Read სბს–2013 იობი 37 Bible Online

იობი 37 - სბს–2013 bible

იობი 37

¹ესეც აძრწოლებს ჩემს გულს, და ამოვარდა თავისი ბუდიდან.

²მოსმენით ისმინეთ მისი გრგვინვის ხმა და გუგუნი, მისი პირიდან გამომავალი.

³მთელ ცისქვეშეთში აჭექებს მას და მისი ელვა ქვეყნიერების კიდეებს სწვდება.

⁴ამის შემდეგ მისი ხმა დაიჭექებს, დაიქუხებს დიდებულ ხმაზე, და არა წყვეტს ელვას, როცა ისმის მისი ხმა.

⁵გრგვინავს ღმერთი თავის საკვირველ ხმაზე, იქმს დიად საქმეებს, რომელთა შეცნობაც ჩვენ არ შეგვიძლია.

⁶რადგან თოვლს ეუბნება: ‘დაეფინე მიწას!’ და უბრძანებს წვიმის თქეშსა და ძლიერ თავსხმას.

⁷იგი ბეჭდავს ყოველი ადამიანის ხელს, რათა იცოდეს ყველა კაცმა მისი საქმენი.

⁸მხეცი საფარველში მიდის და თავის ბუნაგში ივანებს.

⁹სამხრეთიდან გამოდის გრიგალი და ჩრდილოეთიდან – ყინვა.

¹⁰ღვთის სუნთქვა იძლევა ყინულს, და წყალთა სივრცე იყინება.

¹¹იგი სინოტივით ავსებს ქუფრ ღრუბელს, ღრუბელი ფანტავს მის ელვას.

¹²ისინი იცვლიან მიმართულებას, ბრუნავენ მისი განგებით, რათა აღასრულონ ყოველი მისი ბრძანება მთელ ქვეყნიერებაზე.

¹³ან დასასჯელად, ან თავისი ქვეყნისთვის, ან წყალობისათვის გამოაჩენს მას.

¹⁴ყურად იღე ეს, იობ, დადექ და დააკვირდი ღვთის სასწაულებს.

¹⁵იცი, როგორ განაგებს მათ ღმერთი, და როგორ გამოასხივებს ელვას თავისი ღრუბლიდან?

¹⁶იცი ქუფრ ღრუბელთა განფენილობის ამბავი, და სასწაულები, რომელთაც იქმს ცოდნაში სრული?

¹⁷რა ახურებს შენს სამოსს, როცა ქვეყანა ირინდება სამხრეთის ქარში?

¹⁸შეგიძლია განფინო ცანი მასავით, მტკიცე, სარკესავით ჩამოსხმული?

¹⁹გვასწავლე, რა ვუთხრათ მას? ვერაფერს ვაწყობთ სიბნელის გამო.

²⁰მოხსენდება მას, რომ მე ვლაპარაკობ? ვინმე გაბედავს და მოინდომებს მისგან შთანთქმას?

²¹ახლა ვერავინ ხედავს ნათელს, ცათა შინა მოკაშკაშეს, მაგრამ როცა ქარი გადაივლის, გააკრიალებს მათ.

²²ჩრდილოეთიდან მოდის ოქროს ციალი. ღმერთის ირგვლივ საზარელი ბრწყინვალებაა.

²³ყოვლადძლიერი! ვერ ვწვდებით მას. დიდია ის ძალით; თავისი მსჯავრით და დიადი სიმართლეთ ის არავის ჩაგრავს.

²⁴ამიტომ ეშინიათ მისი ადამიანებს; ზედ არ უყურებს მათ, ვისაც თავი ბრძენი ჰგონია.“