Read სბს–2013 ფსალმუნები 101 Bible Online

ფსალმუნები 101 - სბს–2013 bible

ფსალმუნები 101

¹ლოცვა გლახაკისა, ოდეს იტანჯება და უფლის წინაშე გადმოღვრის თავის გულისნადებს. უფალო, ისმინე ჩემი ლოცვა, და ჩემი ღაღადისი მოვიდეს შენთან!

²ნუ დაფარავ შენს სახეს ჩემგან ჩემი გაჭირვების ჟამს, მომაპყარ ყური; ოდეს მოგიხმობ, მსწრაფლ მიპასუხე!

³რადგან გაქრნენ კვამლივით ჩემი დღენი და ჩემი ძვლები ვარვარებს, როგორც კოცონი.

⁴ბალახივით დაჭკნა და გახმა ჩემი გული, მავიწყდება ჩემი პურის ჭამა.

⁵ჩემი კვნესის ხმისაგან ხორცს მიჰკვრია ჩემი ძვლები.

⁶დავემსგავსე უდაბნოს ფრინველს, გავხდი ვითარცა ბუკიოტი ნანგრევებში.

⁷ძილი გამიტყდა და ვზივარ, ვითარცა ეული ჩიტი სახურავზე.

⁸ყოველდღე მლანძღავენ ჩემი მტრები, ჩემი განმაქიქებლები საწყევლად იყენებენ ჩემს სახელს;

⁹რადგან პურივით ვჭამდი ნაცარს და ჩემს სასმელს ცრემლით ვაზავებდი

¹⁰შენი რისხვისა და გულისწყრომის გამო; რადგან ამიყვანე და დამანარცხე.

¹¹ჩემი დღეები გადახრილი ჩრდილივითაა და ბალახივით ვხმები.

¹²შენი არსება კი, უფალო, საუკუნოა, შენი ხსენება – თაობიდან თაობამდე.

¹³შენ აღსდგები და შეიწყალებ სიონს, რადგან ჟამია შეწყალებისა. აჰა, მოვიდა აღთქმული ჟამი!

¹⁴რადგან უყვართ შენს მსახურთ მისი ქვები და მისი მიწა ენანებათ.

¹⁵შეეშინდებათ ერებს უფლის სახელისა და ამა ქვეყნის ყველა მეფეს შენი დიდების.

¹⁶როდესაც აღაშენებს უფალი სიონს, გამოცხადდება თვისი დიდებით;

¹⁷მოხედავს გულმოდრეკილთა ლოცვას და არ უკუაგდებს მათ ვედრებას.

¹⁸დაიწერება ეს მომავალი თაობისათვის, და ხალხი, რომელიც დაიბადება, ადიდებს უფალს.

¹⁹რადგან მან გადმოიხედა თავისი წმიდა სიმაღლიდან, მოიხილა უფალმა ზეციდან ქვეყანა,

²⁰რათა შეესმინა პატიმრის კვნესა, გაეთავისუფლებინა სიკვდილის ძენი.

²¹რათა აუწყონ სიონს უფლის სახელი და ქება მისი იერუსალიმს,

²²როცა შეგროვდებიან ხალხები ერთად და სამეფონი უფლის მსახურებისთვის.

²³გაასავათა მან გზაში ჩემი ძალა, შეამცირა ჩემი დღენი.

²⁴ვეტყვი: ღმერთო ჩემო! ნუ მომტაცებ ჩემი დღეების ნახევარს! თაობიდან თაობამდეა შენი წლები.

²⁵ძველთაგან დააფუძნე დედამიწა, და შენს ხელთა ქმნილებაა ზეცა.

²⁶ისინი გარდავლენ, შენ კი იქნები; ყველანი ტანსაცმელივით დაძველდებიან, სამოსელივით გამოიცვლი მათ და გაქრებიან.

²⁷შენ კი იგივე ხარ, და შენი წლები არ დაილევა!

²⁸იცხოვრებენ უსაფრთხოდ შენს მსახურთა ძენი და შთამომავალი მათი დამკვიდრდება შენს წინაშე.