Read სბს–2013 იობი 3 Bible Online

იობი 3 - სბს–2013 bible

იობი 3

¹ამის შემდგომ გახსნა იობმა ბაგე და დაწყევლა თავისი გაჩენის დღე.

²და თქვა იობმა:

³„დაიქცეს ის დღე, მე რომ დავიბადე, და ის ღამე, მე რომ ჩავისახე!

⁴დაე, დაბნელდეს ის დღე, აღარ მოხედოს მას ღმერთმა ზეგარდმო და აღარ ინათოს მასზე ნათელმა!

⁵სიკვდილის ბნელმა და წყვდიადმა მოიცვას ის, ღრუბლებმა დაფარონ, შეაძრწუნოს ის დღის სიშავემ!

⁶დაე, უკუნეთმა შთანთქას ის ღამე, არ ჩაითვალოს წლის დღეთა შორის; და, არც თვეთა რიცხვში აღარ ითვლებოდეს!

⁷აჰა, გაბერწდეს ის ღამე, აღარ ისმოდეს მხიარული შეძახილები.

⁸დღის მაწყევრებმა დაწყევლონ იგი, მათ, რომელთაც ძალუძთ ლევიათანის გამოღვიძება!

⁹დაე, დაბნელდნენ მისი განთიადის ვარსკვლავები, ელოდოს ნათელს და არ ჩანდეს, და ვერ იხილოს სხივი ცისკრისა.

¹⁰რადგან დედაჩემის საშოშივე არ ჩამიკეტა მან კარი, და არ განმარიდა ამ სატანჯველს.

¹¹რატომ არ მოვკვდი გაჩენისთანავე, მუცლიდან გამოსვლისთანავე რად არ გავთავდი?

¹²რატომ მიმიღეს მე მუხლებმა, და რად მაწოვეს ძუძუ?

¹³მაშინ ხომ ვიწვებოდი დამშვიდებული, მოსვენებული ვიქნებოდი ძილში,

¹⁴ქვეყნიერების მეფეებთან და მრჩევლებთან, სასახლეებს რომ აღადგენენ თავისთვის.

¹⁵ან მთავრებთან, რომელნიც ოქროთი და ვერცხლით ივსებენ სახლებს.

¹⁶ან რატომ არ დამმარხეს და არ გადამმალეს უდღეური ჩვილივით, ნათელი რომ არ უნახავს?

¹⁷ბოროტნი იქ აღარ შფოთავენ, და მოქანცულნი განისვენებენ იქ.

¹⁸იქ მშვიდად არიან ტუსაღები და ზედამხედველთა ხმა არ ესმით მათ.

¹⁹მცირენი და დიდნი იქ არიან, და მონა თავისუფალია თავისი ბატონისაგან.

²⁰რისთვის მიეცა ტანჯულს ნათელი, და სულგამწარებულს – სიცოცხლე, –

²¹მათ, რომელნიც სიკვდილს ნატრობენ და ვერ პოულობენ, თუმცა დამარხულ განძზე მეტად ეძებენ,

²²რომელნიც უზომოდ გახარებულნი და აღტაცებულნი არიან საფლავის პოვნით?

²³რისთვის მიეცა ნათელი იმ კაცს, ვისი გზაც დაფარულია და რომელიც ყველმხრივ შებორკა ღმერთმა?

²⁴რადგან ოხვრა მქცევია საზრდოდ, და ჩემი ქვითინი წყალივით იღვრება.

²⁵რადგან მეწია შიში, რომელიც მზარავდა, და რაც მაძრწუნებდა, ის დამემართა.

²⁶აღარ მაქვს სიმშვიდე, აღარც შვება, არც მოსვენება, – მხოლოდ ვაება.“