სბს–2013 bible online

ფსალმუნები 118

¹ალეფ. ნეტარ არიან, ვისი გზაც უბიწოა, რომელნიც დადიან უფლის რჯულზე.

²ნეტარ არიან მის მცნებათა დამცველნი, მთელი გულით რომ ეძებენ მას.

³სიავკაცე არ ჩაუდენიათ, არამედ მის გზას ადგანან!

⁴შენ უბრძანე მათ შენს განწესებათა დმტკიცედ დაცვა.

⁵ნეტამც წარიმართოს ჩემი გზები შენს წესდებათა დასაცავად!

⁶მაშინ აღარ შემრცხვება, ოდეს შევხედავ ყოველ შენს მცნებას.

⁷განგადიდებ გულის სიწრფელით, როს მასწავლი სამართალს შენი სიმართლისა.

⁸შენს წესებს დავიცავ; ნუ მიმატოვებ საბოლოოდ! ბეთ

⁹რით შეინახოს ყმაწვილმა სიწმინდე თავისი გზისა? დაცვით მისი შენი სიტყვისამებრ!

¹⁰მთელი გულით გეძიებ შენ; ნუ გადამახვევინებ შენს მცნებათაგან!

¹¹გულს ჩავიმარხე შენი სიტყვები, რომ არ შეგცოდო.

¹²კურთხეული ხარ შენ, უფალო! მასწავლე წესები შენი.

¹³ჩემი ბაგეებით ვაუწყებ შენი პირის ყველა სამართალს.

¹⁴შენს მცნებათა გზაზე ვხარობ, ვითარცა სრულ სიმდიდრეში მყოფი.

¹⁵შენს მცნებებზე ვიფიქრებ და დავუკვირდები შენს გზებს.

¹⁶შენი წესებით გავიხარებ, არ დავივიწყებ შენს სიტყვებს. გიმელ

¹⁷კეთილი უყავ შენს მორჩილს, რათა ვიცოცხლო და დავიცვა შენი სიტყვა.

¹⁸აღმიხილე თვალნი, რათა ვჭვრეტდე შენი რჯულის საოცრებებს!

¹⁹მწირი ვარ ქვეყანაზე, ნუ დამიმალავ შენს მცნებებს!

²⁰მოითენთა ჩემი სული შენი სამართლის წადილით ყოველჟამს.

²¹შერისხე ამპარტავანნი, წყეულნი, რომელთაც გადაუხვიეს შენს მცნებათაგან.

²²ამაცილე შერცხვენა და შეურაცხყოფა, რადგან შენს მცნებებს ვიცავდი!

²³თუმცა დასხდნენ მთავარნი ჩემს წინააღმდეგ სათათბიროდ, შენი მორჩილი შენს წესებს განსჯის.

²⁴შენი მცნებები სიხარულია ჩემთვის, მრჩეველნი ჩემნი. დალეთ

²⁵მტვერს მიეკრა სიცოცხლე ჩემი; გამაცოცხლე შენი სიტყვისამებრ!

²⁶როდესაც გიცხადებდი ჩემს გზებს, მპასუხობდი; მასწავლე წესები შენი!

²⁷შენი ბრძანებების გზა შემაგნებინე და ვიფიქრებ შენს საოცრებებზე.

²⁸ნაღველმა დაადნო ჩემი სული, განმამტკიცე შენი სიტყვისამებრ!

²⁹გზა სიცრუისა განმაშორე და შენი რჯულით შემიწყალე!

³⁰გზა ჭეშმარიტებისა ამოვირჩიე, შენი სამართალნი წინ დავიყენე.

³¹მივეკარ შენს მცნებებს, უფალო, ნუ გამაწბილებ!

³²შენი მცნებების გზით ვირბენ, როდესაც განავრცობ ჩემს გონებას! ჰე

³³მასწავლე, უფალო, გზა შენთა წესთა, და დავიცავ მათ ბოლომდე.

