Read სბს–2013 გამოსვლა 10 Bible Online

გამოსვლა 10 - სბს–2013 bible

გამოსვლა 10

¹და უთხრა უფალმა მოსეს: „მიდი ფარაონთან, რადგან ეს მე ვიყავი, გული რომ გავუქვავე მას და მის მსახურებს, რათა გამოვავლინო ჩემი სასწაულები მათ შორის.

²რათა უამბო შენს შვილსა და შვილთაშვილს, როგორ გავუსწორდი ეგვიპტეს და რა სასწაულები მოვუვლინე მას, რათა იცოდეთ, რომ მე ვარ უფალი.“

³და მივიდნენ მოსე და აარონი ფარაონთან, და უთხრეს: „ასე თქვა უფალმა, ებრაელთა ღმერთმა: ‘როდემდის უნდა მეურჩებოდე? გაუშვი ჩემი ხალხი, რომ მემსახუროს.

⁴თუ კიდევ იურჩებ და არ გაუშვებ ჩემს ერს, აჰა, ხვალვე კალიას მივუსევ შენს მიწა-წყალს.

⁵დაფარავს იგი მიწისპირს და შეუძლებელი იქნება ხილვა მიწისა, და შეჭამს გადარჩენილ ნატამალს, რაც სეტყვას გადაგირჩა; გადაჭამს ყველა ხეს, ველად რომ ხარობს.

⁶აავსებენ შენს სახლებს და შენს მსახურთა და ყველა ეგვიპტელის სახლს, რაც არ უხილავთ შენს მამებს და შენს მამათა მამებს დღიდან ქვეყანაზე მათი მყოფობისა დღემდე.’“ გაბრუნდა მოსე და გამოვიდა ფარაონისგან.

⁷და უთხრეს ფარაონს მსახურებმა: „როდემდე იყოს იგი ჩვენთვის დაბრკოლებად? გაუშვი ეს ხალხი და ემსახურონ უფალს, თავიანთ ღმერთს. ნუთუ ჯერაც ვერ მიმხვდარხარ, რომ იღუპება ეგვიპტე?“

⁸დააბრუნეს მოსე და აარონი ფარაონთან და მან უთხრა მათ: „წადით, ემსახურეთ უფალს, თქვენს ღმერთს. ვინ და ვინ არიან გამსვლელნი?“

⁹და თქვა მოსემ: „ჩვენი ჭაბუკებითურთ და ჩვენი მოხუცებითურთ წავალთ, ჩვენი ძეებითურთ და ჩვენი ასულებითურთ, ჩვენი ცხვარ-ძროხიანად, რადგან უფლის დღესასწაული გვაქვს.“

¹⁰და უთხრა ფარაონმა მათ: „ისე უფალი იყოს თქვენთან, როგორც მე გაგიშვათ თქვენი ბავშვებიანად. იცოდეთ, ბოროტს ეპირებით!

¹¹ასე არ იქნება! მამაკაცები წადით და თაყვანი ეცით უფალს, რაკი ამას ესწრაფით.“ და გაყარეს ისინი ფარაონისგან.

¹²და უთხრა უფალმა მოსეს: „მოუღერე ხელი ეგვიპტის ქვეყანას კალიის გამოსახმობად, რათა შეესიოს იგი ეგვიპტეს და გადაჭამოს ყოველი ბალახი მიწისა და ყოველივე, რაც სეტყვას გადაურჩა.“

¹³და მოუღერა კვერთხი მოსემ ეგვიპტის ქვეყანას და ადინა უფალმა აღმოსავლეთის ქარი ქვეყნად მთელს იმ დღესა და მთელ იმ ღამეს. დადგა დილა და აღმოსავლეთის ქარმა მოიყოლია კალია.

¹⁴შეესია უთვალავი კალია ეგვიპტის ქვეყანას და მოეფინა მის ყოველ კუთხეს. არც მანამდე ყოფილა ამდენი კალია და არც მერე იქნება.

¹⁵და დაფარა მთელი მიწის პირი და გადაშავდა მიწა, და გადაჭამა მან ქვეყნის მთელი ბალახი და ყოველი ნაყოფი ხისა, რომელიც სეტყვას გადაურჩა. და ეგვიპტის მთელ ქვეყანაზე არ შერჩენილა სიმწვანე ხეს და ველის ბალახს.

¹⁶სასწრაფოდ უხმო ფარაონმა მოსეს და აარონს, და უთხრა: „შევცოდე უფლის, თქვენი ღმერთის წინაშე და თქვენს წინაშე.

¹⁷ახლა ერთხელ კიდევ მომიტევეთ ჩემი ცოდვა და შეევედრეთ უფალს, თქვენს ღმერთს, რომ ამარიდოს ეს სიკვდილი.“

¹⁸და გამოვიდა იგი ფარაონისგან, და შეევედრა უფალს.

¹⁹და შეაქცია უფალმა დასავლეთის ძალზე ძლიერი ქარი და წაიღო კალია და ჩაყარა მეწამულ ზღვაში. ერთი კალიაც არსად დარჩენილა ეგვიპტის მიწა-წყალზე.

²⁰და გაასასტიკა უფალმა ფარაონის გული, და არ გაუშვა ისრაელიანები.

²¹უთხრა უფალმა მოსეს: „მიაღერე ხელი ცისკენ, რომ სიბნელე დააწვეს ეგვიპტის ქვეყანას, უკუნი წყვდიადი.“

²²მიაღერა მოსემ ხელი ცისკენ და იყო უკუნი წყვდიადი მთელს ეგვიპტის ქვეყანაში სამ დღეს.

²³ვერ ხედავდნენ ერთმანეთს და არავინ დაძრულა ადგილიდან სამ დღეს. ყოველ ისრაელის ძეს კი ჰქონდა სინათლე თავის სადგომში.

²⁴და მოიხმო ფარაონმა მოსე, და უთხრა: „წადით, ემსახურეთ უფალს, ოღონდ თქვენი ცხვარი და ძროხა დარჩეს, თქვენი ბავშვები კი გამოგყვნენ.“

²⁵და უთხრა მოსემ: „შენც უნდა მოგვცე ჩვენს ხელთ სამსხვერპლოები და სრულადდასაწველები, რათა მსხვერპლად შევწიროთ ჩვენს უფალ ღმერთს.

²⁶ჩვენი ჯოგებიც უნდა წამოვიდეს ჩვენთან ერთად, ჩლიქიც არ უნდა დარჩეს, და მათგან გამოვარჩევთ იქ შესაწირავს ჩვენი უფალი ღმერთისათვის. ვიდრე იქ არ მივალთ, არ ვიცით, რით ვემსახუროთ უფალს.“

²⁷და გაასასტიკა უფალმა ფარაონის გული, და არ ინება მათი გაშვება.

²⁸და უთხრა მას ფარაონმა: „თავიდან მომწყდი და გაფრთხილდი, აღარ დამენახო, თორემ იმ დღესვე მოკვდები, რა დღესაც დამენახვები.“

²⁹და თქვა მოსემ: „სწორს ამბობ. მე აღარ დაგენახვები.“