Read სბს–2013 იობი 20 Bible Online

იობი 20 - სბს–2013 bible

იობი 20

¹მიუგო ცოფარ ნაყამათელმა და თქვა:

²„მომხედე! მაიძულებენ ჩემი ფიქრები პასუხს, და ამის გამოა, რომ ვჩქარობ;

³რადგან ჩემს შეურაცხმყოფელ შენიშვნას ვისმენ, და ჩემი გონების სული მათქმევინებს პასუხს.

⁴ხომ იცი ეს ძველთაგან, მას აქეთ, რაც ადამიანი დამკვიდრდა მიწაზე,

⁵რომ ურჯულოთა ლხენა ხანმოკლეა, და უღვთოს სიხარული – წამიერი.

⁶თუნდაც ცად ამაღლდეს მისი დიდება და მისი თავი ღრუბლებს მისწვდეს,

⁷თავისი განავალივით გაქრება სამუდამოდ, და მისი მნახველნი იკითხავენ: ‘სადაა იგი?’

⁸სიზმარივით გაფრინდება და ვერავინ იპოვის, ღამეულ ჩვენებასავით გაუჩინარდება.

⁹თვალი, მისი მნახველი, ვეღარ იხილავს მას, და ვეღარც მისი ადგილი დაინახავს მას.

¹⁰მისი ძენი ღარიბ-ღატაკთა მომადლიერებას ეცდებიან, და საკუთარი ხელით დააბრუნებენ დოვლათს.

¹¹მათი ძვლები, სავსე სიჭაბუკით, მათთან ერთად იქცევიან მტვრად.

¹²თუმცა ბოროტება ეტკბილებათ პირში და ენის ქვეშ ინახავენ,

¹³თუმცა ზოგავენ მას, არ გადმოაგდებენ და პირში იჩერებენ,

¹⁴მაინც გადაექცევათ საჭმელი სიმწარედ მუცელში, ასპიტთა შხამად მათ ნაწლავებში.

¹⁵ყლაპავენ დოვლათს, მაგრამ ამოანთხევენ, ღმერთი გამოუდევნის მათ მუცლიდან.

¹⁶ასპიტთა შხამს შეისრუტავენ, უნასის ენა მოჰკლავს მათ.

¹⁷ვერ იხილავენ ნაკადულებს, მდინარეებს, თაფლისა და ერბოს მდინარეებს.

¹⁸დააბრუნებენ ნაოფლარს და ვერ ჩაყლაპავენ. ნავაჭრის დოვლათიდან ვერ ნახავენ კმაყოფილებას.

¹⁹რადგან ჩაგრავდნენ და ივიწყებდნენ ღარიბ-ღატაკებს, სახლს ანგრევდნენ და არ აშენებდნენ.

²⁰ვინაიდან არ ასვენებდათ მუცელი, მათთის სასურველს ვერაფერს გადაარჩენენ.

²¹არაფერი მორჩენიათ შეუსანსლავი, ამიტომ ვერ გასტანს მათი კეთილდღეობა.

²²თავიანთი სისავსის სიუხვეში ვიწროდ იქნებიან, ყოველი გატანჯული ხელი მისწვდება მათ.

²³მუცელს რომ ამოიყორავენ, ღმერთი მოუვლენს მათ თავისი რისხვის ცეცხლს და აწვიმებს მათზე.

²⁴გაექცევიან რკინის იარაღს, – განგმირავს მათ ბრინჯაოს მშვილდი.

²⁵გამოიძრობენ და გამოვა მათი სხეულიდან ისარი, და ელვა გამოვა მათი ნაღველადან, თავზარი დაეცემა მათ.

²⁶სრული წყვდიადი იქნება მათი განძი. შეჭამს მათ დაუნთებელი ცეცხლი, და ეწევა სიავე მათი კარვის ნარჩენებს.

²⁷გააცხადებს ზეცა მათ დანაშაულს და მიწა აღდგება მათ წინააღმდეგ.

²⁸მათი სახლის დოვლათი გადაივლის და წაილეკება მისი რისხვის დღეს.

²⁹ეს არის წილი ურჯულო კაცისა, ხვედრი, ღმერთის მიერ ნაბრძანები.“