³⁴გამაგებინე და დავიცავ შენს რჯულს და შევინახავ მთელი გულით.

³⁵დამაყენე შენს მცნებათა კვალზე, რადგანაც მწადია იგი.

³⁶მიდრიკე ჩემი გული შენს მოწმობათაკენ და არა ანგარებისკენ.

³⁷მოარიდე ჩემი თვალი ამაოების მზერას; შენი გზით მაცოცხლე!

³⁸განუმტკიცე შენს მონას სიტყვა შენი, რადგან შენი მოშიშია იგი.

³⁹ამაცილე შერცხვენა, რომლისაც მეშინია, რადგან შენი სამართალნი კეთილია!

⁴⁰აჰა, ვისურვე ფრიად შენი ბრძანებანი; შენი სიმართლით მაცოცხლე მე! ვავ

⁴¹მოვიდეს ჩემზე შენი წყალობა, უფალო, ხსნა შენმიერი, შენი სიტყვისამებრ!

⁴²მაშინ პასუხს გავცემ ჩემს მაგინებელს, რადგან შენი სიტყვის იმედი მაქვს.

⁴³ნუ წაართმევ ჩემს ბაგეებს ჭეშმარიტების სიტყვას სრულიად, რადგან შენს სამართალს მოველი!

⁴⁴დავიცავ შენს რჯულს მარადის, უკუნითი უკუნისამდე.

⁴⁵ვივლი ხალვათად, რადგან შენს ბრძანებებს ვეძიებდი.

⁴⁶ვაუწყებ შენს მოწმობებს მეფეთა წინაშე და არ შემრცხვება.

⁴⁷გავიხარებ შენი მცნებებით, რომლებიც მიყვარს;

⁴⁸ხელებს აღვაპყრობ შენს მცნებათა მიმართ, რომლებიც მიყვარს, და დავუკვირდები შენს წესებს. ზაინ

⁴⁹გაუხსენე შენს მსახურს სიტყვა, რომლითაც დამაიმედე!

⁵⁰ეს არის ჩემი ნუგეში გასაჭირში, რადგან შენი ნათქვამი მაცოცხლებს.

⁵¹ამპარტავანნი დამცინიან მეტისმეტად; მაგრამ მე არ გადავუხვევ შენი რჯულისგან.

⁵²ოდეს ვიხსენებ შენს სამართალს, უფალო, რომელიც უკუნისიდანაა, ვიქარვებ დარდს.

⁵³თავზარი მეცემა ურჯულოთა გამო, რომლებიც ტოვებენ შენს რჯულს.

⁵⁴სიმღერებად იქცა ჩემთვის შენი წესები ჩემს საცხოვრებელ სახლში.

⁵⁵ვიხსენებ ღამით შენს სახელს, უფალო, და ვიცავ შენს რჯულს.

⁵⁶ეს წყალობაა ჩემთვის, რადგან შენს ბრძანებას ვიცავდი.

⁵⁷უფალია ჩემი ხვედრი; ვთქვი: „უფალო, დავიცავ შენს სიტყვებს!“

⁵⁸გევედრები მთელი გულით; შემიწყალე შენი სიტყვისამებრ.

⁵⁹ოდეს ვფიქრობ ჩემს გზებზე, ვაბრუნებ ფეხს შენი მცნებებისაკენ.

⁶⁰ვჩქარობ და არ ვაყოვნებ შენს მცნებათა დაცვას.

⁶¹თუმცა საბელებივით გარს შემომერტყნენ ბოროტნი, შენს რჯულს არ ვივიწყებ.

⁶²შუაღამისას ვდგები შენს სადიდებლად, შენი მართალი განსჯების გამო.

⁶³თანაზიარი ვარ ყველა შენი მოშიშისა, ვინც იცავს შენს მცნებებს.

