Read სბს–2013 იობი 35 Bible Online

იობი 35 - სბს–2013 bible

იობი 35

¹განაგრძო ელიჰუმ და თქვა:

²„ნუთუ სამართლიანად მიგაჩნია, რომ ამბობ: ‘ღმერთზე მართალი ვარ?’

³რომ ამბობ: ‘რას მარგებს, რას მომიტანს ჩემი უცოდველობა?’

⁴მე გიპასუხებ შენ და შენს მეგობრებსაც, შენთან ერთად რომ არიან:

⁵ახედე ზეცას და იხილე, შეხედე ღრუბლებს – ისინი შენზე მაღლაა.

⁶თუ შენ შესცოდე, რას დაუშავებ ამით მას? თუ შენს დანაშაულს გაამრავლებ, ამით რას უზამ მას?

⁷თუ შენ მართალი ხარ, რას შემატებ მას? ან რას მიიღებს შენი ხელიდან?

⁸მხოლოდ შენისთანა კაცზე მოქმედებს შენი უკეთურება, და ადამის ძეზე – შენი სიმართლე.

⁹ბევრი ჩაგვრისაგან ღაღადებს ხალხი, შველას ითხოვენ ძლიერის მკლავიდან.

¹⁰და არავინ ამბობს: ‘სად არის ღმერთი, ჩემი გამჩენი, ძალის მომძღვნელი ღამით,

¹¹რომელიც გვწვრთნის ჩვენ მიწის მხეცებზე მეტად, და განგვაბრძნობს ჩვენ ცის ფრინველებზე მეტად?’

¹²ღაღადებენ იქ ისინი და ის პასუხს არ სცემს, ავკაცთა ამპარტავნების გამო.

¹³ნამდვილად, ამაო ღაღადს არ შეისმენს ღმერთი და ყოვლადძლიერი არ მოხედავს მას.

¹⁴თუმცა შენ ამბობ, რომ ვერ ხედავ მას, მაგრამ საკითხი მის წინაშეა, დაელოდე მას.

¹⁵და ახლა, რაკი მისი რისხვა არ სჯის, და ყურადღებას არ აქცევს სისულელეს,

¹⁶ამაოდ ხსნის ბაგეს იობი, და უაზროდ ხარჯავს სიტყვებს.“