Read სბს–2013 იობი 29 Bible Online

იობი 29 - სბს–2013 bible

იობი 29

¹და განაგრძო იობმა თავისი სათქმელი და თქვა:

²„ნეტავ ისე ვიყო, როგორც წარსულ თვეებში, როგორც იმ დღეებში, როცა მიცავდა ღმერთი;

³როცა მისი ლამპარი თავს დამნათოდა, და მის შუქზე ბნელში ვიკვლევდი გზას.

⁴როგორც ვიყავი ჩემი შემოდგომის დღეებში, როცა ღვთის მეგობრობა ადგა ჩემს კარავს;

⁵როცა ჯერ კიდევ ჩემთან იყო ყოვლადძლიერი, და გარს ჩემი შვილები მეხვივნენ;

⁶როცა ჩემს ტერფებს რძეში ვიბანდი, და კლდე ღვარად ადენდა ჩემთვის ზეთის ნაკადებს;

⁷როდესაც გავდიოდი ქალაქის კარიბჭესთან, ვემზადებოდი მოედანზე დასაჯდომად,

⁸დამინახავდნენ ჭაბუკები და იმალებოდნენ, ხოლო მოხუცები წამოდგებოდნენ და ფეხზე იდგნენ;

⁹მთავარნი თავს იკავებდნენ სიტყვის თქმისაგან და პირზე ხელს იფარებდნენ;

¹⁰დიდებულებს ხმა უწყდებოდათ და სასაზე ეკვროდათ ენა.

¹¹ყური მისმენდა და ნეტარად მრაცხდა, თვალი მხედავდა და მემოწმებოდა,

¹²რადგან ვიხსნიდი ღატაკს, შველას რომ ითხოვდა, და ობოლს, შემწე რომ არ ჰყავდა.

¹³კურთხევა განწირულისა ჩემზე მოდიოდა, და ქვრივის გულს ვახარებდი.

¹⁴სიმართლით შევიმოსე და მან შემმოსა; მოსასხამივით და თავსაკვრელივით იყო ჩემი სამართალი.

¹⁵ბრმისათვის თვალები ვიყავი, და კოჭლისთვის – ფეხები;

¹⁶გლახაკისთვის მამა ვიყავი; და ჩემთვის უცნობი საქმეს ვიძიებდი.

¹⁷უკეთური კაცისთვის ყბები დამილეწავს, და მოტაცებული კბილებიდან გამომიგლეჯია.

¹⁸მაშინ ვფიქრობდი: ‘ჩემს საბუდარში მოვკვდები და ქვიშასავით იმრავლებენ ჩემი დღეები.

¹⁹ჩემი ფესვი გადგმულია წყლებისაკენ და ცვარი ათევს ღამეს ჩემს რტოებზე.

²⁰ჩემი დიდება კვლავ აღდგება და ხელში მშვილდი განმიახლდება.’

²¹მისმენდნენ და მელოდნენ, და ჩემს რჩევაზე დუმდნენ;

²²ჩემი სიტყვის შემდეგ აღარაფერს ამბობდნენ, და მათზე ეწვეთებოდა ჩემი ნათქვამი;

²³წვიმასავით მელოდნენ, და როგორც გაზაფხულის წვიმას, პირს მიშვერდნენ;

²⁴გავუღიმებდი და არ სჯეროდათ, და ჩემი სახის ნათელი არ მოუქუფრავთ.

²⁵გზას ვურჩევდი მათ და მთავრად ვიჯექი; და ვიყავი, როგორც მეფე ლაშქარში, როგორც მგლოვიარეთა ნუგეშისმცემელი!