⁶⁴შენი წყალობით, უფალო, სავსეა ქვეყნიერება; მასწავლე შენი წესდებანი. ტეტ

⁶⁵შენ კეთილი ქმენ შენი მორჩილისათვის, უფალო, შენი სიტყვისამებრ.

⁶⁶მასწავლე მე კეთილი განსჯა და აზრი, რადგან ვირწმუნე შენი მცნებანი.

⁶⁷ვიდრე დავიტანჯებოდი, ვცდებოდი; ახლა კი შენს სიტყვას ვიცავ.

⁶⁸კეთილი ხარ და კეთილს იქმ, მასწავლე წესები შენი.

⁶⁹ტყუილს ჩმახავენ ამპარტავანნი ჩემზე, მე კი მთელი გულით ვიცავ შენს ბრძანებებს.

⁷⁰დამსუყდა ქონივით მათი გული, მე კი შენი რჯულით ვხარობ.

⁷¹კარგია ჩემთვის, რომ დავიტანჯე, ამ გზით ვისწავლი წესდებებს შენსას.

⁷²უმჯობესია ჩემთვის შენი პირის რჯული, ვიდრე ათასი ოქრო და ვერცხლი. იოდ

⁷³შენმა ხელებმა შემქმნეს და ჩამომაყალიბეს; შთამაგონე და ვისწავლი შენს მცნებებს.

⁷⁴მოშიშნი შენნი შემხედავენ და გაიხარებენ, რადგან შენს სიტყვებზე ვარ მონდობილი.

⁷⁵ვიცი, უფალო, რომ მართალია შენი სამართალი, და სამართლიანად შემაჭირვე მე.

⁷⁶დაე იყოს შენი წყალობა ჩემს სანუგეშოდ, როგორც აღუთქვი შენს მორჩილს.

⁷⁷მოვიდეს ჩემთან შენი წყალობა და ვიცოცხლებ! რადგან შენი რჯული სიხარულია ჩემი.

⁷⁸შერცხვნენ ამპარტავანნი, რადგან ტყუილად მჩაგრავდნენ; მე კი შენს ბრძანებებს დავუკვირდები.

⁷⁹დაბრუნდნენ ჩემთან შენი მოშიშნი, რათა შეიცნონ შენი მცნებები.

⁸⁰იყოს ჩემი გული უბიწო შენს სამართალში, რათა არ შევრცხვე. ქაფ

⁸¹დადნა შენი შეწევნის მოლოდინში ჩემი სული. შენი სიტყვის იმედი მაქვს.

⁸²დადნენ თვალნი ჩემნი შენი სიტყვის მოლოდინში, ვამბობ: როდის მანუგეშებ მე?

⁸³ვიყავი, ვითარცა ტიკი ორთქლში, და მაინც შენი წესები არ დავივიწყე.

⁸⁴რამდენი უნდა დაითმინოს შენმა მორჩილმა? როდის განსჯი ჩემს მდევნელთ?

⁸⁵გამითხარეს ამპარტავნებმა ორმო, ისინი არ მიჰყვებიან შენს რჯულს.

⁸⁶ყველა შენი მცნება ჭეშმარიტია; უმიზეზოდ მდევნიან, მიშველე.

⁸⁷ლამის გამანადგურეს მიწაზე; და მაინც არ მივატოვე შენი ბრძანებები.

⁸⁸შენი წყალობით მაცოცხლე და დავიცავ შენი პირის მოწმობებს. ლამედ

⁸⁹უფალო, უკუნისამდეა შენი სიტყვა დაფუძნებული ზეცაში.

⁹⁰თაობიდან თაობამდეა წყალობა შენი! დაამყარე ქვეყანა და მტკიცედ დგას.

⁹¹შენი მსჯავრით დგანან დღესაც, რადგან ყოველი არსი შენ გმსახურებს.

⁹²შენი რჯული რომ არ ყოფილიყო ჩემდა ნუგეშად, დავიღუპებოდი ჩემს ტანჯვაში.

