Read სბს–2013 იობი 4 Bible Online

იობი 4 - სბს–2013 bible

იობი 4

¹მაშინ მიუგო ელიფაზ თემანელმა და უთხრა:

²„სიტყვა რომ შემოგბედოთ, ხომ არ აღშფოთდები? მაგრამ ვის შეუძლია ლაპარაკისგან თავის შეკავება?

³აჰა, შენ ბევრს არიგებდი ჭკუას, და დაუძლურებულ მკლავებს აღონივრებდი;

⁴შენი სიტყვა წაქცეულს ფეხზე აყენებდა და აკანკალებულ მუხლებს განამტკიცებდა.

⁵მაგრამ ახლა, – შენ დაგიდგა ჯერი და გაბეზრდი, განსაცდელი გეწია და შეძრწუნდი,

⁶განა ღვთის შიში არა გაქვს ნუგეშად და შენს გზათა სიმართლე – იმედად?

⁷გაიხსენე, განა დაღუპულა ვინმე უდანაშაულოდ, ან სადმე მართალნი თუ ამომწყდარან?

⁸რაც მე მინახავს, სიავის მხვნელნი და შფოთის მთესველნი მასვე იმკიან.

⁹ღმერთის ამოსუნთქვისაგან იღუპებიან ისინი, დაუბერავს იგი და აღგვის პირისაგან მიწისა.

¹⁰ღრიალი ლომისა წყდება და ლომის ბოკვერთ კბილები უცვდებათ.

¹¹ლომი იღუპება უნადავლოდ, და ძუ ლომის ბოკვერნი იფანტებიან.

¹²იდუმალად მეუწყა მე სიტყვა და ჩურჩული ჩამესმა ყურში.

¹³ღამეულ ხილვათა ფიქრებში გართული, როცა კაცთ ძილქუში ეცემათ,

¹⁴შიშმა და ძრწოლამ შემიპყრო, და ყველა ძვალი ამიცახცახდა.

¹⁵სახეზე სუნთქვამ გადამიქროლა და სხეულზე თმები ყალყზე დამიდგა.

¹⁶შედგა, მაგრამ ვერ გავარჩიე მისი სახე, ჩემს თვალწინ რაღაც ხატება იყო; დუმილი და აჰა, ხმა მესმა:

¹⁷შეიძლება მოკვდავი ღმერთზე მართალი იყოს? შეიძლება კაცი წმიდა იყოს თავისი შემოქმედის წინაშე?

¹⁸თავის მსახურებსაც კი არ ენდობა ის, და თავის ანგელოზებშიც კი პოულობს ნაკლს!

¹⁹რაღა ითქმის თიხის სახლებში მცხოვრებლებზე, მტვერში რომ გაუდგამთ საძირკველი, ჩრჩილივით რომ იმუსრებიან,

²⁰განთიადიდან საღამომდე ძლივს რომ ცოცხლობენ და შეუმჩნევლად იღუპებიან?

²¹აჰა, გაწყვეტილია მათი კარვის საბელი მათში, სიბრძნის გარეშე კვდებიან ისინი.