოვრობდნენ, გაამაგრეს წყლის კარიბჭისა და გამოშვერილი გოდლის წინ, აღმოსავლეთით.

²⁷მათ იქით მეორე მხარეს თეკოაყელები ამაგრებდნენ დიდი გამოშვერილი გოდლის პირდაპირ ყოფელის ზღუდემდე.

²⁸ცხენების კარიბჭის ზემოთ მღვდლებმა გაამაგრეს – თითოეულმა თავისი სახლის წინ.

²⁹მათ იქით გაამაგრა ცადოკმა, იმერის ძემ, თავისი სახლის წინ. და მის იქით გაამაგრა შემაყია შექანიას ძემ, აღმოსავლეთის კარიბჭის მცველმა.

³⁰მის იქით ხანანია შელემიას ძემ და ხანუნ ცალაფის მეექვსე ძემ გაამაგრეს მეორე უბანი; მის იქით ამაგრებდა მეშულამ ბერექიას ძე თავისი ბინის წინ.

³¹მის იქით გაამაგრა მალქიამ, ცორფის ძემ, ტაძრის მსახურთა და ვაჭართა სახლამდე, სათვალთვალო კარიბჭის პირდაპირ, კუთხის ზემოთვალამდე.

³²ამ ზემოთვალსა და ცხვრის კარიბჭეს შორის გაამაგრეს ოქრომჭედლებმა და ვაჭრებმა.