⁹³უკუნისამდე არ დავივიწყებ შენს ბრძანებებს, რადგან მათით მასულდგმულებდი.

⁹⁴შენი ვარ; მიხსენი, რადგან შენს ბრძანებებს ვეძიებდი!

⁹⁵მიდარაჯებენ ბოროტნი, რომ დამღუპონ; მე კი შენს მცნებებს ღრმად ვუკვირდები.

⁹⁶ყოველგვარი სრულქმნილების მინახავს ბოლო; შენი მცნებანი კი ვრცელია ფრიად. მემ

⁹⁷რარიგად მიყვარს შენი რჯული! ის არის ჩემი საფიქრალი დღენიადაგ.

⁹⁸ჩემს მტრებზე მეტად დამაბრძენე შენი მცნებებით; რადგან მარადის ჩემთანაა ისინი.

⁹⁹ყველა ჩემს მასწავლებელზე გონიერი გავხდი, რადგან შენი მცნებანი საფიქრალია ჩემი.

¹⁰⁰მოხუცებზე მეტად საზრიანი ვარ, რადგან შენს ბრძანებებს ვიცავ.

¹⁰¹ყოველგვარ ბოროტ გზას მოვარიდე ფეხი, რათა დავიცვა შენი სიტყვა.

¹⁰²არ გადავუხვევ შენს განწესებებს, რადგან შენ განმსწავლე.

¹⁰³რარიგ ატკბობს ჩემს სასას შენი სიტყვები, თაფლზე ტკბილია ჩემი პირისთვის!

¹⁰⁴შენი ბრძანებებით საზრიანი გავხდი, ამიტომ მოვიძულე სიცრუის ყოველი გზა. ნუნ

¹⁰⁵სანთელია ჩემი ფეხისთვის შენი სიტყვა და სინათლე – ჩემი ბილიკისათვის.

¹⁰⁶დავიფიცე და ავასრულე, მივდევ შენს მართალ განსჯებს.

¹⁰⁷დავმდაბლდი ფრიად; უფალო, მაცოცხლე შენი სიტყვისამებრ!

¹⁰⁸ჩემი ქების მსხვერპლი ისურვე, უფალო, და შენი სამართალნი მასწავლე.

¹⁰⁹სული ჩემი ჩემს ხელისგულზეა მუდამ, შენს რჯულს არ ვივიწყებ.

¹¹⁰დამიგეს ბოროტებმა მახე, მაგრამ შენი ბრძანებებისთვის არ გადამიხვევია.

¹¹¹დავიმკვიდრე შენი მოწმობანი საუკუნოდ, რადგან ისინი ჩემი გულის სიხარულია.

¹¹²მოვდრიკე გული ჩემი შენს წესთა შესასრულებლად საუკუნოდ, სამარადისოდ. სამეხ

¹¹³ბოროტგანმზრახველნი შევიძულე, და შენი რჯული შევიყვარე.

¹¹⁴თავშესაფარი და ფარი ხარ ჩემი; შენს სიტყვაზე ვარ დაიმედებული.

¹¹⁵შორს ჩემგან, უკეთურნო, რათა დავიცვა მცნებანი ჩემი ღმერთისა!

¹¹⁶შემეწიე შენი სიტყვისამებრ, რათა ვიცოცხლო, და ნუ გამიწბილებ ჩემს იმედს!

¹¹⁷განმამტკიცე, რათა გადავრჩე, და ყოველთვის დავუკვირდები შენს წესდებებს.

¹¹⁸შენ მოსპე ყოველი, ვინც განუდგა შენს წესებს, რადგან ამაოა მათი ხრიკები.

¹¹⁹როგორც წიდა, მოსპე ყოველი ბოროტი ქვეყანაზე, ამიტომ შევიყვარე შენი მცნებები.

¹²⁰ძრწის შენი შიშით ჩემი სხეული და შიში მაქვს შენი განკითხვებისა. ყაინ

¹²¹ვქმენ სამართალი და სიმართლე; ნუ შემატოვებ ჩემს მჩაგვრელებს.

