Read სბს–2013 ფსალმუნები 102 Bible Online

ფსალმუნები 102 - სბს–2013 bible

ფსალმუნები 102

¹დავითისა. ადიდე, სულო ჩემო, უფალი და მთელო შიგნეულობავ ჩემო, მისი წმიდა სახელი!

²ადიდე, სულო ჩემო, უფალი, არ დაივიწყო მთელი მისი სიკეთე!

³ის არის შემნდობი ყველა შენი ბრალისა, მკურნალი ყველა შენი სნეულებისა,

⁴საფლავიდან დამხსნელი შენი სიცოცხლისა, წყალობისა და შებრალების გვირგვინის დამდგმელი,

⁵სიკეთით აღმვსები შენი სიცოცხლისა, არწივივით განმაახლებელი შენი სიჭაბუკისა.

⁶სიმართლეს და სამართალს იქმს უფალი ყველა ჩაგრულისათვის.

⁷აუწყა თავისი გზები მოსეს, ისრაელიანთ – თვისი საქმენი.

⁸შემბრალე და ლმობიერია უფალი, სულგრძელი და მრავალმოწყალე.

⁹სამუდამოდ არ გაწყრება და არც მისი რისხვა არის საუკუნო.

¹⁰არც ჩვენი ცოდვების მიხედვით მოგვაგებს და არც ჩვენი ბრალისამებრ გადაგვიხდის.

¹¹რადგან როგორც ცა მაღალია დედამიწაზე, ასევე დიდია წყალობა მისი მოშიშთა მიმართ;

¹²როგორც შორს არის აღმოსავლეთი დასავლეთისგან, ისე განგვაშორა მან დანაშაულნი ჩვენნი.

¹³როგორც მამა შეიწყნარებს შვილებს, ისე შეიწყნარებს უფალი მის მოშიშებს;

¹⁴ვინაიდან უწყის აგებულება ჩვენი, ახსოვს, რომ მტვერი ვართ;

¹⁵ბალახივით არის დღენი კაცისა; ველის ყვავილივით აყვავდება;

¹⁶მაგრამ ქარი გადაუქროლებს და აღარ არის, მისმა ადგილმა აღარაფერი იცის მის შესახებ;

¹⁷ხოლო წყალობა უფლისა უკუნისამდეა მის მოშიშთა მიმართ, და მისი სიმართლე – შვილთაშვილებზე;

¹⁸მათზე, ვინც იცავს თავის აღთქმას და ვისაც ახსოვს მისი მცნებანი და აღასრულებს მათ.

¹⁹ცაში დაიდგა ტახტი უფალმა, და მეუფება მისი განაგებს ყოველივეს.

²⁰ადიდეთ უფალი, ანგელოზნო მისნო; ძალით ძლიერნო, მისი სიტყვის აღმსრულებელნო, მორჩილნო მისი სიტყვისა!

²¹ადიდეთ უფალი, ყოველნო დასნო მისნო, მსახურნო მისნო, მისი ნების აღმსრულებელნო!

²²ადიდეთ უფალი, ყოველნი საქმენი მისნი, მისი მეუფების ყოველ ადგილას! ადიდე, სულო ჩემო, უფალი!