Read სბს–2013 იობი 5 Bible Online

იობი 5 - სბს–2013 bible

იობი 5

¹აწ მოუხმე; არის ვინმე, ვინც პასუხს გაგცემს? ან ანგელოზთაგან ვის მიმართავ?

²ჭეშმარიტად, უგუნურს ჯავრი ჰკლავს, და ბრიყვს შური ღუპავს.

³ვნახე უგუნური ფესვგადგმული და მყისვე დავწყევლე მისი სამკვიდრო.

⁴შორს არიან მისი შვილები ხსნისაგან, კარიბჭესთან გათელავენ, და არავინ ეყოლებათ მოსარჩლე.

⁵სამკალს დამშეულნი შეუჭამენ, ეკლებიდანაც კი ააცლიან და მწყურვალნი შთანთქავენ მათ დოვლათს.

⁶რადგან სიავე მტვრიდან არ მოდის და არც სატანჯველი აღმოცენდება მიწიდან.

⁷რადგან ადამიანი ტანჯვისთვის იბადება, და როგორც ნაპერწკალი, ისწრაფვის ზევით!

⁸მაგრამ მე ისევ ღმერთს დავეკითხებოდი და ღმერთს მივანდობდი ჩემს საქმეს,

⁹ის არის შემოქმედი დიადი და შეუცნობელი საქმეებისა, საკვირველებათა, რომელთაც არა აქვს რიცხვი.

¹⁰წვიმას მოავლნენს ხმელეთზე, და წყლებს აგზავნის ველებზე.

¹¹აღამაღლებს დამდაბლებულთ და შვებას ჰგვრის მგლოვიარეთ.

¹²ის ამსხვრევს ცბიერთა ზრახვებს და მათი ხელები ვეღარ აღწევენ საწადელს.

¹³იჭერს ბრძენკაცებს მათსავე ცბიერებაში, და მზაკვართა ხრიკები ფუჭი ხდება.

¹⁴დღისით ისინი წყვდიადს აწყდებიან; შუადღისას ხელისცეცებით დადიან, როგორც ღამეში.

¹⁵ის იხსნის ღატაკს მათი ბასრი ენებისგან და ძლიერთა ხელიდან.

¹⁶ასე რომ, უმწეოს იმედი აქვს, ხოლო უსამართლობა პირს იხშავს.

¹⁷აჰა, ნეტარია კაცი, რომელსაც ამხილებს ღმერთი! ამიტომ ყოვლადძლიერის შეგონებას ნუ უკუაგდებ!

¹⁸რამეთუ, თვითონ ლახვრავს და თვითონვე ახვევს, წყლავს, მაგრამ მისივე ხელები კურნავენ.

¹⁹ექვსი გაჭირვებიდან გიხსნის შენ, და მეშვიდედ არ შეგემთხვევა ბოროტება.

²⁰შიმშილობის ჟამს სიკვდილისაგან გიხსნის, ხოლო ბრძოლის ჟამს – მახვილისაგან.

²¹დაგიფარავს ენით გამათრახებისაგან, და არ შეგეშინდება უბედურებისა, როცა ის მოვა.

²²უბედურებასა და შიმშილზე გაგეცინება, და ნადირისა არ შეგეშინდება.

²³რადგან შენი მინდვრები გაწმენდილი იქნება ქვებისგან, და მოსვენებული იქნები გარეული ცხოველებისგან.

²⁴გეცოდინება, რომ მშვიდობაა შენს კარავში, თვალს გადაავლებ შენს სამყოფელს და დანაკლისი არ გექნება.

²⁵დაინახავ, რომ მრავალრიცხოვანია შენი მოდგმა, და მიწის ბალახივითაა შენი ნაშიერი.

²⁶ისეთი დღესრული ჩახვალ საფლავში, როგორც პურის ძნა, თავის დროზე რომ იმკება.

²⁷აჰა, ეს გამოვიკვლიეთ და ეს არის ჭეშმარიტება, შეისმინე და შენთვის იცოდე.“