Read სბს–2013 ფსალმუნები 108 Bible Online

ფსალმუნები 108 - სბს–2013 bible

ფსალმუნები 108

¹გუნდის ლოტბარს. დავითის ფსალმუნი. ღმერთო ჩემი დიდებისა, ნუ დადუმდები.

²რადგან პირი ბოროტისა და პირი მზაკვრისა გაიხსნა ჩემს წინააღმდეგ. მელაპარაკებიან ცბიერი ენით.

³სიძულვილის სიტყვებით გარს შემომერტყნენ და უმიზეზოდ მეომებიან.

⁴ჩემი სიყვარულის წილ გადამემტერნენ, მე კი ვლოცულობ.

⁵მომაგეს ბოროტი კეთილის წილ და სიძულვილი – ჩემი სიყვარულის წილ.

⁶ამბობენ: „დააყენე ბოროტი მასზე, და ბრალმდებელი დადგეს მის მარჯვნივ.

⁷განკითხვისას გამოვიდეს მტყუანი, და მისი ლოცვა ცოდვად შეერაცხოს!

⁸იყოს დღეები მისი მცირე, და მისი ქონება სხვამ მოიხვეჭოს.

⁹დარჩნენ მისი შვილები ობლად და მისი ცოლი – ქვრივად.

¹⁰იხეტიალონ მისმა შვილებმა და იმათხოვრონ, ითხოვდნენ პურს მათი ნანგრევებიდან.

¹¹მოვალემ მიითვისოს, რაც გააჩნია, და წარიტაცონ უცხოებმა ნაჯაფი მისი.

¹²ნუ ეყოლება მოწყალე, და ნურც შეიწყალებენ მის ობლებს!

¹³მოისპოს მისი შთამომავლი, შემდგომ თაობაში წაიშალოს მისი სახელი.

¹⁴გაუხსენდეს ბრალი მისი მამებისა უფლის წინაშე, და ცოდვა მისი დედისა ნუ წაიშლება!

¹⁵იყოს უფლის თვალის წინ მუდამ, მოისპოს ქვეყნიერებიდან მისი სახსენებელი!

¹⁶რადგან არ გახსენებია წყალობის ქმნა, და სდევნიდა ღარიბ-ღატაკსა და გულდაჩაგრულს მოსაკლავად.

¹⁷შეიყვარა წყევლა – მასვე მიუვიდეს! არ ისურვა კურთხევა – განშორდეს მას!

¹⁸შეიმოსა წყევლით, როგორც სამოსელით, შევიდეს წყევლა, როგორც წყალი, მის შინაგანში, და როგორც ზეთი – მის ძვლებში!

¹⁹იყოს მისთვის, ვითარცა სამოსელი, რომელსაც იცვამს, და ვითარცა სარტყელი, გარს რომ ირტყამს.“

²⁰ასეთი იყოს მისაგებელი უფლისა ჩემს მაბეზღართა და ჩემს სულზე ავის მთქმელთა მიმართ!

²¹ხოლო შენ, უფალო, ღმერთო ჩემო, იმოქმედე ჩემს მიმართ შენი სახელის გულისათვის, რადგან კეთილია წყალობა შენი, გადამარჩინე!

²²რადგან ღარიბი და ღატაკი ვარ მე და გული ჩემი შეძრწუნდა გვამსა ჩემსა.

²³ვითარცა ჩრდილი გადახრის ჟამს, დავილიე, ვეხეთქებოდი აქეთ-იქით კალიასავით.

²⁴ჩემი მუხლები დაუძლურდნენ მარხვისაგან, ზეზეურად ჩამოვხმი;

²⁵შევიქენ მათი სალანძღავი; თავს აქნევდნენ ჩემი დამნახავნი.

²⁶შემეწიე, უფალო, ღმერთო ჩემო! მიხსენი შენი წყალობით.

²⁷დაე, გაიგონ, რომ შენი ხელია ეს, რომ შენ მოიმოქმედე ეს, უფალო.

²⁸დაე დამწყევლონ, შენ კი მაკურთხებ; აღდგებიან ჩემზე და შერცხვებიან, და მორჩილი შენი გაიხარებს.

²⁹შეიმოსონ ჩემი მაბეზღარნი გაწბილებით და ქურქივით წამოისხან თავიანთი სირცხვილი!

³⁰ხმამაღლა შევაქებ უფალს ჩემი პირით, და მრავალთა შორის ვადიდებ მას,

³¹რადგან გვერდით დაუდგება ღატაკს, რათა იხსნას მისი სულის განმსჯელთაგან.