Read სბს–2013 იობი 16 Bible Online

იობი 16 - სბს–2013 bible

იობი 16

¹და მიუგო იობმა და თქვა:

²„ამისთანები ბევრი მსმენია, ამაო ნუგეშისმცემელნი ხართ თქვენ ყველანი!

³ნეტა მოეღება ბოლო ქარივით სიტყვებს? რა გაიძულებს ასეთ ლაპარაკს?

⁴მეც შემეძლო თქვენსავით მელაპარაკა, ჩემს ადგილზე თქვენ რომ ყოფილიყავით. თავს მოვუყრიდი სიტყვებს თქვენს წინააღმდეგ, და თავის ქნევას დავიწყებდი,

⁵გაგამხნევებდით ჩემი პირით, და ჩემს ბაგეთა მოძრაობა დაგიამებდათ ტკივილს.

⁶თუ ვილაპარაკებ, ტკივილი არ დამიამდება, თუ დავდუმდები, განა გამშორდება?

⁷მაგრამ ახლა მან სრულიად დამქანცა. მან გაანადგურა მთელი ჩემი ახლობლები.

⁸გამიჩინა ნაოჭები, რომლებიც მოწმობენ ჩემს წინააღმდეგ, წამოიმართა ჩემს წინააღმდეგ ჩემი სიმჭლევე, და იგი მოწმობს ჩემს წინააღმდეგ.

⁹რისხვით დამფლითა და შემიძულა, კბილებს მიღრჭენს, ჩემი მტერი თვალებს აკვესებს ჩემზე,

¹⁰პირი აქვთ ჩემზე დაღრენილი, მაგინებენ და სახეში მცემენ, ერთად შეითქვნენ ჩემს წინააღმდეგ.

¹¹მიმცა მე ღმერთმა უსამართლოებს, და ურჯულოთა ხელში ჩამაგდო.

¹²მშვიდად ვიყავი და დამამსხვრია; ჩამავლო კისერში ხელი და გადამამტვრია, და თავის სამიზნედ დამსვა.

¹³გარს მეხვევიან მისი მოისრები. ის სერავს ჩემს თირკმელებს და არ მიბრალებს, ანთხევს ჩემს ნაღველს მიწაზე.

¹⁴ლეწვით მლეწავს და მლეწავს, მეომარივით მეკვეთება.

¹⁵ძაძა გადავიკერე კანზე და მიწის მტვერში ამოვიგანგლე რქა.

¹⁶სახე ალეწილი მაქვს ტირილისაგან და სიკვდილის აჩრდილია ჩემს წამწამებზე.

¹⁷თუმცა არაა ძალადობა ჩემს ხელებში და ჩემი ლოცვაც წმიდაა.

¹⁸მიწავ, ნუ დაფარავ ჩემს სისხლს, და ნუ იქნება დაფარული ჩემი მოთქმა.

¹⁹ახლა კი, აჰა, ცაშია ჩემი მოწმე, ჩემი ქომაგი მაღალთა შინაა.

²⁰ჩემი მეგობრები ჩემი მკიცხველები არიან, ღვთის მიმართ ღვრიან ჩემი თვალები ცრემლს,

²¹რათა განსაჯოს მან კაცსა და ღმერთს შორის, როგორც ადამიანსა და მის მოყვასს შორის,

²²რადგან რამდენიმე წელიწადში გათავდება ჩემს წელთა რიცხვი და დავდგები უკანმოუქცეველ გზაზე.