Read სბს–2013 ფსალმუნები 106 Bible Online

ფსალმუნები 106 - სბს–2013 bible

ფსალმუნები 106

¹მადლი შესწირეთ უფალს, რადგან კეთილია, რადგან უკუნისამდეა წყალობა მისი!

²ასე სთქვან დახსნილებმა უფლის მიერ, რომელნიც იხსნა მტრის ხელთაგან

³და გამოკრიბა ისინი ქვეყნებიდან – აღმოსავლეთიდან და დასავლეთიდან, ჩრდილოეთიდან და სამხრეთიდან.

⁴აებნათ მათ გზა უკაცრიელ უდაბნოში, დაბა ვერ ჰპოვეს დასამკვიდრებლად;

⁵შიოდათ და სწყუროდათ, სული მისდიოდათ.

⁶მაშინ შეჰღაღადეს უფალს თავიანთი გაჭირვების ჟამს და გასაჭირისგან იხსნა ისინი.

⁷დააყენა სწორ გზაზე, რათა მისულიყვნენ დასახლებულ ქალაქში.

⁸დაე, შესწირონ უფალს მადლი წყალობისათვის, საოცრებათათვის ადამის ძეთა მიმართ!

⁹რადგან გააძღო მან სული მწყურვალი, და სული მშიერი აავსო სიკეთით.

¹⁰ისხდნენ ისინი ბნელში და სიკვდილის წყვდიადში, ტყვენი ტანჯვისა და ბორკილისა,

¹¹რადგან ეურჩებოდნენ ღმერთის მცნებებს და უზენაესის რჩევას უგულებელყოფდნენ.

¹²მოდრიკა ჯაფით მათი გული, ეცემოდნენ და შემწე არ ჰყავდათ.

¹³შეჰღაღადეს უფალს თავიანთი გაჭირვების ჟამს და იხსნა ისინი ურვისაგან.

¹⁴გამოიყვანა ბნელიდან და სიკვდილის წყვდიადიდან, ბორკილები მათი დაწყვიტა,

¹⁵დაე, შესწირონ უფალს მადლი წყალობისათვის, საოცრებათათვის ადამის ძეთა მიმართ!

¹⁶რადგან შემუსრა ბჭენი რვალისა და დაფშვნა ურდულნი რკინისა.

¹⁷ბრიყვნი თავიანთი უკანონო გზებისა და ცოდვებისთვის იტანჯებოდნენ,

¹⁸ყოველგვარი საჭმელი შეიზიზღა მათმა სულმა და მიუახლოვდნენ სიკვდილის კარიბჭეს.

¹⁹შეჰღაღადეს უფალს გაჭირვების ჟამს და ურვისგან იხსნა ისინი.

²⁰მოუვლინა სიტყვა თავისი და განკურნა ისინი, იხსნა ისინი საფლავებიდან.

²¹დაე, აქონ უფლის წყალობა და საოცრებანი მისნი ადამის ძეთა მიმართ!

²²შესწირონ შესაწირავები ქებისა და აუწყონ მისი საქმეები გალობით!

²³ზღვაში ხომალდებით მოგზაურებმა, დიდ წყლებზე საქმის აღმსრულებლებმა,

²⁴რომელთაც ნახეს უფლის საქმენი და მისი საოცრებანი სიღრმეებში.

²⁵ის იტყვის და ამოვარდება ქარიშხალი, და ზეაღიმართებიან ზვირთები,

²⁶ავლენ ზეცამდე, ჩავლენ უფსკრულში, სული მათი განსაცდელში დაილევა.

²⁷წრიალებენ და ირყევიან, ვითარცა მთვრალნი, და მთელი მათი სიბრძნე დაინთქა.

²⁸მაგრამ შეჰღაღადეს უფალს თავიანთი გაჭირვების ჟამს და გამოიყვანა ისინი ურვიდან.

²⁹დააწყნარა ზღვის ღელვა და დაადუმა მისი ტალღები.

³⁰გამხიარულდნენ, რადგან დაწყნარდნენ; და წარუძღვა ნანატრ ადგილას,

³¹დაე, აქონ უფლის წყალობა და საოცრებანი მისნი ადამის ძეთა მიმართ,

³²დაე, აღამაღლონ ის ხალხის კრებულში და მოხუცებულთა შესაკრებელში ხოტბა შეასხან!

³³აქცევს მდინარეებს უდაბნოდ, წყაროს წყლებს – ურწყულად.

³⁴ნაყოფიერ მიწას – ბიცად, მის მკვიდრთა უკეთურების გამო.

³⁵აქცევს უდაბნოს წყალუხვ ტბად და გამოფიტულ მიწას – წყაროს წყლად.

³⁶ასახლებს იქ მშიერთ, და აფუძნებენ ისინი დასახლებულ ქალაქს;

³⁷თესავენ მინდვრებს და აშენებენ ვენახს, და უხვ ნაყოფს მოიწევენ;

³⁸აკურთხებს მათ და მრავლდებიან ფრიად, და მათ პირუტყვს არ შეამცირებს.

³⁹როდესაც დამცირდებიან და მოიდრიკებიან ჩაგვრის, სალმობათა და გასაჭირისგან,

⁴⁰სირცხვილს დაატეხს მთავრებს და ახეტიალებს უგზო-უკვლოდ;

⁴¹ღარიბს კი გამოიყვანს სიღატაკიდან და მოაშენებს ცხვრის ფარასავით მის შთამომავალს.

⁴²ნახავენ წრფელნი და გაიხარებენ, და ყოველი ურჯულოება აიკრავს პირს.

⁴³ვინც ბრძენია და დაიცავს ამას, ის გულისხმას ჰყოფს უფლის წყალობას.