Read სბს–2013 იობი 32 Bible Online

იობი 32 - სბს–2013 bible

იობი 32

¹და შეწყვიტა სამმა კაცმა იობისათვის პასუხის გაცემა, რადგან მართალი იყო იგი თავის თვალში.

²მაშინ განრისხდა ელიჰუ, ბუზელი ბარაქელის ძე, რამის საგვარეულოდან. განრისხდა იობზე იმის გამო, რომ მან თავი ღმერთზე მართლად ჩათვალა.

³ხოლო თავის სამ მეგობარზე ის იმის გამო განრისხდა, რომ თუმცა საპასუხო ვერ უპოვნეს, მაგრამ მაინც იობი გაამტყუნეს.

⁴ელიჰუ იცდიდა, რომ იობს დალაპარაკებოდა, რადგან ყველანი მასზე უფროსები იყვნენ წლებით.

⁵რაკი დაინახა ელიჰუმ, რომ ამ სამი კაცის პირს პასუხი არ ჰქონდა, განრისხდა.

⁶და მიმართა ელიჰუმ, ბუზელი ბარაქელის ძემ, და უთხრა: „წლებით მე უმცროსი ვარ, თქვენ კი მოხუცებულნი; ამიტომ მერიდებოდა და მეშინოდა, რომ ჩემი აზრი თქვენთვის მომეხსენებინა.

⁷მე ვთქვი: დღეებმა უნდა ილაპარაკონ და სიბრძნე წელთა სიმრავლემ უნდა ასწავლოს-მეთქი.

⁸მაგრამ კაცში იმყოფება სული, და სუნთქვა ყოვლადძლიერისა მას აგონიერებს.

⁹დღეგრძელნი ყოველთვის როდი არიან ბრძენნი, და მხოლოდ უხუცესნი როდი ხვდებიან სამართალს.

¹⁰ამიტომ ვამბობ: მისმინეთ, რათა მეც ვთქვა ჩემი აზრი.

¹¹ვუცდიდი მე თქვენს სიტყვებს, ყურს ვუგდებდი თქვენს მსჯელობას, როცა სათქმელს ეძებდით.

¹²გაკვირდებოდით თქვენ, და აჰა, არ იყო თქვენს შორის მამხილებელი, პასუხი რომ მიეგო იობისთვის.

¹³ნუ იტყვით: ‘სიბრძნე ვიპოვეთ, ღმერთი მოიგერიებს მას და არა კაცი.’

¹⁴არ მოუმართავს მას ჩემს წინააღმდეგ სიტყვები, და არც მე მივმართავ მას თქვენი სიტყვებით.

¹⁵სასო წარეკვეთათ, ვეღარ უპასუხეს, დაელიათ სიტყვები;

¹⁶უნდა ველოდო, რადგან შეწყვიტეს ლაპარაკი, რაკი დადგნენ და აღარ პასუხობენ?

¹⁷გავცემ მეც ჩემს წილ პასუხს, მეც გამოვთქვამ ჩემს აზრს.

¹⁸რადგან სავსე ვარ სიტყვებით, სული შიგნიდან მაწვება.

¹⁹აჰა, ჩემი შინაგანი მაჭარივითაა, რომელსაც თავი დაუცეს და ხეთქავს ახალ ტიკს.

²⁰ვილაპარაკებ, რომ სული მოვითქვა: გავხსნი ბაგეებს და ვუპასუხებ.

²¹პირფერობას არ დავუწყებ კაცს, და ადამიანს არ ვემლიქვნელები.

²²რადგან მე მლიქვნელობა არ ვიცი – უმალ ჩემმა გამჩენმა წამიყვანოს!