Read სბს–2013 იობი 10 Bible Online

იობი 10 - სბს–2013 bible

იობი 10

¹შესძაგდა ჩემს სულს სიცოცხლე. გასაქანს მივცემ ჩემს წუხილს, ვილაპარაკებ ჩემი სულის სიმწარით,

²ვეტყვი ღმერთს: ‘ნუ გამამტყუნებ, გამაგებინე, რისთვის მედავები?

³კარგია, რომ თრგუნავ, რომ მოიძულე შენს ხელთა ქმნილება და ურჯულოთა ზრახვას სინათლეს ჰფენ?

⁴ნუთუ შენც ხორციელი თვალები გაქვს? ნუთუ შენც ადამიანივით იყურები?

⁵ნუთუ შენი დღეები ადამიანის დღეებივითაა? ნუთუ კაცის დღეებივითაა შენი წლები,

⁶ჩემს ბრალს რომ ეძებ და ჩემს ცოდვას იკვლევ?

⁷თუმცა იცი, რომ დამნაშავე არა ვარ, და არავინაა შენი ხელიდან ჩემი დამხსნელი.

⁸შენმა ხელებმა გამომსახეს და შემქმნეს მე ერთიანად, ყოველმხრივ, და შენვე მანადგურებ?

⁹აბა, გაიხსენე, თიხასავით რომ შემქმენი, და ისევ მტვრად მაქცევ?

¹⁰განა რძესავით არ გადმომღვარე და ყველივით არ შემადედე?

¹¹ტყავით და ხორცით შემმოსე, ძვლებითა და ძარღვებით მომქსოვე,

¹²სიცოცხლე და წყალობა მოავლინე ჩემზე და შენმა ზრუნვამ შეინარჩუნა ჩემი სული.

¹³მაგრამ ეს გქონდა გულში დაფარული, ვიცი, რომ ეს იყო შენი მიზანი.

¹⁴რომ შეგცოდო, შენ დამიდარაჯდები და არ მომიტევებ დანაშაულს.

¹⁵თუ დამნაშავე ვარ, ვაი ჩემს თავს! თუ მართალი ვარ, თავი ვერ ამიწევია! რადგან სავსე ვარ შერცხვენით. შეხედე ჩემს სივაგლახეს.

¹⁶წამოვიწევი და ლომივით ნადირობ ჩემზე, და კვლავ სასწაულებს ახდენ ჩემზე,

¹⁷ახალ-ახალი მოწმეები გამოგყავს ჩემს წინააღმდეგ და აძლიერებ შენს რისხვას ჩემზე. ახალ-ახალი ჯარები ენაცვლებიან ერთმანეთს ჩემს წინააღმდეგ.

¹⁸დედის საშოდან რისთვის გამომიყვანე? მოვმკვდარიყავი, რომ არავის თვალს არ ვეხილე.

¹⁹ვყოფილიყავი, როგორც არყოფილი, საშოდან საფლავში ჩავსულიყავი.

²⁰განა მცირე არაა ჩემი დღეები? მომეშვი, რომ ცოტათი მაინც დავმშვიდდე,

²¹სანამ წავიდოდე უკანმოუქცევლად ბნელეთისა და წყვდიადის ქვეყანაში,

²²წყვდიადის ქვეყანაში, სიკვდილის აჩრდილის წყვდიადში, სადაც ქაოსია, და სადაც ნათელი წყვდიადს ემსგავსება.’“