Read სბს–2013 იობი 7 Bible Online

იობი 7 - სბს–2013 bible

იობი 7

¹განა კაცის ცხოვრება მძიმე სამსახურივით არაა ამქვეყნად? განა მისი ყოფა მოჯამაგირის ყოფას არა ჰგავს?

²როგორც მონას სწყურია ჩრდილი, როგორც მოჯამაგირე ელის თავის გასამრჯელოს,

³ასე მხვდა წილად ამაოების თვენი, და მწუხარების ღამენი მომეთვალა.

⁴ვწევარ და ვამბობ: ‘როდის ავდგები?’ მაგრამ გრძელია ღამე, და ბორგვით ვიღლები განთიადამდე.

⁵ჩემი ხორცი მატლებით და მიწის მტვრით შეიმოსა, ჩემი კანი სკდება და იხრწნება.

⁶ჩემი დღენი ჯარაზე სწრაფად ბრუნავენ და უიმედოდ იწურებიან.

⁷გახსოვდეთ, ერთი ამოსუნთქვაა ჩემი სიცოცხლე; არ მობრუნდება ჩემი თვალი სიკეთის ხილვად.

⁸თვალები, რომელნიც მხედავენ, ვეღარ მიხილავენ, თვალებს მომაპყრობთ, მაგრამ მე უკვე აღარ ვიქნები!

⁹როგორც ღრუბელი ქრება და უჩინარდება, ისე შავეთს ჩასული კაცი უკან არ ამოდის,

¹⁰შინ აღარასდროს ბრუნდება, და აღარ არის მისი ხსოვნა მის მხარეში.

¹¹ამიტომაც არ დავდუმდები, ვილაპარაკებ შეჭირვებული სულით, ვიღაღადებ სულგამწარებული.

¹²განა ზღვა ვარ ან ზღვის ურჩხული, მეთვალყურე რომ მომიჩინე?

¹³როცა ვამბობ: ‘მანუგეშებს ჩემი საწოლი, და ჭმუნვას შემიმსუბუქებს ჩემი სარეცელი,’

¹⁴მაშინ მაძრწუნებ სიზმრებით და მაშინებ ხილვებით.

¹⁵ისე რომ, ჩემი სული უმალ დახრჩობასა და სიკვდილს ირჩევს, ვიდრე ამ სხეულში ყოფნას.

¹⁶მომძულდა სიცოცხლე! მუდამ ხომ არ ვიცოცხლებ. დამეხსენ, რადგან ერთი ამოსუნთქვაა ჩემი დღეები.

¹⁷რა არის ადამიანი, ასე რომ განადიდებ? მისკენ რომ მიგიპყრია გულისყური?

¹⁸ყოველ დილას რომ დახედავ და სცდი ყოველ წამს?

¹⁹როდემდე არ მომაშორებ მზერას? როდემდე არ დამეხსნები, რომ ნერწყვი მაინც გადავყლაპო?

²⁰მე თუ შევცოდე, შენ რა გავნე, ადამიანთა ზედამხედველო? რად მაქციე შენს სამიზნედ და რად ვიქეც შენს ტვირთად?

²¹რატომ არ მომიტევებ ცოდვას და არ წარმიხოცავ დანაშაულს? რადგან მალე ჩავწვები მიწაში; ძებნას დამიწყებ, მაგრამ აღარ ვიქნები!“