¹²²გამოესარჩლე შენს მორჩილს სასიკეთოდ, რომ არ დამჩაგრონ ამპარტავნებმა.

¹²³დადნენ ჩემი თვალნი შენი შეწევნისა და შენი სიმართლის სიტყვის მოლოდინში.

¹²⁴ჰქმენ შენი მორჩილისთვის შენი წყალობისამებრ და წესდებანი შენნი მასწავლე.

¹²⁵მორჩილი ვარ შენი; გონიერ-მყავ, რათა შევიცნო მოწმობანი შენნი.

¹²⁶ჟამია უფლის მოქმედებისა – რადგან დაარღვიეს რჯული შენი!

¹²⁷ამიტომ მიყვარს მცნებანი შენნი ოქროზე და ბაჯაღლოზე მეტად;

¹²⁸ამიტომ წარვმართავ ჩემს ნაბიჯებს შენი მცნებებით; მძულს ყოველი გზა სიცრუისა. ფე

¹²⁹საოცარია მოწმობანი შენნი; ამიტომ ინახავს მათ სული ჩემი.

¹³⁰საწყისი შენი სიტყვებისა ანათებს, გონიერებას ანიჭებს მიამიტებს.

¹³¹პირი გავხსენი და ამოვისუნთქე, რადგან მომენატრა მცნებანი შენნი.

¹³²მომხედე და შემიწყალე, როგორც შეეფერებათ შენი სახელის მოყვარულთ.

¹³³ჩემი ნაბიჯები წარმართე შენი სიტყვისამებრ და ნუ გააბატონებ ჩემზე ნურა უსამართლოს.

¹³⁴მიხსენ ადამიანის ჩაგვრისაგან, რათა შევძლო შენი ბრძანებების დაცვა.

¹³⁵შენი სახე გამოუბრწყინე შენს მორჩილს და მასწავლე წესდებანი შენი.

¹³⁶ცრემლთა ნაკადები გადმომდის თვალთაგან, რადგან არ იცავენ შენს რჯულს. ცადე

¹³⁷მართალი ხარ შენ, უფალო, და სწორია განსჯანი შენნი.

¹³⁸შენ გვამცნე სიმართლით შენი მოწმობანი და ჭეშმარიტია მეტად.

¹³⁹დამღრღნა ეჭვმა, რადგან ივიწყებენ შენს სიტყვებს ჩემი მტრები.

¹⁴⁰ხალასია შენი ნათქვამი ფრიად და შენს მორჩილს უყვარს იგი.

¹⁴¹მცირე ვარ და მოძულებული; შენს ბრძანებებს არ ვივიწყებ.

¹⁴²შენი სიმართლე მარადიული სიმართლეა, და რჯული შენი ჭეშმარიტია.

¹⁴³განსაცდელი და გასაჭირი წამომეწია; მაგრამ შენი ბრძანებანი სიხარულია ჩემთვის. კოფ

¹⁴⁴სიმართლეა შენი მოწმობანი მარადის; შთამაგონე და ვიცოცხლებ!

¹⁴⁵მოგიხმობ მთელი გულით; მიპასუხე, უფალო! შენს წესდებებს დავიცავ.

¹⁴⁶შენ მოგიხმობ, მიხსენი, და დავიცავ შენს მოწმობებს.

¹⁴⁷გარიჟრაჟამდე ვდგები და ვღაღადებ, შენს სიტყვაზე ვარ დაიმედებული.

¹⁴⁸ჩემმა თვალებმა ასწრებენ ღამის სადარაჯოს, რათა დავუკვირდე შენს აღთქმას.

¹⁴⁹ისმინე ჩემი ხმა მოწყალედ, უფალო, შენი სიმართლით მაცოცხლე.

¹⁵⁰მომიახლოვდნენ ჩემთვის ავისმზრახველნი; შენი რჯულისაგან შორს დგანან ისინი.

