Read სბს–2013 იობი 18 Bible Online

იობი 18 - სბს–2013 bible

იობი 18

¹მაშინ მიუგო ბილდად შუხელმა და თქვა:

²„როდემდე ინადირებთ სიტყვებზე? დაფიქრდი და მერე ვილაპარაკოთ.

³რატომ გვთვლი პირუტყვებად და გონებაჩლუნგებად?

⁴საკუთარმა რისხვამ გსურს დაგფლითოს? შენი გულისთვის ხომ არ იქნება მიტოვებული მიწა, და დაიძრება კლდე თავისი ადგილიდან?

⁵ურჯულოთა ნათელი იშრიტება და არ ელვარებს ალი მათი ცეცხლისა.

⁶მათ კარავში ნათელი ბნელდება და მათი სანთელი მათ თავზე ქრება.

⁷მოკლდება მათი ძლიერების ნაბიჯები, და საკუთარი რჩევა ამხობს მათ,

⁸რადგან ფეხებით ბადეში იხლართებიან და მახეში აბიჯებენ.

⁹მარყუჟი ქუსლით იჭერს მათ, და მახე იხელთებს მათ.

¹⁰დამალულია მიწაზე მათთვის საბელი, დაგებულია ხაფანგი მათ ბილიკზე.

¹¹ყოველი მხრიდან აფრთხობენ მათ საშინელებები, და ფეხდაფეხ მისდევენ მათ.

¹²შიმშილი ძალას აცლის, დაღუპვა მზადაა, მათ გვერდითაა.

¹³კანს უჭამთ ნაწილ-ნაწილ, ასოებს უჭამთ სიკვდილის პირმშო.

¹⁴ამოიძირკვებიან საიმედო კარვიდან, და საშინელებათა მეფესთან წაჰგვრიან მათ.

¹⁵მათ კარავში აღარაფერი რჩება, მათ საბინადროს გოგირდი გადაეყრება.

¹⁶ქვეშ ფესვები უხმებათ, მაღლიდან ტოტები უჭკნებათ.

¹⁷ქრება მათი სახსენებელი ქვეყნიდან, და სახელი აღარა აქვთ ქუჩაზე.

¹⁸განდევნილნი არიან ნათლიდან ბნელში, წუთისოფელს მოწყვეტილნი.

¹⁹არც ნაშიერი, არც შთამომავალი არ ეყოლებათ თავის ხალხს შორის. არც ნამატი დაურჩებათ საბინადროში.

²⁰მათი ბედის გამო განცვიფრდებიან დასავლეთში, და აღმოსავლეთში მყოფთ შეიპყრობს ძრწოლა.

²¹სწორედ ასეთია უღვთოთა საცხოვრებლები და ასეთია მათი ადგილი, ვინც ღმერთს არა სცნობს.“