Read სბს–2013 იობი 17 Bible Online

იობი 17 - სბს–2013 bible

იობი 17

¹სული შემემუსრა, ჩამიქრა დღეები, გათხრილია საფლავი ჩემთვის.

²გარს მახვევიან მქირდავნი! ჩემი თვალები მათი შემოტევისგან ღამეს თეთრად ათენებენ.

³მომხედე, შენვე გამიწიე თავდებობა შენს წინაშე. სხვა ვინ დამიდგება თავდებად?

⁴შენ დახურე მათი გული გონიერებისთვის, და ამიტომაც არ გაამარჯვებინებ მათ.

⁵ვინც მეგობრებს ასმენს ანგარებით, მის შვილებს თვალები დაევსებათ.

⁶ხალხის საიგავოდ გამხადა, და მათ დასაცინად ვიქეცი.

⁷თვალთ დამიბნელდა დარდისაგან, და აჩრდილს დაემსგავსნენ ჩემი სხეულის ასოები.

⁸განცვიფრდებიან ამის გამო წრფელნი, და მართალი ურჯულოზე აღდგება.

⁹მართალი განაგრძობს თავის გზას, და ხელწმიდა კაცი უფრო განმტკიცდება.

¹⁰თქვენ კი, მობრუნდით, მოდით ყველანი, ბრძენს მაინც ვერ ვიპოვი თქვენს შორის.

¹¹ჩემმა დღეებმა განვლეს, ჩაიფუშა ჩემი ზრახვები – ჩემი გულის ფიქრები.

¹²ისინი ღამეს დღედ აქცევენ, ამბობენ: ‘ახლოა ნათელი ბნელთან.’

¹³თუ ველი შავეთს, როგორც ჩემს სახლს, თუ ბნელში დავაგე ჩემი ლოგინი,

¹⁴თუ ჩავძახი საფლავს: ‘შენ მამა ხარ ჩემი!’ ჭიას ვეუბნები: ‘ჩემი დედა ხარ და ჩემი და ხარ!’

¹⁵მაშინ სადღაა ჩემი სასოება? ვინღა იხილავს ჩემს სასოებას?

¹⁶თან ჩამომყვება ის შავეთში? ერთად ჩავალთ მიწაში?“