Read სბს–2013 იობი 33 Bible Online

იობი 33 - სბს–2013 bible

იობი 33

¹ახლა კი ისმინე, იობ, ჩემი ნათქვამი და ყური მიუგდე ჩემს ყოველ სიტყვას.

²აჰა, ვხსნი ბაგეებს, ლაპარაკობს ჩემი ენა ჩემს სასაში.

³ჩემი გულის სიწრფოებაა ჩემი სიტყვები, ჩემს ბაგეთა ცოდნას ნათლად გადმოსცემენ ისინი.

⁴ღვთის სულმა შემქმნა და ყოვლადძლიერის სუნთქვა მასულდგმულებს.

⁵თუ შეგიძლია, მიპასუხე: დაალაგე სიტყვები და დაიცავი თავი.

⁶აჰა, მეც შენისთანა ვყავარ ღმერთს, მეც თიხისგან ვარ გამოძერწილი.

⁷აჰა, ჩემმა შიშმა არ უნდა შეგაძრწუნოს, და არც ჩემმა ხელმა უნდა დაგამძიმოს.

⁸აკი ასმენდი შენ ჩემს ყურს და მე გავიგონე შენი სიტყვების ხმა:

⁹‘სუფთა ვარ მე და უცოდველი, უმწიკვლო ვარ და არა მაქვს ბრალი.

¹⁰აჰა, საბაბი მინახა, თავის მტრად შემრაცხა.

¹¹ხუნდებში მაყოფინებს ფეხებს, და ჩემს ყოველ გზას უთვალთვალებს!’

¹²აი, ამაში არა ხარ მართალი, მე გპასუხობ, რომ კაცზე დიდია ღმერთი.

¹³რად ედავები მას? ის პასუხს არ აგებს თავის ნამოქმედარზე.

¹⁴ერთხელ იტყვის ღმერთი, და, თუ ვერავინ შენიშნა, მეორედაც.

¹⁵სიზმარში, ღამეულ ხილვაში, როცა ადამიანებს ძილქუში ეცემათ, როცა თავიანთ საწოლზე თვლემენ,

¹⁶მაშინ ხსნის იგი ადამიანთა ყურს და ბეჭედს უსვამს მათთვის შეგონებას,

¹⁷რომ აარიდოს ადამიანი უკეთურ საქმეს, და დაიფაროს კაცი ამპარტავნებისაგან;

¹⁸რომ იხსნას მისი სული შავეთისაგან, და მისი სიცოცხლე – მახვილით დაღუპვისაგან.

¹⁹კაცი სატკივრით ისჯება თავის საწოლზე, დაუამებელი ტკივილით მისი ძვლებისა;

²⁰შესძაგდება მის სიცოცხლის პური და მის სულს – საყვარელი საჭმელი.

²¹გაქრება მისი ხორცი, უხილავი გახდება, და ამოასხდებიან ძვლები, რომელნიც არ ჩანდნენ.

²²და მიაწევს მისი სული ხარომდე და მისი სიცოცხლე – სიკვდილის წლებამდე.

²³მაშინ, თუ ჰყავს მას მეოხი ანგელოზი, ათასში ერთი, რომ განაცხადოს ადამიანის სიალალმართლე,

²⁴შეიწყალებს მას და იტყვის: ‘იხსენი იგი, დაიფარე იგი საფლავში ჩასვლისაგან. მისთვის ნაპოვნი მაქვს გამოსასყიდი!’

²⁵მაშინ მისი ხორცი სიჭაბუკის დროინდელზე მეტად განახლდება, მისი სიყმაწვილის დღეები დაუბრუნდება.

²⁶ილოცებს ღმერთის მიმართ და ისიც შეიწყალებს, და სიხარულით შეხედავს მის სახეს, და დაუბრუნებს კაცს მის სიმართლეს.

²⁷იგი იმღერებს კაცთა წინაშე და იტყვის: ‘ვცოდე მე და სწორი გავამრუდე, მაგრამ არ მომეგო საკადრისად.

²⁸მან გამოისყიდა ჩემი სული ხაროში ჩასვლისგან, და ჩემი სიცოცხლე ნათელს იხილავს,’

²⁹აჰა, ყოველივე ამას ღმერთი ორგზის, სამგზის უკეთებს ადამიანს,

³⁰რათა დააბრუნოს მისი სული ხაროდან, და გაანათლოს სიცოცხლის ნათელით.

³¹გამიგონე, იობ, ისმინე ჩემი, დადუმდი და მე ვილაპარაკებ.

³²თუ სათქმელი გაქვს, მიპასუხე, ილაპარაკე, რადგან შენი გამართლება მწადია;

³³თუ არა და, ისმინე ჩემი, დადუმდი, და მე გასწავლი სიბრძნეს.“