Read სბს–2013 იობი 24 Bible Online

იობი 24 - სბს–2013 bible

იობი 24

¹რატომ არ ადგენს ყოვლადძლიერი სამსჯავრო ვადებს ცოდვილთათვის, და მისი მცოდნენი რატომ ვერ ხედავენ მის დღეებს?

²ურჯულონი საზღვრებს ანაცვლებენ, იტაცებენ ფარებს და მწყემსავენ მათ.

³ობოლთა სახედრებს ერეკებიან, ქვრივის ხარი გირაოში მიჰყავთ;

⁴გაჭირვებულს გზიდან აგდებენ, და იმალებიან ქვეყნის ღარიბნი.

⁵როგორც უდაბნოში კანჯრები, მძიმედ შრომობენ, საკვებს ეძებენ ტრამალში თავიანთი ბავშვებისათვის.

⁶სხვის ყანაში მკიან და ურჯულოს ვენახს იმცვრევენ.

⁷შიშვლად ათევენ, უმოსასხამოდ და არა აქვთ დასაფარებელი ყინვაში.

⁸მთების თქეშში ილუმპებიან, და შესაფარებლად კლდეს ეკვრიან.

⁹ძუძუს სწყვეტენ ობოლს, და მიჰყავთ ღარიბისაგან გირაოდ.

¹⁰შიშველნი დაწანწალებენ უსამოსოდ, და დამშეულნი ძნებს მიათრევენ.

¹¹მათ კედლებში ზეითუნის ზეთს ხდიან, საწნახლებში წურავენ ყურძენს, თავად კი სწყურიათ.

¹²ქალაქიდან მომაკვდავნი გმინავენ და დაჭრილთა სულები შველას ითხოვენ, ღმერთი კი ყურს არ უგდებს მათ ვედრებას.

¹³არიან ნათლის წინააღმდეგ მეამბოხენი, რომლებიც არ ცნობენ მის გზებს და არ დგანან მის გზაზე.

¹⁴განთიადზე დგება მკვლელი, კლავს ღარიბსა და გლახაკს, ღამით კი ქურდობს.

¹⁵მრუშის თვალი ბინდის მოლოდინში ამბობს: ‘კაცის თვალი ვერ მიხილავს.’ და სახეზე საფარველს იფარებს.

¹⁶ბნელში ძირს უთხრიან სახლებს, დღისით კი თავისთვის იკეტებიან, არ იციან ნათელი,

¹⁷რადგან წყვდიადი მათთვის დილაა, რადგან შეუამხანაგდნენ წყვდიადის საშინელებებს.

¹⁸მსუბუქნი არიან ისინი წყლის ზედაპირზე, დაწყევლილია მათი ხვედრი მიწაზე, მუშაკი არ გაუხვევს მათი ვენახებისკენ.

¹⁹გვალვა და ხორშაკი შთანთქავს თოვლის წყალს, შავეთი კი – ცოდვილებს.

²⁰დაივიწყებს მათ დედის საშო; ჭია შეჭამს მათ, აღარავის გაახსენდებიან, ასე ხესავით გადატყდება უკეთურება.

²¹ისინი ბოროტად ექცევიან ბერწ ქალს, უშვილოს, და ქვრივს სიკეთეს არ უკეთებენ.

²²ღმერთი სიცოცხლეს უხანგრძლივებს ძლიერთ თავისი ძალით, წამოდგებიან, თუმცა იმედი გადაწურული ჰქონდათ.

²³იგი აძლევს მათ სიმშვიდეს და აქვთ საყრდენი, და თვალი მათ გზებზე უჭირავს.

²⁴მცირე ხნით აღზევდებიან და აჰა, აღარ არიან. დამდაბლდებიან, დაეცემიან, როგორც ყველანი, და თავთავივით მოიკვეთებიან.

²⁵ასე არ არის? ვინ გამამტყუნებს და ვინ გამიბათილებს სიტყვას?“