Read სბს–2013 გამოსვლა 40 Bible Online

გამოსვლა 40 - სბს–2013 bible

გამოსვლა 40

¹და უთხრა უფალმა მოსეს:

²პირველი თვის პირველ დღეს აღმართე სავანე – საკრებულო კარავი.

³და დადგი იქ კიდობანი მოწმობისა, და ჩამოაფარე კიდობანს ფარდა.

⁴შეიტანე ტაბლა და დააწყვე მასზე რაც დასაწყობია, და შეიტანე სასანთლე და დადგი ზედ მისი კანდელები.

⁵და დადგი ოქროს სამსხვერპლო საკმევლისათვის მოწმობის კიდობნის წინ, და ჩამოჰკიდე ფარდა სავანის შესასვლელთან.

⁶და დადგი სამსხვერპლო სრულადდასაწველისა სავანის – საკრებულო კარვის შესასვლელის წინ.

⁷და დადგი საბანელი საკრებულო კარავსა და სამსხვერპლოს შორის და ჩაასხი შიგ წყალი.

⁸და მოაწყვე გარშემო ეზო ჩამოჰკიდე ფარდა ეზოს კარიბჭეზე.

⁹აიღე მირონი და სცხე სავანეს და ყოველივეს, რაც მასშია. წმიდა ჰყავ მთელი მისი ჭურჭელი და წმიდა იქნება.

¹⁰სცხე სრულადდასაწველის სამსხვერპლოს და ყოველ მის ჭურჭელს, და წმიდა ჰყავ სამსხვერპლო, და წმიდათა წმიდა იქნება სამსხვერპლო.

¹¹და სცხე საბანელს და მის კვარცხლბეკს და წმიდა ჰყავ იგი.

¹²და მიიყვანე აარონი და მისი ძენი საკრებულო კარვის შესასვლელთან და განბანე ისინი წყლით.

¹³და შემოსე აარონი წმიდა შესამოსლით, და სცხე მას და წმიდა ჰყავ იგი, რათა მღვდლობა გამიწიოს.

¹⁴და მისი ძენი მოიყვანე და შემოსე ისინი კვართებით.

¹⁵და სცხე მათ, როგორც სცხე მათ მამას, რათა მღვდლობა გამიწიონ, და იყოს მათი ცხება საუკუნო მღვდლობად მათი თაობიდან თაობამდე.

¹⁶და გააკეთა მოსემ ყოველივე, როგორც უბრძანა უფალმა მას.

¹⁷მეორე წლის პირველ თვეს, თვის პირველ დღეს აღიმართა სავანე.

¹⁸აღმართა მოსემ სავანე: დადგა მისი კვარცხლბეკები, აღმართა მისი კეტები, დაამაგრა ლარტყები და აღმართა მისი სვეტები.

¹⁹გადააფარა საფარველი სავანეს და დაადო საბურველი ზემოდან, როგორც უბრძანა უფალმა მოსეს.

²⁰აიღო მოსემ მოწმობა და ჩადო კიდობანში, და გაუყარა კეტები კიდობანს და დაახურა სარქველი კიდობანს ზემოდან.

²¹და შეიტანა კიდობანი სავანეში, ჩამოჰკიდა ფარდა და დაფარა კიდობანი მოწმობისა, როგორც უბრძანა უფალმა მოსეს.

²²და დადგა ტაბლა საკრებულო კარავში, სავანის ჩრდილოეთ მხარეს, ფარდის გარეთ.

²³და დააწყო მასზე პურები უფლის წინაშე, როგორც უბრძანა უფალმა მოსეს.

²⁴და დადგა სასანთლე სავანეში – საკრებულო კარავში ტაბლის პირისპირ, სავანის სამხრეთ მხარეს,

²⁵და დადგა მასზე კანდელები უფლის წინაშე, როგორც უბრძანა უფალმა მოსეს.

²⁶და დადგა ოქროს სამსხვერპლო საკრებულო კარავში ფარდის წინ.

²⁷და აკმია მასზე სურნელოვანი საკმეველი, როგორც უბრძანა უფალმა მოსეს.

²⁸და ჩამოჰკიდა ფარდა სავანის შესასვლელში.

²⁹და დადგა სრულადდასაწველის სამსხვერპლო სავანის – საკრებულო კარვის შესასვლელში, და აღავლინა მასზე სრულადდასაწველი და პურეულის ძღვენი, როგორც უბრძანა უფალმა მოსეს.

³⁰და დადგა საბანელი საკრებულო კარავსა და სამსხვერპლოს შორის, და ჩაასხა შიგ წყალი განსაბანად,

³¹და განიბანდნენ მასში მოსე და აარონი და მისი ძეები ხელებსა და ფეხებს.

³²საკრებულო კარავში შესვლისას, ან სამსხვერპლოსთან მიახლოებისას განიბანებოდნენ ისინი, როგორც ნაბრძანები ჰქონდა უფალს მოსესთვის.

³³და მოაწყო ეზო სავანესა და სამსხვერპლოს ირგვლივ, და ჩამოჰკიდა ფარდა ეზოს კარიბჭეზე. და დაასრულა მოსემ საქმე.

³⁴დაფარა ღრუბელმა საკრებულო კარავი, და უფლის დიდებამ აავსო სავანე.

³⁵ვერ შევიდა მოსე საკრებულო კარავში, რადგან დაივანა მასზე ღრუბელმა და უფლის დიდებამ აავსო სავანე.

³⁶როცა ასცილდებოდა სავანეს ღრუბელი, მაშინ აიყრებოდნენ ხოლმე ისრაელიანები სამგზავროდ.

³⁷და თუ არ ასცილდებოდა ღრუბელი, არ აიყრებოდნენ იმ დღემდე, ვიდრე არ ასცილდებოდა.