Read სბს–2013 ფსალმუნები 11 Bible Online

ფსალმუნები 11 - სბს–2013 bible

ფსალმუნები 11

¹გუნდის ლოტბარს, ფსალმუნი დავითისა.

²მიხსენ, უფალო! რადგან აღარ არსებობს ღვთისმოსავი, რადგან გამქრალან ჭეშმარიტნი კაცთა მოდგმიდან.

³ტყუილს ეუბნება მეგობარი მეგობარს, ქლესა ტუჩებით ორპირად ლაპარაკობს;

⁴მოსპოს უფალმა ქლესა ბაგეები, გოროზად მოლაპარაკე ენები,

⁵რომელნიც ამბობენ: „ჩვენი ენებით ვიმძლავრებთ, ბაგენი ჩვენნი ჩვენთანაა; ვინ გვიბატონებს?“

⁶ღარიბთა კვნესისა და ჩაგრულთა გმინვის გამო აღვდგები, – ამბობს უფალი, – ვუბოძებ შველას, ვისაც სწყურია იგი.

⁷უფლის სიტყვები – წმიდა სიტყვებია, ქურაში გამოდნობილი ვერცხლი, შვიდჯერ გაწმენდილი.

⁸უფალო, შენ დაიფარავ მათ, დაიცავ მათ ამ მოდგმისაგან უკუნისამდე.