Read სბს–2013 ფსალმუნები 131 Bible Online

ფსალმუნები 131 - სბს–2013 bible

ფსალმუნები 131

¹გალობა აღსავალთა. გაიხსენე დავითი, უფალო, და ყოველი ურვა მისი.

²როგორ შეჰფიცა უფალს, აღთქმა დაუდო იაკობის ძლიერს:

³არ შევალ ჩემი სახლის კარავში, არ ავალ ჩემს სარეცელზე,

⁴არ მივცემ ძილს ჩემს თვალებს და რულს ჩემს წამწამებს,

⁵ვიდრე არ ვიპოვი ადგილს უფლისათვის, სავანეს იაკობის ძლიერისათვის.

⁶აჰა, გვესმა მასზე ეფრათაში; ვპოვეთ იგი იაყარის ველზე!

⁷მივიდეთ მის სადგომში, თაყვანი ვცეთ მის ფერხთა საყრდენს!

⁸აღსდექ, უფალო, და მიდი შენს განსასვენებელში, შენ და კიდობანი შენი ძლიერებისა!

⁹შენი მღვდელნი შეიმოსონ სიმართლით და იხარონ შენმა წმიდებმა.

¹⁰შენი მორჩილის, დავითის გულისათვის ნუ უკუაგდებ შენი ცხებულის სახეს.

¹¹შეჰფიცა უფალმა დავითს ჭეშმარიტად და არ გადაუხვევს მისგან: „ნაყოფისაგან შენი მუცლისა დავსვამ შენს ტახტზე!

¹²თუ დაიცავენ შენი ძენი ჩემს აღთქმას და ჩემს მოწმობებს, რომელთაც ვასწავლი მათ, მათი შვილებიც უკუნისამდე ისხდებიან შენს ტახტზე.“

¹³რადგან ამოირჩია უფალმა სიონი, ისურვა სამკვიდროდ თავისთვის.

¹⁴ეს არის ჩემი განსასვენებელი უკუნისამდე, აქ დავსახლდები, რადგან ვისურვე იგი.

¹⁵მის საზრდოს კურთხევით ვაკურთხებ, მის ღარიბებს გავაძღებ პურით.

¹⁶მის ღვთისმსახურთ შევმოსავ შეწევნით და მისი წმიდები სიხარულით გაიხარებენ.

¹⁷აქ აღმოვაცენებ დავითის რქას, გავამზადებ სინათლეს ჩემი ცხებულისათვის.

¹⁸მის მტრებს სირცხვილით შევმოსავ, ხოლო მასზე იბრწყინებს გვირგვინი მისი!