Read სბს–2013 იობი 26 Bible Online

იობი 26 - სბს–2013 bible

იობი 26

¹მაშინ მიუგო იობმა და თქვა:

²„როგორ შეეწიე უძლურს! როგორ იხსენი უმწეო მკლავი!

³როგორ დაარიგე სიბრძნეს მოკლებული! რამდენი სიბრძნე გისწავლებია!

⁴ვინ გათქვევინა ეს სიტყვები, და ვისი სული გამოდიოდა შენგან?

⁵ლანდები ძრწიან ქვეშეთში, წყალნი და მისი მკვიდრნი.

⁶გაშიშვლებულია შავეთი ღმერთის წინაშე და არა აქვს საფარველი აბადონს.

⁷მან განავრცო ჩრდილოეთი სიცარიელეზე, არარაობაზე დაჰკიდა დედამიწა.

⁸იგი კრავს წყლებს თავის ღრუბლებში, და არ სკდება ღრუბელი მათ ქვეშ.

⁹იგი უბურავს სავსე მთვარეს პირს, თავისი ღრუბელი მასზე განართხო.

¹⁰წყლის ზედაპირზე წრე შემოავლო ნათლისა და ბნელის საზღვრამდე.

¹¹ცის სვეტები ირყევიან და ძრწიან მის რისხვაზე.

¹²თავისი ძალით დააცხრო ზღვა და თავისი გონებით შემუსრა რაჰაბი.

¹³მისი სულით ცა გამშვენიერდა, მისმა ხელმა განგმირა გაქცეული გველი.

¹⁴აჰა, ესენია მისი გზების კიდენი. და რა მცირე ჩურჩული გვესმის მასზე! ვინ შეიცნობს მისი ძლიერების გრგვინვას?“