Read სბს–2013 ფსალმუნები 117 Bible Online

ფსალმუნები 117 - სბს–2013 bible

ფსალმუნები 117

¹ადიდეთ უფალი, რადგან კეთილია, რადგან უკუნისამდეა წყალობა მისი!

²თქვას ისრაელმა: „მართლაც უკუნისამდეა წყალობა მისი!“

³თქვას აარონის სახლმა: „მართლაც უკუნისამდეა წყალობა მისი!“

⁴თქვან მოშიშებმა უფლისა: „მართლაც უკუნისამდეა წყალობა მისი!“

⁵გაჭირვებიდან მოვუხმე უფალს; სიფართოვით მიპასუხა უფალმა.

⁶უფალი ჩემთან არის – არ მეშინია, რას მიზამს კაცი?

⁷უფალი ჩემთან არის შემწედ და მე ვიზეიმებ ჩემს მტრებზე.

⁸უკეთესია დაყრდნობა უფალზე, ვიდრე დაიმედება ადამიანზე.

⁹უკეთესია დაყრდნობა უფალზე, ვიდრე დაიმედება მთავრებზე.

¹⁰ყოველნი თესლ-ტომნი გარს შემომერტყნენ; უფლის სახელით ამოვწყვეტ მათ.

¹¹გარს შემომერტყნენ, გარემომიცვეს, უფლის სახელით ამოვწყვეტ მათ.

¹²გარს შემომერტყნენ ფუტკრებივით; აბრიალდნენ, ვითარცა ცეცხლი ძეძვისა; უფლის სახელით ამოვწყვეტ მათ.

¹³ძლიერად მკრეს ხელი ძირს დასაცემად, მაგრამ უფალი შემეწია მე.

¹⁴ჩემი ძალა და გალობაა უფალი, ის არის ჩემი მხსნელი.

¹⁵ხმა სიმღერისა და შეწევნისა მართალთა კარვებში: უფლის მარჯვენა მქმნელია ძალის!

¹⁶უფლის მარჯვენა მაღალია, უფლის მარჯვენა მქმნელია ძალის!

¹⁷არ მოვკვდები, არამედ ვიცოცხლებ და ვაუწყებ უფლის საქმეებს.

¹⁸დასჯით დამსაჯა უფალმა, სიკვდილს კი არ მიმცა.

¹⁹გამიღეთ ბჭენი სიმართლისა, შევალ მათში, ვადიდებ უფალს!

²⁰ეს არის კარიბჭე უფლისა! მართალნი შევლენ შიგ.

²¹მადლობას გწირავ, რადგან მიპასუხე და გახდი ჩემი ხსნა!

²²ქვა, დაწუნებული მშენებლების მიერ, თავკიდური გახდა;

²³უფლისაგან არის ეს; საოცარია ეს ჩვენს თვალში.

²⁴ეს არის დღე, რომელიც ქმნა უფალმა; ვილხინოთ და ვიმხიარულოთ მასში!

²⁵გევედრებით, უფალო, გვიხსენი! გევედრებით, უფალო, გაგვიმარჯვე!

²⁶კურთხეულია უფლის სახელით მომავალი! გაკურთხებთ უფლის ტაძრიდან.

²⁷ღმერთია უფალი და გვინათებს ჩვენ. მიაბით მსხვერპლი საბლით სამსხვერპლოს რქებზე.

²⁸ჩემი ღმერთი ხარ შენ და გადიდებ! ღმერთო ჩემო, მადლობას გწირავ!

²⁹ადიდეთ უფალი, რადგან კეთილია, რადგან უკუნისამდეა წყალობა მისი!