Read სბს–2013 იობი 15 Bible Online

იობი 15 - სბს–2013 bible

იობი 15

¹მიუგო ელიფაზ თემანელმა და თქვა:

²„განა თავქარიანად უნდა პასუხობდეს ბრძენკაცი? განა აღმოსავლეთის ქარით უნდა ივსებდეს მუცელს?

³უსარგებლო მსჯელობით და სიტყვებით უნდა დაობდეს, რომლებშიც არავითარი სიკეთე არ არის?

⁴შენ აქარწყლებ ღვთისმოშიშებას, და აბრკოლებ ლოცვას ღმერთის წინაშე,

⁵რადგან შენი უკეთურება წვრთნის შენს ბაგეს და ცბიერთა ენა აგირჩევია.

⁶შენივე პირი გამტყუნებს, მე კი არა, და შენი ბაგენი მოწმობენ შენს წინააღმდეგ.

⁷პირველშობილი ხომ არა ხარ კაცთა შორის, ბორცვებზე უწინარეს ხომ არ შექმნილხარ?

⁸ღვთის საიდუმლო ხომ არ მოგისმენია და სიბრძნე ხომ არ მოგიხვეჭია?

⁹ისეთი რა იცი, ჩვენ რომ არ ვიცოდეთ? რას ხვდები ისეთს, ჩვენ რომ ვერ მივმხვდარვართ?

¹⁰ჩვენს შორის თმაჭაღარაც არის და მოხუცებულიც, მამაშენს რომ აღემატება დღეებით.

¹¹მცირეა შენთვის ღვთის ნუგეში და თვინიერი სიტყვა, შენთან მოუბარი?

¹²სხვაგან რად მიგიწევს გული, და რად ახამხამებ თვალებს?

¹³ღმერთის წინააღმდეგ რომ მიმართავ შენს სულს და ასეთი სიტყვები ამოგდის პირიდან?

¹⁴რა არის კაცი, რომ სუფთა იყოს, ან მართალი იყოს ქალის ნაშობი?

¹⁵აჰა, თავისი წმიდებსაც არ ერწმუნება იგი, და მის თვალში ზეცაც კი არ არის სუფთა,

¹⁶მეტადრე საძაგელი და გახრწნილია კაცი, წყალივით რომ სვამს უკეთურებას!

¹⁷გეტყვი და მომისმინე, ნანახს მოგიყვები,

¹⁸რაც ბრძენკაცებს სმენიათ და რაც არ დაუმალავთ მათთვის მამებს.

¹⁹მათ, მხოლოდ მათ მიეცათ ქვეყანა, და არ გაუვლია უცხოს მათ შორის.

²⁰იტანჯება ურჯულო მთელი თავისი დღე და მოსწრება, და წელთა რიცხვი დაფარულია მტარვალისათვის,

²¹შიშის ზარია მათ ყურებში, მშვიდობის დროსაც მათ ესხმის დამღუპველი.

²²არ სწამთ მათ, რომ წყვდიადიდან დაბრუნდებიან, განწირულნი არიან მახვილისათვის.

²³დაწანწალებენ ლუკმაპურისთვის, მაგრამ სად არის? იციან, რომ შავი დღე შერჩებათ ხელში.

²⁴აძრწუნებთ მათ ვიწროება და გასაჭირი, სჯაბნიან მათ, მსგავსად საომრად გასული მეფისა.

²⁵რადგან ღვთის წინააღმდეგ აღმართეს ხელი და ყოვლადძლიერს აუჯანყდნენ.

²⁶უტევდნენ მას ჯიუტად, თავისიანთი სქელკოპებიანი ფარით,

²⁷რადგან ქონით დაიფარეს სახე და ქონი მოიდეს თეძოებზე.

²⁸იცხოვრებენ აოხრებულ ქალაქებში, მიტოვებულ სახლებში, რომლებიც დასანგრევადაა განწირული.

²⁹ვერ გამდიდრდებიან და ვერ გაძლებს მათი დოვლათი, და ფესვს ვერ გაიდგამს მიწაში მათი მონაპოვარი.

³⁰ვერ გაექცევიან წყვდიადს, ალი დააჭკნობს მათ ყლორტებს, და მათ ყვავილს ქარი წაიღებს.

³¹ნუ ირწმუნებენ ამაოებას ისინი, თავს ნუ მოიტყუებენ, რადგან ამაოება იქნება მათი საზღაური.

³²უდროოდ გათავდებიან და მათი ტოტები ვერ ამწვანდება.

³³ჩამოიბერტყავენ ვაზივით შემჭკნარ ისრიმს, და ზეთისხილივით, ყვავილს რომ ჩამოყრის,

³⁴რადგან ბერწია უღვთოთა კრებული, და ცეცხლი შეჭამს მექრთამეთა კარვებს.

³⁵მუცლად იღებენ სალმობას და შობენ სიავეს და მათი გული ამზადებს სიცრუეს.“