¹⁵¹მაგრამ შენ ახლოს ხარ, უფალო, და ყველა მცნება შენი ჭეშმარიტებაა.

¹⁵²ადრიდანვე შევიტყვე შენს მოწმობათა შესახებ, რადგან სამარადჟამოდ დააფუძნე ისინი. რეშ

¹⁵³მოხედე ჩემს ტანჯვას და მიხსენი, რადგან შენს რჯულს არ ვივიწყებ!

¹⁵⁴გამომესარჩლე და დამიხსენი, შენი სიტყვისამებრ მაცოცხლე.

¹⁵⁵შორს არის ბოროტთაგან შველა, რადგან შენს წესდებებს არ ეძიებენ.

¹⁵⁶უხვია შენი წყალობანი, უფალო, შენი სამართლის მიხედვით მაცოცხლე.

¹⁵⁷ბევრია ჩემი მდევარი და მოდავე; მე კი შენი მოწმობებისათვის არ გადამიხვევია.

¹⁵⁸ვხედავ განდგომილთ და ზიზღი მიპყრობს, რადგან შენს სიტყვებს არ იცავენ.

¹⁵⁹ნახე, რარიგ შევიყვარე შენი ბრძანებანი; უფალო, შენი წყალობისამებრ მაცოცხლე.

¹⁶⁰დასაბამი შენი სიტყვისა ჭეშმარიტებაა, და საუკუნოა შენი სამართლის ყველა განწესება. შინ

¹⁶¹მთავარნი მდევნიან უმიზეზოდ; მაგრამ შენი სიტყვების კრძალვა აქვს ჩემს გულს.

¹⁶²ვხარობ შენს სიტყვაზე, ვითარცა მპოვნელი უხვი ნადავლისა.

¹⁶³მძულს და მძაგს სიცრუე; შენი რჯული კი მიყვარს.

¹⁶⁴დღეში შვიდგზის გაქებ შენი მართალი სამსჯავროსათვის.

¹⁶⁵დიდია მშვიდობა შენი რჯულის მოყვარულთა, და არ არსებობს მათთვის დაბრკოლება.

¹⁶⁶იმედი მაქვს შენი შეწევნისა, უფალო, და შენს ბრძანებებს ვასრულებ.

¹⁶⁷იცავს ჩემი სული შენს მოწმობებს; მე ისინი მიყვარს ძალიან.

¹⁶⁸ვიცავ შენს ბრძანებებს და მოწმობებს. რადგან ყველა ჩემი გზა შენს წინაშეა. თავ

¹⁶⁹მოაღწიოს ჩემმა ღაღადმა შენს წინაშე, უფალო, და შენი სიტყვისამებრ განმსწავლე!

¹⁷⁰მოვიდეს ჩემი ვედრება შენს წინაშე, მიხსენი შენი აღთქმისამებრ!

¹⁷¹წარმოთქვამენ ჩემი ბაგენი ქებას, რადგან მასწავლე წესდებანი შენნი.

¹⁷²აუწყებს ჩემი ენა შენს სიტყვებს, რადგან ყველა შენი მცნება სიმართლეა.

¹⁷³იყოს შენი ხელი ჩემს შემწედ, რადგან შენი ბრძანებანი ამოვირჩიე.

¹⁷⁴ვნატრობ შენს შველას, უფალო, და შენი რჯული საამოა ჩემთვის.

¹⁷⁵იცოცხლოს ჩემმა სულმა, რათა გაქოს შენ, და შენი განგება შემეწიოს.

¹⁷⁶დავიბენი, ვითარცა ცხვარი დაკარგული; მოძებნე შენი მორჩილი, რადგან შენი მცნებანი არ დავივიწყე!

Read სბს–2013 ფსალმუნები 118 Bible Online

ფსალმუნები 118 - სბს–2013 bible

ფსალმუნები 118