Read სბს–2013 ფსალმუნები 103 Bible Online

ფსალმუნები 103 - სბს–2013 bible

ფსალმუნები 103

¹აკურთხე, სულო ჩემო, უფალი! უფალო, ღმერთო ჩემო, დიდი ხარ ფრიად. ღირსებითა და დიდებითა ხარ მოსილი.

²გაკრავს სინათლე სამოსელივით, განგიფენია ცა კარავივით,

³ვინც წყლებზე ააგო ზესართულები, ღრუბლები გაიხადა ეტლად თავისთვის, მიმოდიოდა ქარის ფრთებზე.

⁴რომელმაც ქმნა ქარები თავის ანგელოზებად, და ცეცხლი და ალი – თავის მსახურებად.

⁵დააფუძნა დედამიწა თავის საძირკვლებზე, არ შეირყევა უკუნისამდე.

⁶უფსკრულით, როგორც სამოსელით, დაფარე იგი; მთებზე დგას წყლები;

⁷შენი რისხვისგან გარბიან, შენი ქუხილის ხმაზე ილტვიან.

⁸ადიან მთანი, ჩადიან ველები, იმ ადგილას, სადაც დაუდგინე.

⁹საზღვარი დაუდე – ვერ გადალახავენ, ვეღარ დაბრუნდებიან დედამიწის დასაფარად.

¹⁰მიუშვი წყაროები ხევებში, რათა მთებს შორის იდინონ;

¹¹რომ დალიოს ყოველმა მხეცმა ველისამ, კანჯრებმა მოიკლან წყურვილი.

¹²ცის ფრინველნი დამკვიდრებულან მათთან, ტოტოებიდან ხმიანობენ.

¹³რწყავ მთებს შენი ზესართულებიდან; შენს საქმეთა ნაყოფით ძღება ქვეყანა.

¹⁴აღმოაცენებ ბალახს პირუტყვისათვის და მცენარეებს – ადამიანის მსახურებისთვის, რათა გამოიღოს საკვები მიწიდან,

¹⁵და ღვინო, რათა გაამხიარულოს გული კაცისა, საცხებელმა გააბრწყინოს სახე მისი, და პურმა შეამტკიცოს გული კაცისა.

¹⁶გაძღნენ წყლით უფლის ხეები და კედრები ლიბანისა, მან რომ დანერგა.

¹⁷ჩიტები იდებენ იქ ბუდეს: კვიპაროსები ყანჩას სახლია.

¹⁸მთანი მაღალნი – ქურციკთათვის, კლდენი – კურდღელთა თავშესაფარი.

¹⁹შექმენ მთვარე ჟამთათვის; მზემ იცის თავისი დასავლის ჟამი.

²⁰ჩამოაწვენ ბნელს და დგება ღამე, მაშინ ამოძრავდება ტყის ყველა ნადირი.

²¹ლომის ბოკვერები ბრდღვინავენ ნადავლისათვის, მოითხოვენ ღმერთისგან საკვებს.

²²ამობრწყინდება მზე და გროვდებიან და თავიანთ ბუნაგებში წვებიან.

²³გადის ადამიანი, რათა იშრომოს და იმუშაკოს მწუხრის ჟამამდე.

²⁴რაოდენ მრავალია საქმენი შენი, უფალო! ყოველივე სიბრძნით შეგიქმნია, სავსეა დედამიწა შენი ქმნილებებით.

²⁵ეს ზღვაა, დიდი და უკიდეგანო, იქ ქვეწარმავალია ურიცხვი, ცხოველნი – მცირენი დიდებთან ერთად.

²⁶იქ ხომალდები დადიან; ლევიათანი – ეს შენ შექმენი გასართობად.

²⁷ყველა შენგან მოელის საზრდოს თავთავის დროზე.

²⁸მისცემ და აიღებენ, გახსნი შენს ხელს – გაძღებიან სიკეთით.

²⁹დაფარავ შენს სახეს – შეძრწუნდებიან, სულს წაართმევ – იხოცებიან, კვლავ მტვრად მიიქცევიან;

³⁰გაგზავნი შენს სულს – წარმოიქმნებიან, და განაახლებ პირს მიწისას.

³¹იყოს დიდება უფლისა უკუნისამდე! იხაროს უფალმა თავისი ქმნილებით!

³²დახედავს დედამიწას და ათრთოლდება, შეეხება მთებს და აკვამლდებიან!

³³ვუგალობებ უფალს მთელი ჩემი სიცოცხლე, ვუგალობებ ჩემს ღმერთს, ვიდრე ვარსებობ.

³⁴სათნო იყოს მისთვის ჩემი ფიქრები! გავიხარებ უფალში.

³⁵გაქრნენ ცოდვილნი ქვეყნიერებიდან და ბოროტნი ნუღარ იქნებიან! აკურთხე, სულო ჩემო, უფალი! ალელუია!