Read სბს–2013 იობი 6 Bible Online

იობი 6 - სბს–2013 bible

იობი 6

¹მაშინ მიუგო იობმა და უთხრა:

²„ჩემი ჯავრი რომ აწონილიყო, და ჩემი უბედურება სასწორზე რომ დადებულიყო,

³მაშინ იგი ზღვის ქვიშაზე უფრო მძიმე იქნებოდა, და ამიტომაც არის ნაჩქარევი ჩემი სიტყვები.

⁴რადგან ჩამერჭო ყოვლადძლიერის ისრები და მათ შხამსა სვამს ჩემი სული; საშინელებანი დამატყდა თავს ღმერთისაგან.

⁵განა ყროყინებს კანჯარი, თუ ბალახი აქვს? განა ბღავის ხარი თავის საკვებთან?

⁶განა იჭმევა უგემური რამ მარილის გარეშე? ან და რამე გემო თუ აქვს კვერცხის ცილას?

⁷გული არ მიმდის მათზე; საძულველია ჩემთვის ლუკმაც კი.

⁸ნეტავ ახდებოდეს ჩემი ნატვრა, და იმედს გამიმართლებდეს ღმერთი!

⁹ნეტა, ინებებდეს ღმერთი და შემმუსრავდეს! გამოიწვდიდეს ხელს და მომკვეთდეს!

¹⁰ეს იქნებოდა ჩემი ნუგეში, და განვმტკიცდებოდი უმოწყალო სატკივარში, რადგან არ უარმიყვია წმიდის სიტყვები.

¹¹რა არის ჩემი ძალა, რომ დავენდო? და რა არის ჩემი ბოლო, რომ დავითმინო?

¹²განა ქვასავით მტკიცეა ჩემი ძალა? განა ბრინჯაოსია ხორცი ჩემი?

¹³ჭეშმარიტად, აღარ არის შეწევნა ჩემთვის. წარკვეთილი მაქვს ყოველგვარი სასოება.

¹⁴ვინც მეგობრისადმი არ არის მოწყალე, მას ყოვლადძლიერის შიში არა აქვს.

¹⁵ჩემი მოძმენი მუხანათობენ, როგორც ხევების ნაკადულები, ის ნაკადულები, უკვალოდ რომ უჩინარდებიან,

¹⁶ყინულისაგან რომ ამღვრეულან და ჩამდნარი თოვლით აზვირთებულან.

¹⁷მაგრამ როგორც კი მზე დააჭერს, მაშინვე ქრებიან, დააცხუნებს და ადგილზევე უჩინარდებიან.

¹⁸ქარავნები გეზს იცვლიან, გადიან უდაბურ ადგილებში და იღუპებიან.

¹⁹თემას ქარავნები ეძიებენ წყალს, და შებას მოგზაურებს იმედი აქვთ.

²⁰გაწბილდნენ, რადგან იმედი ჰქონდათ, მივიდნენ იქ და შეძრწუნდნენ.

²¹ახლა ასეთივე გამოუსადეგარნი გახდით თქვენ ჩემთვის, იხილეთ საშინელება და შეძრწუნდით.

²²გითხარით განა: ‘რამე მომიტანეთ,’ ან ‘თქვენი დოვლათიდან ჩემთვის ქრთამი გაეცით?’

²³ან: ‘დამიხსენით მტრის ხელიდან და მჩაგვრელთა ხელიდან გამომისყიდეთ?’

²⁴ამიხსენით და დავდუმდები, გამაგებინეთ, რა შემეშალა.

²⁵როგორი მწარეა წრფელი სიტყვა! მაგრამ რას მემართლება თქვენი საყვედური?

²⁶ნუთუ ფიქრობთ, რომ შეგიძლიათ მისაყვედუროთ, თითქოს სასოწარკვეთილის სიტყვები ქარისთვის გასატანებელი იყოს?

²⁷თქვენ ობოლზეც კი წილის ყრა შეგიძლიათ და გაჰყიდით საკუთარ მეგობარს.

²⁸ახლა კი მოწყალება მოიღეთ და მომხედეთ, და ნახეთ, რომ არ ვცრუობ თქვენს წინაშე.

²⁹მობრუნდით, გევედრებით, და ნუ იქნებით უსამართლონი. მობრუნდით, ჩემი სიმართლე კვლავაც ჩემშია!

³⁰განა არის ჩემს ენაზე უსამართლობა, და ჩემი სასა ვერ შეიგრძნობს უბედურებას?